सुदूरपश्चिम सरकार ३७ अर्ब ७० करोडके बजेट ल्यानल  

धनगढी, २५ कुवाँर । सुदूरपश्चिम प्रदेश सरकारसे चालु आर्थिक वर्ष २०८३ ओ ०८४ के लग ३७ अर्ब ७० करोड ३९ लाख ६६ हजार रुप्याके बजेट सार्वजनिक करले बा ।

अँटवार प्रदेशसभाके बैठकमे आर्थिक मामिलामन्त्री चक्रबहादुर मल्लसे वार्षिक बजेट प्रस्तुत करल हो चालु आर्थिक वर्ष सुरु हुइल तीन महिनापाछे प्रदेश सरकारसे बजेट ल्यानल हो । एकरआघे नेपाली कांग्रेस नेतृत्वके सरकारसे गत कुवाँर १ गते ३७ अर्ब ७० करोड रुपयाके बजेट प्रस्तुत करल रहे । मने, बजेटसम्बन्धी विवादके कारण सरकार परिवर्तन हुइलपाछे उ  बजेट पारित हुइ सेकल नै रहे । आघे सरकारसे प्रदेशसभामे पेस करल विनियोजन विधेयक ओ आर्थिक विधेयक फिर्ता लेना प्रस्ताव अँटवारके बैठकसे स्वीकृत हुइलपाछे लावा बजेट सार्वजनिक करल हो ।

सुदूरपश्चिम प्रदेश सरकारसे प्रदेशके नौ ठो जिल्लामे ‘मेड इन सुदूरपश्चिम’ नीति कार्यान्वयन कैना हुइल बा । प्रदेशके आर्थिक मामिलामन्त्री चक्रबहादुर मल्ल प्रदेशसभा बैठकमे बजेट प्रस्तुत करटी  उ  घोषणा करल हो ।

मन्त्री मल्लके अनुसार स्थानीयस्तरमे उत्पादित कृषि उपजके प्रवद्र्धन कैना ‘सुदूर कोशेली’ नामसे ब्रान्डिङ करना  बा । इ कार्यक्रमके  लग सरकारसे एक करोड २० लाख रुप्या बजेट विनियोजन करल बा ।

सुदूरपश्चिम प्रदेश सरकारसे धनगढीस्थित सेती प्रादेशिक अस्पतालमे सुधार योजना लागू कैना हुइल बा । ओकर लग प्रदेश सरकारसे चालु आर्थिक वर्षमे साढे २५ करोड रुप्या बजेट विनियोजन करल बा । प्रदेशके आर्थिक मामिलामन्त्री चक्रबहादुर मल्ल प्रदेशसभा बैठकमे चालु आर्थिक वर्षके बजेट प्रस्तुत करटी अस्पताल सुधार योजनाके लग उ बजेट छुट्याइल जानकारी डेहल हो । सुदूरपश्चिम प्रदेश सरकारसे कैलालीके धनगढीस्थित फाप्ला मैदान निर्माणके लग पाँच करोड रुप्या विनियोजन करल बा । प्रदेशके आर्थिक मामिलामन्त्री चक्रबहादुर मल्लसे प्रदेशसभामे चालु आर्थिक वर्षके बजेट प्रस्तुत करटी फाप्ला मैदान निर्माणके लग उ रकम छुट्याइल जानकारी डेहल हो ।

संघीय सरकारमार्फत फाप्लामे क्रिकेट मैदान ओ खेलग्राम निर्माणके काम हुइटी आइल बा । उ आयोजनाहे आघे बह्रल प्रदेश सरकारसे अपन ओरसे पाँच करोड रुप्या विनियोजन करल मन्त्री मल्ल बटैलै ।