वेस्टर्न म्यानेजमेन्ट एण्ड इन्जिनियरिङ कलेज ओ क्रेसेन्ट सिटी स्कूलके औपचरिक घोषणा

पहुरा समाचारदाता
धनगढी, ९ सावन । नेपाल वेस्टर्न म्यानेजमेन्ट एण्ड इन्जिनियरिङ कलेज ओ क्रेसेन्ट सिटी स्कुलके लौवा व्यवस्थापनके औपचारिक घोषणा हुइल बा ।

शनिच्चरके रोज धनगढीमे पत्रकार सम्मेलनके आयोजना करके वेस्टर्न इन्टरनेसनल विजनेस स्कुलके प्रबन्ध निर्देशक डा. शैलेन्द्रप्रकाश सिंह औपचारिक घोषणा करल रहिट । औपचारिक घोषणा करटी उहाँ यिहीहे एजुकेशन हवके रुपमे विकास करे खोज्ल बटैलै । ‘शिक्षामे आमुल परिवर्तन नइहुइट जटरा भारी बाट करले नइहुई,’ प्रवन्धक सिंह कहलै, ‘खासमे आतिरिक्त करिकुलम, पोजेटिभ माइन्ड सेट, टाइम मेनेजमेन्ट, फण्ड मेनेजेमन्ट, सिभी राइटिङ, जब इन्टरभियूके बाटहे ढेर फोकस करले बाटी ।’

‘महगा फि टिरेक यहाँके विद्यार्थी बाहेर जाके पह्रे पर्ना बाध्यता बा, ‘सुदूरपश्चिमके जनताके छावाछाईहुक्रे अपन घरेक मानामुठा खाके अपन ठाउँमे व्यवसायिक शिक्षा हाँसिल करे सेकिट कना उद्देश्यसे स्कूल सञ्चालनमे नानल हो,’ वेस्टर्न इन्टरनेसनल विजनेस स्कुलके प्रवन्ध निर्देशक डा. सिंह कहलैं, ‘हम्रे व्यवसायिक शिक्षा प्रदान करना मामिलामे दृढ संकल्पित हुके आघे बह्रल बटी ।’

उहाँ कहलै, कलेजके जग बल्गर बनाइक लाग टरेक तहसे पह्राई सुरु कैजाई, सीसीएसके पुराने भवनमे कक्षा १ से १० सम सुरु कैना ओ कार्तिकसे पहिले कन्सट्रक्सनमे जैबी । धनगढीमे अभिनसम कौनौ स्कुलसे डेहे नइसेकल प्रविधि नेपाल वेस्टर्न म्यानेजमेन्ट एण्ड इन्जिनियरिङ कलेज ओ क्रेसेन्ट सिटी स्कुलमे लागु कैना प्रवन्धक बटैलै ।

नेपाल वेस्टर्न म्यानेजमेन्ट एण्ड इन्जिनियरिङ कलेजके भुई तल्लामे खुला पुस्तकालय राखल बा, जहाँ ६० जाने विद्यार्थी संगे पह्रे सेक्ना, दुसर तल्लामे ६० ठो ल्यापटपके व्यवस्था सहिटके ल्यापके व्यवस्था रहल पत्रकार सम्मेलनमे जानकारी डेहल बा ।