थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०८ कुँवार २६४५, शुक्कर ]
[ वि.सं ८ आश्विन २०७८, शुक्रबार ]
[ 24 Sep 2021, Friday ]

लम्मा दूरीके सवारी चललेसे फेन यात्रु नैहुइँट

पहुरा | १० श्रावण २०७८, आईतवार
लम्मा दूरीके सवारी चललेसे फेन यात्रु नैहुइँट

काठमाडौं, १० सावन । करिब तीन महिनापाछे लम्मा तथा मध्यम दूरीके सवारी शनिच्चरसे सञ्चालनमे आइल बा । कोभिडके कारण वैशाख १६ से करल निषेधाज्ञासँगे ठप्प लम्मा तथा मध्यम दूरीके सवारीहे सावन ४ मे बैठल मन्त्रिपरिषद् बैठक सञ्चालन अनुमति डेले रहे ।

ओहे अनुसार जिल्ला प्रशासन कार्यालय काठमाडौं शुकके सार्वजनिक सूचना जारी करटि ठप्प सवारीहे सञ्चालन करना कले रहे ।

त्रिभुवन विश्वविद्यालय, लोकसेवा आयोगलगायत निकायसे परीक्षा तालिका सार्वजनिक करले ओरसे देशके टमान भागसे अइना परीक्षार्थी तथा सर्वसाधारणके आवतजावतहे सहज बनैना स्वास्थ्य मापदण्ड अपनाके सवारी चलाइ डेना जनागिल बा । मने सवारी सञ्चालनमे अइलेसे फेन यात्रुके संख्या भर न्यून बा । पहिल दिन यात्रुके चाप ढेर रना नयाँ बसपार्क, कोटेश्वर, गौशाला, चाबहिल, कलंकीलगायत स्थानके टिकट काउन्टर खुललेसे फेन यात्रु ओत्र नैरहैं ।

उपत्यकाबाहेरसे अइना यात्रुके चाप भर बह्रल यातायात व्यवसायी बटैले बटैं । पहिल दिन यात्रुके चाप कम रहल नयाँ बसपार्क सञ्चालन करटि आइल ल्होत्से बहुउद्देश्यीय प्रालिके एचआर म्यानेजर पंकज मल्ल जानकारी डेलैं । बसपार्कसे शनिच्चर साँझसम लम्मा दूरीके १ सय २० ठो बस छुटल उहाँक कहाइ बा । ‘काठमाडौंसे बाहेर जैना यात्रु एकदम कम बटैं,’ उहाँ कलैं, ‘उपत्यका भित्रन यात्रु भर ढेर बटैं ।’ यात्रुवाहक सवारी दिनदिने सेनिटाइज करके किल चलाइल बा । टबफेन सम्बन्धित निकायसे स्वास्थ्य मापदण्ड पालना करल÷नैकरलबारे जाँच करलेसे और मजा हुइना उहाँक सुझाव बा ।

पहिल दिन उपत्यकासे बाहेर जैना सवारी ओ यात्रुके चाप कम रहल महानगरीय ट्राफिक प्रहरी महाशाखाके प्रवक्ता एसपी सञ्जीव शर्मा दास फेन बटैलैं । ‘बस खालीखाली बाहेर गिल बा,’ उहाँ कलैं । महाशाखाके अनुसार शनिच्चर साँझसम ३ हजार ५ सय ५१ सवारी भित्रल रहे । बाहेर गिल सवारीके संख्या भर ३ हजार ५ सय ६९ बा । अस्टेक १६ हजार १ सय २८ यात्रु भित्रल ओ १३ हजार ८ सय ९४ उपत्यका छोरल महाशाखा जनैले बा । यीआघे गैल असार २१ से उपत्यकामे जोरबिजोर प्रणाली हटाके सब सवारी सञ्चालन खुला करल रहे ।

पहिल दिन हुइल ओरसे २० प्रतिशत किल लम्मा तथा मध्यम दूरीके सवारी सञ्चालनमे आइल नेपाल यातायात व्यवसायी राष्ट्रिय महासंघके महासचिव सरोज सिटौला बटैलैं । ‘गाडी ग्यारेजमे रहल बा, चालकहुक्रे अइना क्रम सुरु हुइल बा,’ उहाँ कलैं । अपनहुक्रे स्वास्थ्य मापदण्ड अपनाके गाडी चलाइल उहाँक कहाइ बा ।

यहोर उपत्यकाके काठमाडौं, भक्तपुर ओ ललितपुरमे सञ्चालन हुइना सार्वजनिक सवारीमे भर स्वास्थ्य सावधानी नैअपनाइल गुनासो बह्रल बा । यात्रुहे मास्क अनिवार्य करलेसे फेन गाडीमे सेनिटाइजर नैढरल यात्रुहुक्रे बटैले बटैं । सहचालक फेन मास्क नैलगाके यात्रु चह्राइटि बटैं ।

उपत्यकाके भित्री रुटमे चल्न सवारीमे यात्रु कोचाकोच रहल गुनासा फेन बा । विशेषकरके उपत्यकामे साँझके गाडीमे यात्रुके भीड हुइना करल बा । प्रहरी भर ढेर यात्रु बोकल सवारीहे कारबाही करे सेकले नैहो । उपत्यकाभित्तर एक रुटमे चल्न सवारीमे फेन यात्रुसे फरकफरक भाडा उठाइल पागिल बा । सरकारसे अन्तरप्रदेश भाडा समायोजन करलेसे फेन जिल्लाभित्तर चल्न सवारीके भाडाबारे भर कौनो निर्णय करले नैहो । यात्रुसे दैनिक मनपरी भाडा असुलल गुनासो आइठ ओ ओहेअनुसार असुल्न सवारीहे नियन्त्रणमे लेके कारबाही करटिरहल महानगरीय ट्राफिक प्रहरी महाशाखा जनैले बा ।

नेपाल यातायात व्यवसायी राष्ट्रिय महासंघ भर भाडा समायोजनमे प्रदेश सरकारसे ढिलाइ करल जनैले बा । ‘संघीय सरकार भाडा समायोजन करसेकल बा, प्रदेश सरकार फेन करेपरल,’ महासंघके महासचिव सिटौला कलैं, ‘सब प्रदेशहे भाडा समायोजन करना माग करटि ज्ञापन बुझासेकल बटि, निर्णयमे ढिलाइ नाहोए ।’ ट्याक्सीके हकमे भर स्थानीय सरकारसे निर्णय करेपरना उहाँक कहाइ बा ।

जनाअवजको टिप्पणीहरू