पहिरोसे डोटीके २ सय परिवार जोखिममे

डोटी, २५ भदौ । जिल्लाके पूर्वी क्षेत्रस्थित दिपायल सिलगढी नगरपालिका–८ सेटीगाउँ पहिराके उच्च जोखिममे रहल बा । गाउँउपरसे ओ टरेसे पहिरो आइ लागलपाछे सिङ्गो गाउँके २०० घरपरिवार जोखिममे परल हुइट । कुछ दिन पहिलेके वर्षाके कारण पहिरो आइ लागल स्थानीयवासी ७८ वर्षीया हरिना कडायत जानकारी डेली । ओहकान अनुसार पहिरो अब्बे फेन घरी घरी अइना करल बा ।

लगातार पहिरो आइ लागलपाछे वहाँके नागरिकहे सामान्य पानी परलेसे फेन गाउँ नै बग्ना डरसे रातके निँद फेन नैपर्ना करल वडाध्यक्ष रामबहादुर खडका बटैलै । उहाँ कहलै “पूरे गाउँके जमिनके भित्री भागमे पानी फुटे लागल बा, रातके बरवार वर्षा हुइलेसे पूरै गाउँ बग्ना चिन्तामे यहाँके नागरिकहे निँद समेत परे छोरल बा ।” गाउँमे लगातार पहिरे अइना क्रम बह्रलेसे फेन ओकर रोकथाम तथा नियन्त्रणके लाग कौनो पहल नैहुइल औरे स्थानीयवासी जमुना कडायत बटैली ।

पहिरो नियन्त्रण नैहुइटसम पूरै बस्ती सारे पर्र्ना अवस्था रहल स्थानीयवासी तिरमलसिंह कुन्जेडा बटैलै । उहाा कहली, “पुरे गाउँ नै पहिराके जोखिममे परल बा, समयमे नागरिकहे सुरक्षित स्थानमे सर्ना ढिला कैलेसे बरवार पुगैना डेखजाइठ् ।” अत्रे किल नैहोके लगातार अइटी रहल पहिरोके कारण यहाँके खोपानीके मुहान ओ सिँचाइ कुलो बगाइलपाछे खानेपानी तथा सिँचाइके समेत समस्या हुइल स्थानीयवासी तुलसी खड्का बटैली ।

गाउँमे अइना पहिरो नैरोकजैना अवस्था आइलपाछे यहाँके नागरिक गाउँ छोरके अन्यत्र जैना अवस्थामे रहल बाटै । पहिराके डरसे घर बगके मनै भँठ्के मुना डरसे यहाँके कतिपय नागरिक पालटरे बास बनाइल स्थानीयवासी तथा सञ्चारकर्मी तेजु वली बटैलै ।

ओस्टके शौचालय, खानेपानी तथा ओजरारके लाग बत्तीसमेत नैहोके उहाँहुक्रनहे दिनहुँ सास्ती हुइना करल दिपायल सिलगढी–८ के बासिन्दा कमल बोहरा बटैलै । उक्त गाउँमे वर्षेनी वर्षायाम लागलपाछे डर, त्रासमे बैठे परल बेला लगातार पानी परके गाउँके छेउछाउ पहिरो जाइ लागलपाछे सुरक्षित बासके लाग गाउँ छोरके पालटरे बैठे परल पहिरोपीडितके कहाइ बा ।

पहिराके समस्या वर्षौँसे रहटी आइल रलेसे फेन आपन समस्या समाधानके लाग कोइ फेन उचित पहल नैकरल पीडितके गुनासो रहल बा । पहिरोपीडितके सुरक्षित बासके व्यवस्था हाली नैहुइलेसे पहिरोसे कौनो दिन गाउँ नै सामूहिक चिहान बन्ना खतरा बह्रल स्थानीयवासी हर्क खड्का जानकारी डेलै । पालटरे रहल बालबालिकामे जुरी अइना, रुघाखोकी लग्ना जैसिन समस्या डेखल बावै ।