विश्व शान्ति दिवसके अवसरमे दीप प्रज्वलन
पहुरा समाचारदाता
धनगढी, ६ कुवाँर । अन्तर्राष्ट्रिय शान्ति दिवसके अवसरमे टमान संघ संस्थासे मंगरके रोज संयुक्त रुपमे दीप प्रज्वलन करले बटै ।
राष्ट्रिय मानवअधिकार आयोग, इन्सेक, इन्टरनेशनल एलर्ट, महिला कानून र विकास मञ्च, समावेशी संक्रमणकालिन न्याय, मेलमिलाप तथा द्वन्द्व समाधानका लागि जिल्ला संजाल, डब्लुएजआर, सिभीपिसी ओ टिपिओ नेपालके संयुक्त आयोजनामे धनगढीके पार्क चोकमे दीप प्रज्वलन करल रहे ।
दीप प्रज्वलन कार्यक्रम सुदूरपश्चिम प्रदेशसभा सदस्य माननीय डिल्लीराज पन्तके बर्का पहुनामे हुइल रहे । कार्यक्रममे बोल्टी उहाँ शान्ति निर्माण प्रक्रिया शुरु हुइल १६ वर्ष पुगे लग्लेसेफे शसस्त्र द्वन्द्वके समयमे प्रभावितहुक्रे अभिन न्याय नइपाइल बटैलै ।
‘द्वन्द्व प्रभावितहुक्रे आजफे घरवारविहीन हुके बाँचे परल स्थिति बा,’ उहाँ कहलै, ‘द्वन्द्व प्रभावके कारण समाजमे तिरस्कृत हुई परल, लान्छना खेप्टी, समाजसेफे विस्थापित हुई परल, बालबच्चाहुकनके भविष्यके अन्यौलता तथा चिन्ता, बालबालिकाहुक्रे पहिचान बिहिन रहल अवस्था ओ द्वन्द्वसे सिर्जना करल यी महामारीके जटिल परिस्थितसे आउर चर्काइल घाउ लेके बैठे परल अवस्था बा । बुद्ध जन्मल देशमे आशान्ति रहना कदपी नइसुहैना ओरसे समाजमे शान्ति अमन चयन करलक लाग सक्कु जानेक सहकार्य जरुरी रहल माननीय सदस्य पन्त बटैलै ।
राष्ट्रिय मानव अधिकार आयोग प्रदेश संयोजक मोहन जोशी द्वन्द्व प्रभावितहुकनके मानव अधिकारके सम्मान, संरक्षण ओ परिपुरणके लाग सरकार ध्यान डेहे पर्ना बटैलै ।
मुलुकमे शान्ति स्थापना हुइ नइसेकलपाछे आत्म हत्याके घटनामे बृद्धि हुइल उहाँ बटैलै ।
कार्यक्रममे सहजीकरण करण करटी महिला कानून र विकास मञ्चके जिल्ला संयोजक रेणु प्रधानश्रेष्ठ द्वन्द्वकालमे महिलाउप्पर हुइल यौन तथा लैङिक हिंसाके घटनाके उमेर, जाति, लिङ ओ भौगोलिक क्षेत्रके आधारमे अनुसन्धान करके हिंसाके प्रकृति ओ अवस्थाके आधारमे सामाजिक न्याय तथा महिला अधिकार सुनिश्चितताके लाग विशेष योजना तथा सशक्तिकरणके कार्यक्रमके व्यवस्था करे पर्ना बटैले रही ।
