दिगो शान्तिके लाग मेलमिलापमे दुनु पक्षके जिट आवश्यकः न्यायधिश
पहुरा समाचारदाता
धनगढी, ६ कुवाँर । कैलाली जिल्ला अदालतके माननीय न्यायधिश जयनन्द पनेरु कौनोफे घटना मेलमिलाप करेबेर दिगो शान्तिके लाग दुनु जानेक जित हुइना आवश्यक रहल बटैले बटै ।
प्राकृृतिक स्रोत द्वन्द्व रुपान्तरण केन्द्र नेपालके आयोजना तथा जिल्ला समन्वय समिति कैलालीके सहयोगमे मंगरके रोज धनगढीमे हुइल जिल्ला स्तरीय संवाद तथा सल्लाहकार समितिके बैठकमे बोल्टी जिल्ला न्यायधिश पनेरु जैसिनफे घटनामे मिलापत्र करेबेर दुनु जानेक जित हुइना मेरिक फैसला कैना आवश्यक रहल बटैलै ।
‘घटना जैसिन सुकै होए, फैसलामे एक जानेक चित नइबुझलेसे फेरसे उहे घटना दोहरयाई सेकठ, न्यायधिश पनेरु कहलै, ‘न्यायिक क्षेत्रमे काम कैना संस्था, न्यायिक समिति या अदालतसे फैसला कैना मुद्दाके मिलापत्र दिगो शान्ति उन्नत सम्बन्धके लाग दुनु पक्षके जित, चित बुझदो हुइना आवश्यक बा ।’ स्थानीय तहफे अदालतके एक ठो अंग हो उहाँ कहलै, समितिके आइल मुद्दा अपन कार्यक्षेत्र हेरके मिलाई पर्ना बटैलै ।
प्राकृृतिक स्रोत द्वन्द्व रुपान्तरण केन्द्र नेपाल जल, जंगल ओ जमिन सम्बन्धी टमान मेरिक विवादके क्षेत्रमे मेलमिलाप कैना काम करटी आइल ओ दिगो रुपमे समाधान करल बटैलै । बडघर लगायत टमान जहनहे मेलमिलाप सम्बन्धी तालिमके व्यवस्था कैना मजा पाटो रहल कहटी यिहीसे समाजमे शान्ति स्थापना करे सेक्ना वडघरके क्षमता अभिवृद्धिमे टेवा पुग्ना बटैलै । मेलमिलापके क्षेत्रमे काम करेबेर जिल्ला अदालत ओ न्यायिक समितिसेफे समन्वय आवश्यक रहल जिल्ला न्यायधिश पनेरु बटैलै ।
कार्यक्रममे घोडाघोडी नगरपालिकाके उप प्रमुख प्रेमकुमारी थापा, जानकी गाउँपालिकाके उपाध्यक्ष उमा महतो कानूनहे टेक्के न्याय ओ मेलमिलाप करे पर्ना बटैले रहिट । कार्यक्रममे फेकोफनके महासचिव अनुपा चौधरी, वार एशोसियशनके सचिव प्रेमबहादुर शाही लगायत प्राकृृतिक स्रोत द्वन्द्व रुपान्तरण केन्द्र नेपालके करल गतिविधिके प्रशंसा करल रहिट ।
प्राकृृतिक स्रोत द्वन्द्व रुपान्तरण केन्द्र नेपालके जिल्ला संयोजक नेत्रप्रसाद खनाल संस्थासे करटी आइल गतिविधि ओ हालसम हुइल उपलब्धीबारे जानकारी डेहल रहिट ।
जिल्ला संयोजक खनाल द्वन्द्व रुपान्तरणके कार्यक्रम अन्र्तगत ४ ठो विवादमे काम हुइटी रहल अवस्था, लम्की चुहा–९, वनबर्सा गाउँमे रहल नवजागरण आभारभूत विद्यालयके खेलमैदानमे खेलकुद व्यवस्थापन सम्बन्धी विवाद यिहे भदौ २३ गते सहमति हुइल बटैलै । ओस्टेक टिकापुर–९ मे रहल बौनिया गाउँसे पायल गाउँ जैना डगर निकासी सम्बन्धी विवाद सहमतिके चरणमे पुगल, घोडाघोडी–२ मे रहल बडि मालिका ओ कालिका सामुदायिक वन सीमाना विवादमे माकुरा समूह गठन अवस्थामे रहल बटैलै ।
घोडाघोडी–३, भोजपुरमे रहल डौना वेबरी यूवा क्लवके फिल्डसे डगर निकासी सम्बन्धी विवादमे द्वन्द्वके नक्साङकन हुइटी रहल जिल्ला संयोजक बटैलै । उहाँ दुई ठो विवादमे पूर्व तयारी हुइटी रहल ओ ५ ठो स्थानीय तहमे संस्था सूचीकृत हुइटी रहल बटैलै ।
जिल्ला समन्वय समितिके उपप्रमुख सुन्दरीदेवी चौधरीके अध्यक्षतामे हुइल कार्यक्रममे प्राकृृतिक स्रोत द्वन्द्व रुपान्तरण केन्द्र नेपालके संयोजक बल्लु चौधरी कार्यक्रममे स्वागत मन्तव्य व्यक्त करले रहिट । कलेसे संचालन जिल्ला सहजकर्ता बन्धुविवस चौधरी करले रहिट ।
कार्यक्रममे केन्द्रके सचिव दानबहादुर चौधरी, जिल्ला सहजकर्ता दीपु चौधरी, रिता चौधरी लगायत जिल्ला समन्वय समितिके कार्यालय प्रमुख, मालपोत कार्यालयके निमित्त प्रमुख, जिल्ला सरोकारवाला निकायके सहभागिता रहल रहे ।
