थरुहट तराइमे लौवा पार्टी ?

नेपाल लोकतान्त्रिक पार्टी, थरुहट/थारुवान अभियान, नेवा अभियान, दलित अभियान, रिटर्नी प्रवासी अभियानके संयुक्त कैलाली जिल्ला स्तरिय भेला लम्कीचुहामे होके लौवा पार्टी बनैना घोसना कर्ले बा । ओकर लग इहे अगहन ३ ओ ४ गते काठमाडौंमे राष्ट्रिय सम्मेलन कैना फेन जनागैल बा । घोसनामे एक कदम आउर आगे बह्रके पार्टीके चुनाव चिन्ह ‘नमस्ते’ फेन ‘फिक्स’ कैगैल बा ।

नेपाल लोकतान्त्रिक पार्टीके आबक् चुनाव चिन्ह ‘नमस्ते’ हुइस, जेकर केन्द्रिय अध्यक्ष भानुराम थारु बाटैं । यकर सोझैला अर्ठ लगाइबेर थरुहट/थारुवान मोर्चा, नेवा, दलित, रिटर्नी प्रवासी अभियानके कुछ घटकहे लेके नेपाल लोकतान्त्रिक पार्टीमे बिलय हुइटि बा । लौवा पार्टी घोसनाके कैलाली संयोजक माधव चौधरीके कहाइ बा, ‘नेपालमे रहल राजनितिक दल प्राइभेट लिमिटेड जैसिन बा, काँग्रेसके देउवा, एमालेके केपी ओली, एमाले समाजवादीके माधव, माओवादी केन्द्रके प्रचण्ड, जसपाके बाबुराम, उपेन्द्र, लोसपा महन्थ ठाकुर रहल बाटै । मने हमार सामुहिक नेतृत्व रहि । सम्मेलनसे अध्यक्ष मण्डल चयन हुइ ।

संविधानसभाके पहिल चुनावसे पहिला नेता लक्ष्मण थारु माओवादी पार्टीसे विद्रोह कर्ले रहैं । लक्ष्मण लगायटके टोलि संघीय लोकतात्रिक राष्ट्रिय मञ्च बनैले रहिट, जेम्ने थरुहट, नेवा, लिम्बुवान, मगरात, तमुवान लगायट घटक रहिट । थरुहट घटकके अग्वा लक्ष्मण थारु संघीय लोकतात्रिक राष्ट्रिय मञ्चके केन्द्रिय अध्यक्ष फेन हुइल रहिट । इहे पार्टीसे रुक्मिणी थारु, राजकुमार नाल्बो सांसद फेन हुइल रहिट । पाछे लक्ष्मण थारुके कार्वाहीमे परल रुक्मिणी थारु संघीय लोकतात्रिक राष्ट्रिय मञ्च (थरुहट) बनैलि । इ पार्टी उहाँ विघटन नै कर्ले हुइ । मने पार्टीके कौनो गटिबिढि नैहुइस ।

लक्ष्मण थारु थरुहट तराई पार्टी नेपाल बनाके फोरम लोकतान्त्रिकमे छिर्ला । पाछे फोरम लोकतान्त्रिक कांग्रेसमे विलय हो गैल । मने कांग्रेसमे जाइक नै रुचैलक भानुराम थारु नेपाल लोकतान्त्रिक पार्टी गठन कैके फोरम लोकतान्त्रिकके पुराने चुनाव चिन्ह ‘नमस्ते’ जोगैना सफल हुइलाँ । मने नेपाल लोकतान्त्रिक पार्टीके कामकार्वाहि फेन गुमनाम बटिस ।

बेन इ बिचेम थरुहट÷थारुवान मोर्चा बहुट सक्रिय रहल । मने मोर्चा भिट्टरके प्रवक्ता मिनराज चौधरी, युवा अध्यक्ष सिताराम चौधरी लगायट युवा कांग्रेस राजनीतिमे छिरल ओर्से मोर्चा राजनीतिक पार्टीमे बडलल्मे स्वतन्त्र अभियानमे लागल व्यक्टिनके बहिर्गमनके कारन मोर्चाके सक्टि कमजोर बिल्गैहिस । हुइना टे थरुहट/थारुवान मोर्चा केवल मोर्चाके रुपमे किल रनासे राजनीतिक सक्टि बन्ना अभियान मजा हो । मने अहम् सवाल इ बा कि का लावा बनल पार्टी स्ठापिट हुइ सेकि ? यहोरसे ओहोर करना का लक्ष्मण थारुके नेतृत्वहे जनता विस्वास करहिं ?

जस्टे पुरुब तराइमे जसपा, लोसपा हस पार्टी बा । ओस्टक पस्चिउँ थरुहट तराइमे फेन क्षेत्रिय पार्टीके आवस्यकटा बा । मने नेतन थरुहट तराई पार्टी नेपालसे लेके फोरम लोकतान्त्रक हुइटि बनाइल पार्टीहे भुट्भुट्वा सेकल ओर्से आब फेनसे बिस्वास जिट्ना बहुट कर्रा बा ।