आर्थिक शसक्तीकरणके लाग दिगो जिविकोपार्जन सहयोग हस्तान्तरण

पहुरा समाचारदाता
धनगढी,२४ कुवाँर । ओरेक नेपाल हिंसा प्रभावितहुकनके आर्थिक शसक्तीकरणके लाग दिगो जिविकोपार्जन सहयोग हस्तान्तरण करले बा ।

आर्थिक शसक्तीकरणके लाग दिगो जिविकोपार्जन सहयोग कैलारी गाउँपालिका, गौरीगंगा नगरपालिका ओ भजनी नगरपालिकाके २÷२ करके ६ जनहनहे कैगिल ओरेक नेपालके कार्यक्रम अधिकृत गीता चौधरी बटैली । जौन मन्से २ जनहनहे खाजा नास्ता पसलके लाग २३० लिटरके डिप फ्रिज, १२ ठो प्लाटिक स्टुल, १ सेट प्लाष्टिक डाइनिङ टेबल, २ ठो बाल्टी, १ ठो मग करके करके ४० हजार रुप्या बराबरके सामान हस्तान्तरण करल बा ।

ओस्टेक एक जनहनहे सिलाई कटाई संचालनके लाग सिलाई मेसिन, इन्टरलक मेसिन, आइरन, कैची, धागा, बटन लगायत टेलर संचालनके लाग सक्कु सामान हस्तान्तरण करल बा ।

ओस्टे एक जनहनहे घुम्टी ठेलामे फलफुल ओ टिना व्यावसायके लाग ठेला ओ तराजु हस्तान्तरण करल बा । कलेसे एक जाने बाख्रा पालन, एक जाने बंगुरपालनमे ३०÷३० हजारके नगद चेक हस्तान्तरण कैगिल बा । सहयोग हस्तान्तरण गौरीगंगाके प्रमुख, उपप्रमुखके हातसे, कैलारीके प्रशासकीय अधिकृत खगेन्द्र जोशी, सामाजिक विकास शाखाके यगम कलेलसे हस्तान्तरण करल बा ।

ओस्टेक करके अँटवारके रोज विश्व मानसिक स्वास्थ्य दिवसके अवसरमे कैलारी ओ गौरीगंगा–११ मे मानसिक स्वास्थ्यबारे लिखल होडिङबोर्ड रख्ना काम हुइल ओरेक नेपालके कार्यक्रम अधिकृत बटैली । ओम्ने मानसिक समस्या हुइलपाछे विल्गैना लक्षण, कारण, सुमस्या परलेसे सम्पर्क करे पर्ना निकायके सम्पर्क नम्बर उल्लेख हुइल बा ।

जिविकोपार्जन सहयोग ओरेक नेपाल परियोजना कार्यालय कैलालीके आर्थिक सहयोग गौरीगंगा, कैलारी ओ भजनी नगरपालिका न्यायिक समितिसंगके समन्वयमे करल हो । हिंसामे परल महिलाहुक्रे छोटमोट व्यवसाय करके आर्थिक रुपमे सक्षम हुइलेसे हिंसा सहे नइपरी कना उद्देश्यसे ओरेक जिविकोपार्जनके लाग सहयोग करल हो ।