हिरासत कक्षके शौचालय भिटर झुलके मृत्यु

पहुरा समाचारदाता
धनगढी, २५ कुवाँर । कैलालीके ईलाका प्रहरी कार्यालय टिकापुरके हिरासत कक्षके चर्पीमे एक यूवकके झुलके मृत्यू हुइल बा ।

सुर्खेत चौकुने गाउँपालिका वडा नं.३ बेतान बैठना बर्ष ३५ के धन बहादुर राना सोम्मारके सकारे ६ बजेक समयमे हिरासत कक्ष भिटर रहल शौचालयके भेन्टिलेसनके जाली चिठके झ्यालके सरियामे उज्जर स्याण्डो (गन्जी) के डोरी बनाके घेँचामे पासो लगाके झुलल मृत अवस्थामे फेला परल जिल्ला प्रहरी कार्यलय कैलालीके प्रवक्ता प्रतिक विष्ट जनैलै ।

कैलाली जानकी गाउँपालिका वडा नं.१ तोरैयापुरसे यिहे कुवाँर २४ गते सकारे उहे बैठना पुलुराम थारुके एक ठो भैंसीनीय चोरी हुइलपाछे खोजतलाश करटी जाईबेर भैसीनीय धनी २४ गते सकारे ७ः३० बजेके समयमे जिल्ला कैलाली लम्कीचुहा नगरपालिका वडा नम्बर ५ थापापुर स्थित झुलुङे पुल लग्गेसे उ चोरी करल भैंसी सहित धनबहादुर नियन्त्रणमे लेले रहे ।

सोधपुछके लाग नियन्त्रणमे लेहल ओ भैसीनय धनीसे निज उपर आवश्यक कारबाही करी पाउँ कहिके ईलाका प्रहरी कार्यालय टिकापुरमे लिखित निवेदन डेहल प्रहरी जनैले बा । उ सम्बन्धमे थप अनुसन्धान कार्य हुइटी रहल बा ।