२१ हजार हेक्टरमे लगाइल धानबालीमे पूर्ण क्षति
पहुरा समाचारदाता
धनगढी, ९ कार्तिक । धान उत्पादनके लाग पकेट क्षेत्रके रुपमे रहल कैलालीमे बेमौसमी वर्षासे धानबालीमे बरवार क्षति करले बा ।
वर्षा ओ डुवानसे जिल्लाभर करिब २१ हजार हेक्टर क्षेत्रफलमे लगाइल धानबाली पूर्ण रुपमे क्षति हुइल कृषि ज्ञान केन्द्र कैलाली जनैले बा ।
कृषि ज्ञान केन्द्रके प्रमुख खगेन्द्र शर्मा प्रारम्भीक तथ्यांक हेरेबर २१ हजार हेक्टरके धानबाली पूर्ण रुपमे नष्ट हुइल बटैलै । लम्मा समय पानीमे रहल धान जामे लागल उहाँ बटैलै । कैलालीमे ७० हजार हेक्टरमे धानबाली लगाजाइठ् । ज्ञान केन्द्रके अनुसार प्रतिहेक्टर औषत ४५ क्वीन्टल धान उत्पादन हुइना करल बा ।
उत्पादकत्वके आधारमे करिब साढे नौ लाख क्वीन्टल धान नष्ट हुइल ज्ञान केन्द्र जनैले बा । प्रतिक्वीन्टल धान दुई हजार रुपैयााके दरसे हिसाब करेबर फेन धानबालीमे वर्षासे करिब दुई अर्ब रुपैयाँके क्षति हुइल शर्मा बटैलै । लाही, मसरी, आलुसमेत कैके करिब तीन अर्बके क्षति हुइल अनुमान रहल उहाँ जानकारी डेलै ।
कुल धानबाली लगैना क्षेत्रमध्ये ५० प्रतिशतमे भित्र्या सेकल ओ १५ प्रतिशतजत्रा कट्ना बाँकी रहल ज्ञान केन्द्र जनैले बा ।
धानबालीमे ढिउर क्षति होके अन्न उत्पादन घट्ना ओ इहीसे खाद्यान्न अभावके समस्या हुइ सेक्ना सम्बन्धित अधिकारीहुक्रे बटैले बाटै ।