थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १९ अगहन २६४५, अत्वार ]
[ वि.सं १९ मंसिर २०७८, आईतवार ]
[ 05 Dec 2021, Sunday ]

बाढसे किसानके मिहिनेतसंगे सपनाफे पुहल

पहुरा | ११ कार्तिक २०७८, बिहीबार
बाढसे किसानके मिहिनेतसंगे सपनाफे पुहल

पहुरा समाचारदाता
भजनी, ११ कार्तिक ।
कैलालीके भजनी नगरपालिका–७ चर्राके ३४ वर्षीया मनीषा चौधरी तीन बिघा १५ कटठामे लगाइल धान बाढसे पुहाइलपाछे समस्यामे परल बटैठी । कृषिमे निर्भर १० जानेक परिवार पल्न मुस्किल हुल बटैठी उहाँ कहठी, ‘दुई बिघा हमार खेतुवा बा । एक बिघा १५ कटठा लिजमे लेहल बटी । सक्कु धान पुहाइल । हमार मिहिनेत केल नाही सपनाफे पुहल ।’

उहाँक अनुसार, यी वर्ष धानके बाला मजा रहे । उहाँक परिवार दुई साताआघे बैंकसे तीन लाख ऋण लेले रहित धान भित्रैना । धन बेचके चुक्ता कैना योजना बनाइल मने उहाँ परिवारहे सकस हुइल बा ।

‘ऋण लेहल पैसासे मेसिन लगाके दुई बिघाके धान कटले रही” मनिषा कहठी, ‘एक्कासि पानी परल, बाढसे सक्कु पुहाइल ।’

खेतुवामे चार फिट जटरा पानी भरल उहाँ बटैठी । जिहीसे कट्न बाँकी धानफे नष्ट हुइल बा । ‘पानी परेबेर पाँच कटठाके धान ठोरिक उच ठाउँमे धारल रहे, मने उ फे काम नइलग्न हुइल बा,’ उहाँ कहठी, ‘अब्बे टे उ धानफे जेउर जैसिन हुइल बा । धान सरके खेतभर गन्हैना हुइल बा ।’

यैसिन अवस्था आई कना उहाँक परिवारसे सोचले नइहे । प्रायः सावन–भदौमे बाढ आए । उ खासे क्षति नइहुए । गैल सावन–भदौमे बाढ नइआइलपाछे धान जोगल कहिके उहाँ खुशी रहिट । मने, उ खुशी ढेर दिन टिके नइपाइल ।
‘और वर्ष सावन–भदौमे बाढ आए, धानके बाला नइलग्टी पुहाए,’ उहाँ कहठी, ‘अटरा पीडा चाहिं नइहुए । यी वर्ष टे हेरटी हेरटी सपना ओ खुशी दुनु संगे पुगल ।’

किसान कहलै राहतसे केल नइपुग्न बटैठै । अब हिउँदे खेतीके लागफे सहयोग करे पर्ना बटैठै । मनीषा कहठी, ‘हम्रहिनहे सरकारसे डेना २५–३० केजी चाउरसे नइपुगी, बरु हिउँदे खेतीके लाग समयमे बीउबिजन, मलखाद ओ डिजेलमे अनुदान देहे परल ।’

उहाँ केल नही, सुदूरपश्चिमके टमान किसानके धानबाली पुहल बा । कैलाली ओ कञ्चनपुरमे धानबालीमे भारी क्षति हुइल कृषि विकास निर्देशनालय डोटीके निमित्त प्रमुख यज्ञराज जोशी बटैठै ।

उहाँक अनुसार, कृषि ज्ञान केन्द्रके अनुगमनमे कैलालीमे करीब ५४ प्रतिशत ओ कञ्चनपुरमे ४२ प्रतिशत धानबालीमे क्षति पुगल बा ।

कैलालीमे तीन लाख ४० हजार मेट्रिक टन ओ कञ्चनपुरमे एक लाख ८७ हजार मेट्रिक टन धान उत्पादन हुइना करल बा । बाढ ओ डुबानके कारण धानके उत्पादन आधा कम हुइना उहाँ बटैठै ।

सुदूरपश्चिम प्रदेश सरकारसे क्षतिके विवरण संकला करटी रहल जनैले बा । प्रदेश सरकारके प्रवक्ता एवं आन्तरिक मामिला तथा कानून मन्त्री पूर्णा जोशी क्षतिके विवरण संकलन हुइलपाछे एकद्वार प्रणालीसे राहत वितरण कैना बटैठी ।

हिउँदे बालीके तयारीमे लागे पर्ना वेला कैलाली ओ कञ्चनपुरके किसान अब्बे उहे भिजल धान सुखैना व्यस्त बटै । अग्लो भागमे सर्ना, सुकैना ओ मजासे नइसुखटी थ्रेसिङ कैना काम हुइटी रहल बा ।

जनाअवजको टिप्पणीहरू