सुदूरपश्चिमके ५२२ वडामे एमालेके सर्वसम्मत नेतृत्व चयन
पहुरा समाचारदाता
धनगढी, १३ कार्तिक । नेकपा (एमाले) शनिच्चरसम सुदूरपश्चिम प्रदेशके ८ जिल्लाके ५२२ वडामे सर्वसम्मत नयाँ नेतृत्व चयन करले बा ।
८८ स्थानीयतहमे ७३४ वडा रहलमे बझाङबाहेकके ८ जिल्लाके ६४० वडामन्से ५२२ वडामे अधिवेशन सम्पन्न हुके सर्वसम्मत नेतृत्व चयन करल एमाले सुदूरपश्चिम प्रदेश कमिटी सचिव राजेन्द्र रावल जानकारी डेलै ।
बझाङबाहेक प्रदेशके ६ पहाडी जिल्लाके प्रायः वडामेफे सर्वसम्मत रुपमे नेतृत्व चयन करल बा । कलेसे बाँकी रहल वडामेफे सर्वसम्मत रुपसे अधिवेशन सम्पन्न कैना तयारी रहल उहाँ बटैठै ।
रावलसे बैतडीमे ८४ मन्से ७८ वडामे शुकके सर्वसम्मत नेतृत्व चयन हुइल ओ बाँकी रहल ६ मन्से चार वडामे शनिच्चर ओ दुुई वडामे अँटवार अधिवेशन हुइना जानकारी डेलै ।
५२ वडा रहल डडेल्धुरामे ४६ वडामे सर्वसम्मत नेतृत्व चयन हुइल बा कलेसे बाँकी रहल वडामे १५ गतेसम अधिवेशन सम्पन्न कैना तयारी बा । बाजुरामे सक्कु ६९ वडा ओ चार ठो पालिकाके अधिवेशनफे सम्पन्न हुइसेकल रावल बटैलै । बाँकी रहल वडा ओ स्थानीयतहके अधिवेशन कार्तिक १५ गते हुई ।
६१ वडा रहल दार्चुलामे ५५ वडाके अधिवेशन सम्पन्न हुसेकल बा कलेसे औरमेफे सर्वसम्मत रुपसे नेतृत्व चयन कैना एमाले जनैले बा । अछाममे ९१ मन्से शनिच्चर साँझसम ६० वडामे निर्विरोध अधिवेशन सम्पन्न करके नयाँ नेतृत्व चयन करल एमाले अछामके इन्चार्ज झपटबहादुर बोहरा जानकारी डेलै ।
उहाँक अनुसार कार्तिक १५ गतेभिटर बाँकी रहल सक्कु वडामे अधिवेशन सम्पन्न कैना कार्यतालिका तय हुइल बा । कैलाली ओ कञ्चनपुरके १५ बाहेक सक्कु वडामे एमालेसे सर्वसम्मत नयाँ नेतृत्व चयन करले बा ।
शुकके सम्पन्न वडा अधिवेशनसे १३ ठो स्थानीय तह रहल कैलालीके ११६ वडामे सर्वसम्मत नेतृत्व चयन करल एमाले जनैले बा । एमाले कैलालीे अध्यक्ष रतन थापासे जिल्लामे कुल १२६ वडा रहलमे शुकके साँझसम ११६ वडामे सर्वसम्मत नयाँ कार्यसमिति चयन करल जानकारी डेलै ।
शुुकके अबेरसम बन्द सत्र नइसेकल बाँकी १० वडामे शनिच्चर सर्वसम्मत रुपमे नेतृत्व चयन कैना अध्यक्ष थापा बटैलै । धनगढी उपमहानगरपालिका–१२ बाहेक और १८ वडामे अधिवेशन सम्पन्न हुइल नगर कमिटीके अध्यक्ष रामचन्द्र जोशी जानकारी डेलै ।
९ स्थानीयतहके ९२ वडा रहल कञ्चनपुुरमे पाँचबाहेक सक्कु वडामे अधिवेशन सम्पन्न हुइल बा । एमाले कञ्चनपुरके अध्यक्ष वीरबहादुर थापा दोधारा चाँदनी नगररपालिका–७, पुनर्वास नगरपालिका–८ ओ वेदकोट नगरपालिकाके तीन ठो वडाबाहेक सक्कु वडामे सर्वसम्मत रुपसे नयाँ नेतृत्व चयन करल जानकारी डेलै । बाँकी रहल वडामे शनिच्चर नेतृत्व चयन करटी अधिवेशन सम्पन्न हुइना उहाँ जनैलै ।
सुदूरपश्चिम प्रदेशमे १२ गते वडा अधिवेशन ओ १५ गते पालिका अधिवेशन कैर्ना कार्यसूची तय करलमे नेतृत्व सर्वसम्मत चयन कैना रणनीतिके कारण कुछ ढिलाइ हुइटी रहल बा ।
