पाठक आब सक्रिय राजनीति क्षेत्रमे

पहुरा समाचारदाता
धनगढी, १३ कार्तिक । लम्मा समयसम गैरसरकारी संस्थामे आवद्ध रहल धर्मराज पाठक आब सक्रिय राजनीति क्षेत्रमे लग्ना बटैले बटैं । उहाँ करिब १५ वर्षसम फाया नेपालके कार्यसमिति सचिव, अध्यक्ष ओ कार्यक्रम निर्देशकके रूपमे कार्यरत रहैं ।

शनिच्चरके रोज पत्रकार हुकनसँगके बाटचिट करना क्रममे अब्बेक राजनीतिक बेथितिहे सुधारके भिजनके साथ अप्ने फेनसे राजनीति क्षेत्र ओर प्रवेश करल बटैंले । नेतृत्व सीप ओ संगठन निर्माण एवं व्यवस्थापनमे अनुभवी रहल ओरसे अप्ने समाजमे रहल शक्ति संरचनाके कारण समाजमे विद्धमान गरिबी, अविकास, विभेद ओ अन्यायके बारेमे तथा उ सवालहे सम्बोधन करे सेक्ना हुइल ओरसे राजनीतिमे सक्रिय रुपसे लागल उहाँ बटैलैं । ओस्टेक, अपनठन टमान मेरिक योजना निर्माण, वित्तीय आंकलन, योजना परिक्षण मापदण्ड निर्माण तथा योजना कार्यान्वयनमे विशेष ज्ञान ओ अनुभव रहल उहाँ बटैलैं ।

अब्बे नेकपा (एमाले) कैलाली जिल्ला कमिटी सदस्य रहल उहाँ २०४५ सालके तत्कालीन नेकपा (माले) के जनसंगठन अनेरास्ववियु (एकताके पाँचौं) के पञ्चोदय माध्यमिक विद्यालय कैलालीके प्रारम्भिक कमिटीसे सदस्यता प्राप्त कैके राजनीतिके प्रवेश हुइल पत्रकार सम्मेलनमे जानकारी डेलै । ०४६ सालके जनआन्दोलनमे अनेरास्ववियुके ओरसे आन्दोलनमे सक्रिय सहभागी उहाँ ०४८ सालमे कैलाली बहुमुखी क्याम्पसमे अनेरास्ववियुके प्रारम्भिक सचिव हुइल रहैं ।

अस्टेक, उहाँ ०६२/६३ के लोकतन्त्र स्थापनाके लाग करल आन्दोलनमे नागरिक अगुवाहुकनके ओरसे सुदूरपश्चिमे सबसे पहिले जनआन्दोलनके उठानमे सक्रिय तथा नेतृत्वदायी भूमिकामे रहल रहिट ।

व्यवस्थापन संकायमे स्नातक करल उहाँ राजनीतिशास्त्र ओ समाजशास्त्र विषयमे स्नातकोत्तर करले बटै, कलेसे प्रिन्स अफ संग्क्ला विश्वविद्यालय थाइलेण्डमे विद्यावारिधि (पीएचडी)के लाग अध्ययनरत बटैं ।

करिब ३० वर्ष राजनीतिक तथा सामाजिक विकासके क्षेत्रमे कार्य अनुभव रहल उहाँ टमान सामाजिक संस्थामे फेन आबद्ध बटै ।

पाठक ०४९ सालके नेपाल पत्रकार संघ जिल्ला कार्यसमिति कैलालीके संस्थापक सदस्य हुइट कलेसे सुदूरपश्चिमके पहिल अफसेट प्रविधिके पत्रिका अनुमोदन साप्ताहिक (हाल दैनिक ओ अनलाइनके रुपमे प्रकाशित) के ०५४/०५६ सालसमके प्रकाशक ओ सम्पादक रहिट ।

उहाँ गैरसरकारी संस्था महासंघ नेपालके केन्द्रीय समिति सचिव, आजीवन सदस्य फाया नेपाल, नेपाल रेडक्रस सोसाइटी, नेपाल नेत्रज्योति संघ, सुदूरपश्चिम साहित्य समाज कैलाली, ओ सुदूरपश्चिम प्रदेश समिति मानव अधिकार संरक्षण मञ्च, राष्ट्रिय मानव अधिकार एलाइन्स सुदूरपश्चिम प्रदेश समितिके सल्लाहकारके रुपमे आवद्ध बटैं ।