महिला उद्यमी सुरु करलैं कोसेली घर

पहुरा समाचारदाता
धनगढी, १४ कार्तिक । नेपाली बजारमे विक्री हुइना एक ठो रफ करके स्टाइल बनाइल, पेउन्डा लगाइल, चुज करल पैन्ट पुछबो कलेसे १५ सयसे २ हजार रुप्या परठ । जौन सामान इण्डिया, चीन लगायत बाहेरके देशसे बन्के आइठ । लेडिज ओ जेन्स सामानके मोल ढाड सेक्ना मेरिक मंहगा बा ।

नेपालीपनहे स्थापित करेक लाग, नेपालमे उत्पादनमे हुइना लटा कपराहे स्थानीयमे खपट करेक धनगढीमे महिला उद्यमीहुक्रे कोसेली (सप्लायर्स) घर स्थापना करके विक्री वितरण सुरुवाट करले बटै । जहाँ सुदूरपश्चिमके महिला उद्यमीहुकनसे बनाइल सामान खुद्रा तथा थोकमे विक्री सुरु हुइल बा ।

महिलाहुक्रे छोट लगानीसे सुरुवाट करके उत्पादन करल सामानके विक्री कक्ष, सूचना केन्द्र, स्थापना करल घरेलु तथा साना उद्योग महासंघ सुदूरपश्चिम प्रदेशके अध्यक्ष रुक्मिनी देवकोटा बटैली ।

‘हम्रे कार्यक्रमके लाग चाहल खादा होए वा मायाके चिनो सब विदेशसे आइल प्रयोग करठी,’उहाँ कहली, ‘नेपाली उद्यमी महिलासे बनाइल सामानके संग्राहलय जस्टे हो कोसेली घर । मुनाफा लेनासेफे नेपाली उद्यमीसे उत्पादित बस्तु नेपालके प्रयोग करके नेपालीपनहे झल्कैना प्रयास करल हो ।

कोसेली घरमे नेपाली झण्डा, ढाका आइम सक्कु, टोपी, कोट, सुट, स्वीटर, बेटबाँसके फर्निचर,विजय सालके गिलास लगायत रहल बा ।

नवजीवन सहकारी बैंकके उदाहारण डेटी उहाँ कहली, ‘कौनोफे काम कैना ढेर गाह्रो रहठ, नवजीवन सहकारीफे पाँच जनहनसे सुरुवाट करलै, अब्बे कोई पटयाई नइसेक्ना मेरिक विकास हुइल बा, हम्रे फे कोसेली घरके विजारोपण करल हुई ।’

महिला अधिकारीकर्मी गोमा आचार्य कोसेली घरमे नेपाली बजारमे बन्ना सामानके नमूना धारल बटैली । धनगढी लगायत सुदूरपश्चिमभर उत्पादन हुइल नेपाली ब्राण्ड रहल बा, उहाँ कहली, ‘कोसेली घरमे रहल ब्राण्डसे लैजाके कोई व्यावसाय समेट करे सेक्ही । किने अडर करे पैना, उद्यमी महिला बनाइल सामानके स्टोरेज कैना कोसेली घर स्थापना करल, जहाँ नमुना प्रचारप्रसारके लाग धारल बा ।’ काल्हके दिन कोई डिलर लेके काम करे सेकी सामान, बनैना कामदार वा फेक्टरीफे सम्पर्क रहना उहाँ कहली ।

नेपालके बनल सामानके प्रवद्र्धन करेक लाग कोसेली घरके उदघाटन करल हो । कोसेली घरके उदघाटन धनगढी उपमहानगरपालिकाके नगर प्रमुख नृप बहादुर वड करले बटै । कोसेली घरके उदघाटन करटी राज्यसे करे पर्ना काम घरेलु तथा साना उद्योग महासंघसे करल उहाँ बटैलै ।