देवहरिया सामुदायिक वनके १८औ बार्षिक साधारण सभा

पहुरा समाचारदाता
धनगढी, १३ कार्तिक । धनगढी उपमहानगरपालिका–७ स्थित देवहरिया सामुदायिक वन उपभोक्ता समुहके १८ औं बार्षिक साधारणसभा तथा ९ औं महाधिवेशन उदघाटन कार्यक्रम शनिच्चरके रोज हुइल बा ।

कैलाली जिल्लामे प्रथम स्थानसे पुरस्कृत उ सामुदायिक वनके बार्षिक साधारणसभा तथा ९ औं महाधिवेशन उदघाटन कार्यक्रम डिभिजन वन कार्यालय धनगढीके प्रमुख केशव पराजुली करल रहिट । उदघाटन कार्यक्रममे उहाँ समुदायके व्यवस्थापन करेक लाग सामुदायिक वनके अवश्यकता रहल बटैलै । सामुदायिक वनके प्रशासनिक खर्च २५ प्रतिशत करे पर्ना कहटी गरिब, निमुखा, विपन्न वर्गहे सेवा डेना आवश्यक रहल उहाँ बटैलै ।

धनगढी उपमहानगरपालिका–७ के अध्यक्ष सीताराम राना सामुदायिक वन राष्ट्रके सम्पति रहल बटैलै । देवहरिया सामुदायिक वन उपभोक्ता समुहके पूर्व अध्यक्ष समेट रहल उहाँ हावाहुरीसे ढेर रुखुवा गिरल मने उपभोक्ताहुक्रे प्रयोग करे नइपाके ओस्टे सरटी रहल उहाँ बटैलै ।

सामुदायिक वन उपभोक्ता महासंघ कैलालीके अध्यक्ष डण्डीराज सुवेदी कैलाली जिल्लामे करिब ७ सय ओ धनगढी उपमहानगरपालिकामे ६० ठो सामुदायिक वन मन्से देवहरिया सामुदायिक वन उपभोक्ता समुह यी बरसके बार्षिक साधारणसभा करुइयामे परल बटैलै । गैल बरस ५०÷६० ठो केल सामुदायिक वन उपभोक्ता समुह बार्षिक साधारणसभा करल उहाँ बटैलै ।

वनऐन २०७८ परिवर्तन हुइल ओरसे स्थानीय सरकारसंग समन्वय करके जाई पर्ना ओ विपन्न समुदायके लाग आयआर्जनमे ध्यान डेना उहाँ आग्रह करलै । कार्यक्रममे पूर्व अध्यक्ष कालीराम राना, मनेहरा सामुदायिक वनके अध्यक्ष मोतीराम राना, वडा नागरिक मञ्चके भीम पडाल, शिव आधार विद्यालयके प्रअ तथा देवहरिया सामुदायिक वन उपभोक्ता समुहके पूर्व अध्यक्ष नन्दलाल राना, सरस्वती माविके प्रअ ज्ञानेन्द्र बहादुर शाह लगायत मन्तव्य व्यक्त करले रहिट ।

समुहसे १३ जनहनहे सम्मान
उहे अवसरमे देवहरिया सामुदायिक वन उपभोक्ता समुहसे पूर्व अध्यक्ष, समाजसेवीहुकन सम्मान करले बा ।
सम्मानित हुइलमे पूर्व अध्यक्ष नन्दलाल राना, पहिल अध्यक्ष गौरव राना, पूर्व अध्यक्ष कालीराम राना, पूर्वअध्यक्ष उद्धव बहादुर विष्ट, पूर्व अध्यक्ष देवबहादुर सेट्ठी, बुद्धिजिवी समाजसेवी दामोदर साउद, उपाध्यक्ष दल बहादुर शाह, नवल बहादुर सिंह, तारवारमे सहयोग करुइया जयराज जोशी, कार्यालय सचिव शारदा प्रसाद राना, अनुगमन समिति संयोजक भजन राना, सदस्य रेशमा चौधरी ओ भुवनसिंह बोहारा सम्मानित हुइल बटै ।

कार्यक्रममे उपभोक्ता समुहके सदस्य तथा राष्ट्रिय बाणिज्य बंैकके पूर्व कर्मचारी महेन्द्र पाण्डे सामुदायिक वनके आर्थिक बर्ष २०७८÷२०७९ के प्रगती प्रतिवेदन प्रस्तुत करल रहिट । उहाँ १ करोड ८ लाख ७२ हजार ८ सय ५० रुप्या बराबरके आम्दानी खर्च विवरण प्रस्तुत करल रहिट । देवहरिया सामुदायिक वन उपभोक्ता समुह २५३.८७ हेक्टर क्षेत्रफलमे रहल बा कलेसे यकर उपभोक्ता सदस्य ८ सय ६७ जाने रहल बटै । सामुदायिक वन टमान सामाजिक क्षेत्रमे सहयोगफे करले बा ।

समुहके १८ औं बार्षिक साधारणसभा तथा ९ औं महाधिवेशन उदघाटन कार्यक्रम अध्यक्ष भजन रानाके अध्यक्षतामे हुइल बा कलेसे संचालन पृथ्वी राना करले रहिट । उहे अवसरमे थारु तथा डेउडा नृत्य देखागिल रहे । लौव कार्यसमिति चयन भर आज अँटवारके रोज हुइना जनागिल बा ।