जुवातास खेल्टी रहल अवस्थामे १४ जाने पक्राउ

पहुरा समाचारदाता
धनगढी,१६ कार्तिक । मंगरके रात १२ बजेओर जुवातास खेल्टी रहल अवस्थामे १४ जाने कैलाली धनगढी उप–महानगरपालिका ७ बेली बजार स्थित कुल बहादुर चौधरीके घरसे पक्राउ परल बटै ।

जुवातास खेल्टी बटै कना गोप्य सुचनाके आधारमे जिल्ला प्रहरी कार्यालय कैलालीसे खटल प्रहरी टोली ओइनहे पक्राउ करल हो । ओइन थेनसे भारतिय रुपैंया रु. १४ हजार ७ सय २० ओ नेपाली रुप्या रु. २५ हजार ९ सय ५० ओ ३ गडडी तास समेत बरामद करके थप अनुसन्धान कार्य हुइटी रहल बा । पक्राउ परलमे कैलाली धनगढी उप–महानगरपालिका ७ बेली बैठना वर्ष ३० के ईश्वर चौधरी, वर्ष ३३ के प्रेम चौधरी, वर्ष ३५ के राम निवास चौधरी, वर्ष ३० के अम्मर राना, वर्ष २८ के दिनेश राना, वर्ष ३१ के लाल चौधरी, वर्ष ४० के कृष्ण प्रसाद पाण्डे रहल बटै ।

ओस्टेक करके वर्ष २१ के रमेश खाती क्षेत्री, वर्ष ३२ के माया राम चौधरी, वर्ष ४३ के हरी चन्द, वर्ष ३४ के नरेश चौधरी, वर्ष २८ के आदेश चौधरी, वर्ष ३१ के कुल चौधरी ओ भारत घर रहल उहे ठाउँ काम करके बैठना वर्ष २४ के अस्पाक खान रहल जिल्ला प्रहरी कार्यालय कैलाली जनैले बा ।