ट्रकके ठक्करसे एक महिलाके मृत्यु, ट्रकमे आगजानी, लम्की बजार बन्द
पहुरा समाचारदाता
धनगढी, ९ अगहन । कैलालीके लम्कीमे ट्रकके ठक्करसे एक महिलाके ज्यान गैलपाछे ट्रकमे आगजानी कैगिल बा ।
विफेक सकारे १२ बजेओर लम्कीचुहा नगरपालिका वडा नं.१ पेट्रोल पम्प लग्गे ना २ ख ९३७० नम्बरके ट्रकसे डबके टीकापुर नगरपालिका–२, बन्दीपुरके ४० वर्षिया गोमा थापाके घटना स्थलमे मुत्य हुइल बा ।
मृतक महिलाके परिचय खुल्न बाँकी रहल बा । घटनापाछे प्रहरी ट्रक चालक नवलपासीके राजकुमार चौधरीहे नियन्त्रणमे लेले बा । महिलाके मृत्यु हुूइलपाछे आक्रोशित भीड उ ट्रकमे आगजानी करल बा । आगजानीसे ट्रक ओ ओक्ने रहल सामान सक्कु जरके नष्ट हुइल बा । अवस्था तनावग्रस्त हुइलपाछे लम्की बजार बन्द हुइल बा ।
जिल्ला प्रहरी कार्यालय कैलालीके प्रमुख प्रहरी उपरिक्षक विश्वराज अधिकारीके अनुसार स्थानीयके भीडहे नियन्त्रण करेक लाग एक दर्जनसे ढेर अश्रुग्यास प्रहार करल बा । मनेफे स्थिति शान्त बने नइसेकलपाछे अब्बे उ स्थानमे घनके सुरक्षा परिचालन करल बा ।
–
