भोटेकोशी पीडितहे निसर्ग हस्पिटलके ११ लाख ११ हजार १११ रुपैया सहयोग, यी पाली तीज कार्यक्रम नैकैना
पहुरा समाचारदाता
धनगढी, १२ भदौ । भोटेकोशी बाढपीडितके राहत तथा पुनस्र्थापनाके लाग निसर्ग हस्पिटलसे ११ लाख ११ हजार १ सय ११ रुप्या सहयोग करले बा । बाढसे भारी जनधनके क्षति हुके कैयौँ परिवार पीडामे रहल बेला हस्पिटलसे अपन वार्षिक तीज कार्यक्रमसमेत नैकैना निर्णय करटी उ कार्यक्रमके लाग छुट्याइल रकम राहतके लाग समर्पण करल हो ।
निसर्ग हस्पिटलके कर्मचारी, स्टाफ नर्स, चिकित्सक तथा शेयर सदस्यसे कम्तीमे एक दिन बराबरके तलब÷सुविधा सहयोग कैना निर्णयसंगे तीज कार्यक्रमके लाग छुट्याइल रकमसमेत जोरके कुल ११ लाख ११ हजार १ सय ११ रुप्या भोटेकोशी बाढपीडितके लाग सहयोग करल हस्पिटल जनैले बा ।
हस्पिटलसे हरेक वर्ष अपन महिला कर्मचारी तथा चिकित्सकके लाग तीज कार्यक्रम आयोजना करटी आइल रहे । मने यी वर्ष भोटेकोशीमे आइल विनाशकारी बाढसे भारी जनधनके क्षति पुगाइलपाछे तीज कार्यक्रम नैकरके ओकर लाग छुट्याइल रकम पीडितके राहत तथा पुनस्र्थापनामे लगैना निर्णय करल हो ।
हस्पिटलके अध्यक्ष तीर्थराज पन्तसे विपत्तिके समयमे अपन खुसीसे पीडित परिवारके आवश्यकता महत्वपूर्ण रहल बटैलै ।
‘चाडपर्व हमार खुसीकके अवसर हुइट । मने अब्बे ढेर परिवार दुःख ओ अभावमे बटै । यैसिन अवस्थामे अपन खुसीके एक ठो हिस्सा पीडितके लाग समर्पण कैना हमार मानवीय दायित्व हो,’ अध्यक्ष पन्त कहलै ।
उहाँक अनुसार तीज कार्यक्रम नैकैना निर्णय केवल एक ठो कार्यक्रम स्थगित कैना नैहुके विपत्तिमे परल नागरिकप्रति ऐक्यबद्धता जनैना प्रयास हो ।
‘हमार करल सहयोगसे बाढसे पुगाइल सक्कु क्षतिके पूर्ति करे नैसेकी । मने पीडामे रहल परिवारहे हम्रे ओइनके साथमे बटी कना भरोसा डेहे सेक्बी,’ पन्त कहलै ।
निसर्ग हस्पिटलके कर्मचारी, स्टाफ नर्स, चिकित्सक तथा संस्थाके ओरसे संकलित ११ लाख ११ हजार १ सय ११ रुप्या नेपाल सरकारके ‘प्रधानमन्त्री दैवी प्रकोप उद्धार कोष’ अन्तर्गत ग्लोबल आइएमई बैंकमे रहल आधिकारिक बैंक खाता नं. ८८००४०१०१०००००५७८८ मे जम्मा करल हस्पिटलसे जनैले बा ।
चाडपर्वके खुसीहे कुछ समयके लाग थाती रख्टी विपत्तिमे परल परिवारके साथमे ठरहयइना आपन सामाजिक उत्तरदायित्व रहल हस्पिटलके कहाई बा ।
निसर्ग हस्पिटलसे सामाजिक उत्तरदायित्वअन्तर्गत टमान मानवीय तथा सामाजिक सहयोगके कार्यक्रम सञ्चालन करटी आइल बा । हस्पिटलके अनुसार समाजप्रतिके जिम्मेवारीहे केवल स्वास्थ्य सेवा प्रदान कैना कार्यमे सीमित नैधारके विपत्तिके समयमे सहयोग, सामाजिक अभियानमे सहभागिता तथा समुदायके आवश्यकता अनुसार टमान सहयोगके कार्यक्रमहे निरन्तरता डेटी आइल बा ।
