विकट हौसलपुरके लाग झोलुङे पुल निर्माण कार्य सुरु
पहुरा समाचारदाता
हसुलिया, १८ अगहन । कैलालीके विकटमे रहल हौसलपुर गाउँके स्थानीयके लाग झोलुङगे पुल निर्माण कार्य सुरु हुइल बा ।
संघीय सरकारके आयोजना अन्तर्गत मोहना लडियामे झोलुङे पुल निर्माण करे लागल हो । निर्माणके कार्य शनिच्चरसे सुरु करल बा ।
कैलारी गाउँपालिका–७ स्थित मोहना लडिया पार रहल हौसलपुर गाउँ नेपाल–भारत सीमा लग्गे परठ । हौसलपुर गाउँवासी ओ उ आसपास गाउँके स्थानीयके समस्याहे मध्यनजर करके संघीय सरकारसंग झोलुङे पुल माग करल कैलारी गाउँपालिकाके प्रवक्तासमेत रहल वडा नम्बर ७ के वडा अध्यक्ष कमलप्रसाद चौधरीसे बटैले । उहाँ पुल निर्माण करलपाछे हौसलपुर गाउँके स्थानीयहे केल नइहुके भुईयाँफाँटा, रामपुर, तिघरी, बसन्ता, रतनपुर लगायतके स्थानीयहेफे ओहोरदोहोर कैना सहज हुइना जनैलै ।
संघीय सरकारके ७५ लाख रुप्या लगानीमे उ ठाउँमे झोलुङे पुल बने लागल हो । लडियामे पुल नइहुइल कारण हौसलपुरवासी समस्या भोग्न करल बटै । ओइने अधिकाङ्श समय लाउके भरमे ओहोरदोहोर करटी आइल बा ।
स्थानीय सरकार आइलपाछे भर उ गाउँमे परिवर्तनके सुरुवात हुइल बा । विगतमे राज्यके नजरमे नइपरल उपेक्षित, उत्पीडित हौसलपुरवासीसे अत्यावश्यकीय सेवा सुविधा सहज रुपमे पैटी रहल वडा अध्यक्ष चौधरी बटैलै । उ गाउँके विकासके लाग कैलारी गाउँपालिकासे विशेष अनुदान कार्यक्रमफे सञ्चालन करटी आइल बा ।
विगतमे भारतमे आश्रित उ गाउँवासी अब्बे बिजुली बारे पैले बटै । गैल वर्ष गाउँपालिकासे नेपाली भाषाके तालिम सञ्चालन करल रहे । ओकरपाछे उ गाउँवासी ठोरठोर नेपालीफे बोरे लागल बटै ।
