हरैया थारु सङ्ग्रहालयके राज्यमन्त्री चौधरीसे उद्घाटन
पहुरा समाचारदाता
धनगढी, १८ चैत । कैलालीके गोदावरी नगरपालिका–७, हरैयामे निर्माण हुइल थारु सङ्ग्रहालयके शुकके उद्घाटन करल बा ।
सुदूरपश्चिम प्रदेशके भौतिक योजना तथा पूर्वाधार राज्यमन्त्री चुनकुमारी चौधरी एक कार्यक्रमके बीच सङ्ग्रहालयके उद्घाटन करल हुइटी । थारु समुदायके संस्कृतिके जगेर्ना कैना उद्देश्यसे उ ठाउँमे सङ्ग्रहालय निर्माण करल हो ।
सङ्ग्रहालयके उद्घाटन कैटी राज्यमन्त्री चौधरी सक्कु जातजातिके संस्कृति संरक्षण कैना आवश्यक रहल बटैली । उहाँ अपने सक्कु जातजातिके संस्कृति जगेर्नाके लाग सहयोग कैटी आइल उल्लेख करली ।
‘लोप हुइटी गैल सक्कु जातजातिके संस्कृति संरक्षण कैना आवश्यक रहल बा’, राज्यमन्त्री चौधरी कहली–‘सक्कु जातजातिके संस्कृति जगेर्नाके लाग मै सहयोग कैटी आइल बाटु ।’
स्थानीय पूर्वाधार विकास कार्यक्रम अन्तर्गत २० लाख रुपैयाँ लागतमे उ सङ्ग्रहालय निर्माण हुइल हो । समितिके अध्यक्ष भीम चौधरीसे सङ्ग्रहालयसे थारु समुदायके मौलिक संस्कृति संरक्षणमे टेवा पुग्ना बटैलै ।‘हमार चालचलन, लवाईखवाई भेषभूषा तीव्र रुपमा हेरैटी गैल बा’, उहाँ कहलै । सङ्ग्रहालय हुइलपाछे हम्रे ओइसीन चिजके संरक्षण कैना सहयोग मिली ।’
हरैयामे थारु सङ्ग्रहालय बनलपाछे उ क्षेत्रके थारु समुदायहे साँस्कृतिक सम्मान मिल्ना बताइल बा ।
