बाँकी काम पूर्णताके लाग मोर उम्मेदवारी : बम

स्थानीय तहके निर्वाचन लच्क्याइल बा । घोडाघोडी नगरपालिका वडा नम्बर १० के निर्वतमान वडाध्यक्ष भीमबहादुर बम फेनसे नेकपा (एकीकृत समाजवादी) पार्टीसे टिकट पैले बटैं । आसन्न वैशाख ३० गतेके निर्वाचनबारे पाँच दलीय गठबन्धनके साझा उम्मेदवार बमसँग पहुरा थारु दैनिक सहकर्मी प्रेमलाल चौधरीके करल बाटचिटके संक्षिप्त अंशः

अप्नेक फेनसे उम्मेदवारी काहे ?

– संविधानके रक्षा कैटि जनताके न्यूनतम आधारभूत आवश्यकता पूरा करेक लाग मोर फेनसे उम्मेदवारी आवश्यक परल हो । यी वडामे रहल जनताके गाँस, वास, कपासके आवश्यकताहे मध्यनजर कैके मै अगामी दिनमे फेन काम करटि आइल बटु । कुछ काम करना बाँकी बा । ओहे अपन करे नैसेकल बाँकी कामके पूर्णताके लाग मै फेनसे उम्मेदवारी डेले बटु ।

जीतके आधार का हो टे ?

– जनता मोर पाँच वर्षके काम डेख्सेक्ले बा । वडामे मोर काम प्रति जनता सन्तुष्ट ओ खुसी बटै । जनता महिन इमान्दारिताके साथ काम करटि डेख्ले बा । मै जनताके काम सरकारके सेवासुविधा बिना करके डेखैले बटु । टबेमारे फेन महिन जनताहुक्रे विश्वास करले बटै । फेरसे यिहे मोर जिटना आधार हो ।

नागरिकहे सवल बनाइक लाग अप्नेक कार्यक्रम का बा ?

– मोर पहिल प्रतिवद्धता कलेक भूमिहीन जनताके आधारभूत आवश्यकता पूरा करना हो । जेकर अपन नाउमे जग्गा नैहो उहाँहुकनहे मै लालपूर्जाके लाग पहल करम । ओस्टेक, जनताके आर्थिक उन्नतिके लाग कृषि कार्यक्रम नान्के कृषि सुधारमे जोड डेम । वडा तथा सुव्यवस्थित सुशासनके लाग प्रयास करजाइ । ओस्टेक, शिक्षा, स्वास्थ्य, स्वरोजगार कार्यक्रमके सुरुवातके लाग काम करना मोर प्रतिवद्धता हो ।

पाँच वर्षे कार्यकालमे पहुँचके आधारमे विकास हुइल कना जनगुनासो बा । यकर कारण का हो ?

– अइसिन बाट नैहो । हम्रे पहिल प्राथमिकताके आधारमे विकास योजना लागू करलि । प्राथमिकताके आधारमे काम करेबेर टमान ठाउँमे हम्रे पुगे नैसेक्लि यी सहि बाट हो । टबेमारे हम्रे अपन करे नैसेकल ठाउँमे पुगेक लाग फेनसे उम्मेदवारी आवश्यक मानके मै फेन आइल बटु । काहेकि महिन पटा बा कहाँ कहाँ काम हुइल ओ कहाँ आब काम करे परि । हम्रे वडा कार्यालय, स्वास्थ्य केन्द्र, क्याम्पसके विकास कौनो फेन पहुँचके आधारमे हुइल नैहो यी सब जनताके आवश्यकता हो । अस्टेक बजारमे आवश्यक रहल कालोपत्रे, ढल निकासके काम फेन करलि ।

लागूऔषध नियन्त्रण करना अप्नेक का योगदान रहि ?

– लागूऔषध नियन्त्रणके लाग टे सब्से पहिले विद्यालयस्तरसे जनचेतना जगैना आवश्यक बा । यकर नियन्त्रणके लाग प्रशासन, प्रहरी, सरोकारवाला सबजे लागे परना बा । अब्बे लावा पुस्ताहुकनहे सचेत करैटि दुव्र्यसनसे मुक्त करना कार्यक्रम नन्ना पहल करब ।

अन्त्यमे कुछ बा कि ?

– सक्कु वडावासी डाडुभैया, दिदीबहिनियनहे साझा उम्मेदवार, अनुभवी, निष्पक्ष ओ भ्रटाचाररहित उम्मेदवार रहल ओरसे महिने मतदान करडेके विजयी कैडेना अपिल ओ अनुरोध करटु ।