सरकार रहल अनुभूति करैमः स्वाँर

कैलाली घोडाघोडी वडा नम्बर १० के वडाध्यक्षके लाग नेपाली काँग्रेससे फेन विजयराज स्वाँर टिकट पैले बटैं । उहाँ विक्रम् संवत् २०७४ सालके स्थानीय निर्वाचनमे नेकपा (एकीकृत समाजवादी) पार्टीके भीमबहादुर बमसे कुछ मतान्तरले पराजय बेहोरले रहैं । आसन्न वैशाख ३० गते हुइना स्थानीय निर्वाचनमे घोडाघोडी वडा नम्बर १० के वडाध्यक्षके बलगर उम्मेदवारके रूपमे फेनसे मैदानमे उत्रल स्वाँरसँग पहुरा थारु दैनिक सहकर्मी प्रेमलाल चौधरीके करल बाटचिटके संक्षिप्त अंशः

१. अप्ने जीट्ना कारण का हो ?

– बिगत पाँच वर्षमे जनता स्थानीय सरकारके अनुभूति करे नैपाइल । आघे आइल जनप्रतिनिधिहुक्रे अपन काम, कर्तव्य पूरा करे सेकल कना जनता महसुस नैकरलैं । मने, मै स्थानीय जनप्रतिनिधि बनम कलेसे जनताहे समतामूलक आधारमे समोटम । जनता महिनमे विश्वास करले बा । यिहे मोर जीतके आधार हो ।

२. अप्नेहे जनता मत काहे डरना ? वडाहे का–का क्षेत्रमे सवल बनैना कार्यक्रम बा ?

– मै यी पाँच वर्षमे टमान काम करम कना योजना बनैले बटु । टबफेन पहिल काम कलेक जेकर कुछ ढुर जग्गा बा मने लालपुर्जा नैहो ओ भूमिहिनहुकनहे जग्गाके व्यवस्थाके पहल करना ओ थारु समुदायमे पुर्खौसे चलनमे रहल भल्मन्सा प्रथाहे कानूनी मान्यता डेना पहल करना हो । ओस्टेक, वडावासीहे स्वच्छ पिना पानी, बजार क्षेत्रमे सार्वजनिक शौचालय, व्यवस्थित पार्किंग बनैना योजना बा । वडामे रहल सामुदायिक विद्यालयमे भौतिक पूर्वाधार सुधारके साथे गुणस्तरीय शिक्षाके कार्यक्रम, वडा भित्तर रहल सांस्कृतिक सम्पदाके संरक्षण ओ सम्वद्र्धन, धार्मिक स्थल, पर्यटकीय स्थानके प्रवद्र्धन, छाडाचौपायाहे व्यावसायिक रूपमे दीर्घकालीन व्यवस्थापन करना कार्यक्रम बा । थारु, आदिवासी जनजाति, दलित, अपांगता रहल व्यक्ति, सीमान्तकृत समुदाय, महिला सशक्तीकरणमे जोडके साथे आर्थिक आयआर्जनके सुधारके लाग कृषि, प्राविधिक तालिमके व्यवस्था करना योजना बा ।

ओस्टेक, सामाजिक विकृतिके रूपमे रहल लागूऔषध दुव्र्यसनीहे न्यूनीकरण करेक लाग वडामे रहल युवा क्लवसे समन्वय कैके समस्याके उचित समाधान कैके स्वस्थ, तन्दरुस्त युवा बनैनामे जोड डेजाइ । युवाहुकनहे खेलकुदमे सहयोग करना फेन योजना बा । दीर्घरोगी, जटिल रोगके समस्याहे मध्यजनर कैके उपचारमे सहयोग कैना सम्बन्धित निकायसँग समन्वयके पहल कैना योजना बा ।

३. फेनसे उम्मेदवारी डेना आवश्यकता रहे ?

– अवश्य फेन आवश्यक रहे । काहेकि यी वडामे विकास चाहल बा । गरिबहुकनहे हक अधिकार चाहल बा । हमार वडामे टमान जे अपन लर्कनहे शिक्षा डेहे सेकट नैहुइट । अपन परिवारहे मजा स्वास्थ्योपचार डेहे नैसेकल मै प्रत्यक्ष डेख्ले बटु, भोग्ले बटु । उहाँहुकनके अइसिन अवस्थाके सुधार करना मोर प्राथमिकता हो । मै लम्मा समयसे शिक्षा क्षेत्रमे आवद्ध रहल ओरसे फेन शिक्षाके क्षेत्रमे काम करे सेकम । ओस्टक यातायातके क्षेत्रमे फेन मोर योगदान बा । कोइ उपचारके लाग डुर जैना बा मने भाडाके कारण जाइ नैसेकलहो कलेसे निःशुल्क यातायातके व्यवस्था फेन करले बटु ओ अइसिन अप्ने करे सेक्ना सहयोग मै करटि आइल बटु, अइना दिनमे फेन करम, जीटु चाहे नाजीटु । जनप्रतिनिधि बनम टे नैकरना बाटे नैहो ।

४. अन्त्यमे कुछ छुटल बा कि ?

– मोर सुनल अनुसार वडाध्यक्षहे तलब, भत्ताके व्यवस्था रहठ हुँ । मने, मै उ तलब, भत्ता नैलेम । उ वडाध्यक्षक नाउसे अइना सेवासुविधाहे मै सुशासित ओ मर्यादित रूपमे सामाजिक काममे खर्च करम । वडाध्यक्षके नाउमे आइल रकमहे मै लागूऔषध दुव्र्यसनीसे युवाहुकन बचाइक लाग कहाँ कैसिक खर्च करेपरि ओहे अनुसार आघे बह्रम ओ अन्य आवश्वयक सामाजिक क्षेत्र सुधारके लाग पहल करम । ओ, अन्त्यमे वडावासीहुकनहे यहाँक विकासके लाग, शिक्षा, स्वास्थ्य, रोजगार, समाज सुधारके लाग महिनहे जिटाइक लाग मतदान कैके सहयोग करना हार्दिक अनुरोध करटु ।