निर्धक्कसे भोट डारी रोजल प्रतिनिधि छानी

जनतासे प्रतिनिधि रोजे पैना लोकतान्त्रिक हक अधिकारहे सुनिश्चित कैना यिहे वैशाख ३० गते स्थानीय तह सदस्यके आवधिक निर्वाचन हुइना बा । स्थानीय तह निर्वाचनमे भाग लेना कहिके दर्ता हुइल ७९ ठो राजनीतिक दल मन्से जम्मा ६५ ठो राजनीतिक दल चुनावी प्रतिस्पर्धामे रहल बटै । ५५ हजार ६९८ जाने महिला ओ ८९ हजार ३ सय १३ जाने पुरुष करके टमान राजनीतिक दल ओ स्वतन्त्र उम्मेदवार समेत जम्मा १ लाख ४५ हजार ११ जाने चुनावी प्रतिस्पर्धामे रहल बटै । निर्वाचनमे मतदातासे शान्तिपूर्ण वातावरणमे निर्वाध रुपसे मतदान कैना अधिकारके सुनिश्चितताके लाग शान्ति सुरक्षाके कडा व्यवस्था मिलैना नेपाल सरकार लगायत सम्बन्धित स्थानीय प्रशासनहे आवश्यक निर्देशन डे सेकल ओ उ बमोजिम निर्वाचन सुरक्षा व्यवस्थाहे प्रभावकारी बनाइल बा ।

पहिल बार मतदाता नामावलीमे नाम दर्ता कराइल नयाँ मतदाता ओ परिचयपत्र हेराइल कहिके सम्बन्धित जिल्ला निर्वाचन कार्यालयमे निवेदन डेहल मतदाताहुकनहे वैशाख २८ गतेसे सम्बन्धित मतदानस्थलसे मतदाता परिचयपत्र वितरण हुइटी बा । निर्वाचन आचार संहिताके पूर्ण कार्यान्वयनके लाग आयोगसे उल्लंघनके घट्नामे तत्काल कारवाही करे सेक्ना अधिकार समेत डेके १९ ठो उच्चस्तरीय टोली तुलनात्मक रुपमे संवेदनशील ठानल टमान स्थानमे परिचालन करल बा । अब्बे मौन अवधि सुरु हुइल ओरसे यी अवधिमे राजनीतिक दलके पदाधिकारी वा उम्मेदवार तथा दलके भातृ संगठन वा सम्बन्धित व्यक्तिसे निर्वाचन प्रचार प्रसार लगायत कौनो फे मेरिक छलफल, अन्तरक्रिया, सभा सम्मेलन, कार्यशाला गोष्ठी आदि करे नइडेना, राजनीतिक दल वा उम्मेदवारके प्रचार प्रसारके सामग्री राखल हुइलेसेफे तत्काल हटाई पर्ना, कौनोफे विधि, प्रक्रिया वा माध्यमसे मत मग्न वा निर्वाचन प्रचार प्रसार करे नइहुइना, सामाजिक सञ्जाल, अनलाईन, छापा वा अन्य कौनो माध्यमसे राजनीतिक दल वा उम्मेदवारके पक्ष वा विपक्षमे कौनो सन्देश, सूचना वा प्रचार प्रसारके सामग्री पोष्ट वा शेयर कैना, कराई नइहुइना ओरसे यी बमोजिम आचरण पालन करडेना सम्बन्धित सक्कुहुनमे आयोग आग्रह बा ।

निर्वाचनमे शान्ति सुरक्षाके स्थिति कायम रख्न मौन अवधि शुरु हुइलपाछे मतदानके कार्य सम्पन्न नइहुइटसमके लाग स्थानीय प्रशासनके समन्वयमे तोकल क्षेत्रमे मादक पदार्थके बिक्री वितरण ओ सेवन कैना सख्त निषेध करल बा । अप्की बार निर्वाचन आयोगसे मतदाता शिक्षा नइकरल ओरसे मतफे बदर हुई सेक्ना सम्भावना बा । वालिग मताधिकारके आधारमे संविधानसे सक्कु नेपाली जनताहे निर्वाचनमे सहभागी हुइना अधिकार डेहल बा । यी अधिकारके प्रयोग कैना यिहे वैशाख ३० गते हुइना स्थानीय तह सदस्यके निर्वाचनमे केक्रो डर, धाकधम्की ओ त्रास नइमानके निर्धक्क हुके अपने रोजल प्रतिनिधिहे मतदान करी ।