थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०५ असार २६४८, मंगर ]
[ वि.सं ५ असार २०८१, मंगलवार ]
[ 18 Jun 2024, Tuesday ]

गुर्गी सिचाई बँधुवा बन्ना आशा

पहुरा | १२ पुष २०७९, मंगलवार
गुर्गी सिचाई बँधुवा बन्ना आशा

संस्थाके नवनिर्वाचित कार्यसमितिके सपथ ग्रहण तथा प्रमाणपत्र वितरण

पहुरा समाचारदाता
हसुलिया, १२ पुस
। कैलाली जिल्ला कैलारी गाउँपालिका–२ मे रहल गुर्गी सिचाई बँधुवा करिब ३० बरसपाछे पुनःनिर्माण हुइना आशा पलाइल एक कार्यक्रमके सहभागीहुक्रे बटैले बटै ।

गुर्गी बाँध सिचाई जल उपभोक्ता संस्थाके नवनिर्वाचित कार्यसमितिके सपथ ग्रहण तथा प्रमाणपत्र वितरण ओ बधाई कार्यक्रममे सहभागि उ बाट बटाइल रहिट । उ कार्यक्रमके वडका पहुना रहल कैलारी गाउँपालिकाके अध्यक्ष राजसमझ चौधरी गुर्गी बाँँधुवाके उपभोक्ता कैलारी–१, ५ ओ ७ के वडाबासी रहल बटैलै । उहाँ कहलै, पहिले यहाँक किसान जैविक बाँध बनाके पानीके उपभोग करिट, पाछे पक्की बाँध बनाइल मने टिके नइसेक्के भत्कल रहे । भत्कल बाँध करिब ३० दशकपाछे फेरसे बन्ना आशा पलाइल बा ।

कैलारी गाउँपालिकाके कटैनी लडियामे बनल टेढी सिचाई बाँधसे ढेर किसान लाभान्वित बटै । स्थानीय सरकारसे गुर्गी बाँध निर्माणके लाग आवाज उठैटी आइल रहे । प्रदेश सररकारसे यकर लाग करल बजेट विनियोजनासे आव सक्कु समन्वय करके आघे बह्रना जरुरी बा, अध्यक्ष कहलै ।

स्थानीय सरकार लग्गेक सरकार रहल कारण विकास निर्माणके आयोजनामे सदा हातेमालो करके आघे बह्रना उहाँ बटैलै । गाउँपालिकासे कृषिसंगे शिक्षा, स्वास्थ्यमे ढेर ध्यान डेले बा । यहाँ किसानहुकनके ढेर समस्या बा । लगानी अनुसारके उत्पादन नइहुइल गाउँपालिका अध्यक्ष राजसमझ बटैलै ।

संविधानसभा सदस्य तथा निवर्तमान प्रदेशसभा सदस्य विरमान चौधरी गुर्गी बाँध सिचाई आयोजना निर्माणके लाग ढेर सर्घष करके विनियोजना हुइल बटैलै । उहाँ कहलै, यी आयोजनाहे संघ, प्रदेश ओ अर्थमन्त्रालयफे असफल आयोजना कहिके छोरल रहे । अथक प्रयासके बाबजुट यकर निर्माणके लाग ६ करोड बजेट विनियोजना हुइल बा । कैलारी गाउँपालिकामे सिचाई आयोजनाके लाग ७ करोड ६५ लाख परल बा ।’

सामाजिक कार्यमे राजनिति नइकरके सक्कु जाने समन्वय करके आघे बह्रना उहाँ आग्रह करलै । निवर्तमान प्रदेशसभा सदस्य चौधरी कहलै, ‘छोटमे मै फे गुर्गी बाँधुवामे कुलाही करनु, किसानके पीडा मही पत्ता बा । संघ ओ प्रदेश सरकारमे संघर्ष करके बल्जफटी बजेट विनियोजना हुइल बा । आब यकर निर्माण करके किसानहुकन सिचाईके सुविधा पुगैना जरुरी बा ।’

कार्यक्रममे सिचाई डिभिजन कार्यालयके प्रमुख डम्मर धिताल गुर्गी गुर्गी बाँध सिचाई आयोजना निर्माण हुइलेसे १९ सय हेक्टर जमिनमे सिचाई उपलब्ध हुइना बटैलै । उहाँ कहलै, यी सिचाई आयोजनाके लाग बजेट विनियोजन हुसेकल ओरसे काम हाली बह्रना बटैलै ।

कैलारी गाउँपालिका–५ के वडा अध्यक्ष विष्णुप्रसाद चौधरी गुर्गी सिचाई आयोजना निर्माण हुइलेसे यहाँके किसान मौसमी÷वेमौसमी खेती करले सेक्ना बटैलै ।

टेढी सिचाई आयोजनाके अध्यक्ष ओमकार महतों कटैनी लडियामे टेढी ओ गुर्गी बाँध रहल ओरसे यी दुनु बँन्धुवा एक दुसरके पुरकके रुपमे रहना जरुरी रहल बटैलै । उहाँ भल्मसाहुकनसेफे सल्लाह लेके आघे बह्रना लौव समितिहे सुझाव डेलै ।

सुर्मी बाँध सिचाई आयोजजाके अध्यक्ष होमबहादुर गुरुङ गुर्गी बाँध भत्कल नम्मा समयपाछे एकबार फेरसे बन्ना आशा पलाइल बटैलै । कैलारीमे रहल सक्कु बाँध एक दुसरके परिपुरकके रुपमे रहल बा । गुर्गी बाँध निर्माणके लाग सक्कु जाने समन्वय करके आघे बह्रना जरुरी रहल उहाँ बटैलै ।

गुर्गी बाँध सिचाई जल उपभोक्ता संस्थाके निवर्तमान अध्यक्ष जयपति चौधरीके अध्यक्षतामे हुइल कार्यक्रममे लौवा कार्यसमितिहे सिचाई डिभिजन कार्यालयके प्रमुख डम्मर धिताल सपथ ग्रहण करैले रहिट ।

यिहे पुष ९ गते गुर्गी बाँध सिचाई जल उपभोक्ता संस्थाके लौवा कार्यसमितिके निर्वाचन हुइल रहे । जेकर अध्यक्षमे भीष्मराज चौधरी निर्वाचित हुइल रहिट । समितिके उपाध्यक्षमे तिर्थकुमारी चौधरी, कोषाध्यक्षमे अमरानी चौधरी, सचिव पदमे दयाशंकर चौधरी, सहसचिव पदमे रामप्रसाद चौधरी विजयी हुइल रहिट । सदस्यमे चरणलाल चौधरी, ओमप्रकाश भुल, शंकर प्रसाद चौधरी, शारदादेवी कामी, इन्द्रबहादुर डगौरा, ओ लक्ष्मीदेवी कठरिया विजयी हुइल रहिट ।

ओइनहे कार्यक्रममे वडका पहुना कैलारी गाउँपालिकाके अध्यक्ष राजसमझ चौधरी, विशिष्ट पहुना संविधानसभा सदस्य तथा निवर्तमान प्रदेशसभा सदस्य विरमान चौधरी, सिचाई डिभिजन कार्यालयके प्रमुख डम्मर धिताल बधाई तथा प्रमाणपत्र वितरण करल रहिट ।

कार्यक्रमके संचालन गुर्गी बाँध सिचाई जल उपभोक्ता संस्थाके निवर्तमान सचिव लक्ष्मण प्रसाद चौधरी ओ स्वागत सहसचिव बजारीराम चौधरी करले रहिट । कार्यक्रममे नेपाली काँग्रेसके प्रतिनिधि प्रेमबहादुर चौधरी, माओवादी केन्द्रके प्रतिनिधि प्रशु चौधरी, समिति निवर्तमान कार्यसमितिके पदाधिकारी तथा कार्यसमिति सदस्यहुकनके सहभागिता रहे ।

जनाअवजको टिप्पणीहरू