बाल विवाह अभिन व्याप्त बा

पहुरा समाचारदाता
धनगढी, १० बैशाख । नेपाल सरकारके नारा बा, विहेवारी २० बर्ष पारी, मने बाल विवाह अभिन व्यापक रुपमे हुइटी रहल एक कार्यक्रमके सहभागीहुक्रे बटैले बटै ।

विफेक रोज धनगढीमे जस्ट राइटस फर चिल्डे«नके आर्थिक सहयोगमे व्याकवार्ड सोसाइटी एजुकेशन (वेस) के आयोजनामे बालबालिका न्यायमे पहँुच परियोजना अन्र्तगत विफेक रोज धनगढीमे बालबालिकामे लगानी, सुनिश्चित भविष्यके थालनी कना मूल नाराके साथ बाल विवाह, यौन दुव्र्यहार तथा बालबालिका ओसार पसार रोकथाम ओ बालअधिकार सम्बन्धी कार्यशाला गोष्ठीमे उ बाट बत्वागिल रहे ।

व्याकवार्ड सोसाइटी एजुकेशन (वेस) के केन्द्रीय कार्यवाहक अध्यक्ष यज्ञराज चौधरीके अध्यक्षतामे हुइल कार्यक्रममे जिल्ला समन्वय समिति कैलालीके प्रमुख टिकाकुमारी चौधरी भुलके प्रमुख अतिथि रहल रहिट ।

कार्यक्रममे सम्बोधन करटी उहाँ थारु समुदायके बालबालिका छोटही उमेरसे औपाचारिक रुपमे भोज नैकरलेसेफे लिभिङ टुगेदरमे बैठना परिपाटी डेखल बटैली । सामाजिक संजालके प्रयोगसे बालबालिका एक दुसरविच चिनाजान हुइना, कमुनिकेशन बह्रके ढेउर बालबालिका छोटहीहे अपनही बालविवाह कैना करल उहाँ बटैली ।

अभिभावकहुक्रे आपन लर्कनहे छाडा छोरल कारण ओइने झन मौका पैना करल बटै । बालविवाह रोकेक लाग बाल क्लवमार्फत टमान कार्यक्रम संचालन जरुरी बा ।

कैलाली कञ्चनपुर भारतिय सिमा नाकासे जोरल कारण ओसार पसारके घटना बह्रल बा । ओसारपसार हुइल बालिकाहुकनहे यौन पेशासंगे शरिरके महत्वपू्र्ण अंग बेच्न करल उहाँ बटैली ।

नैतिक शिक्षाक कमीसे बालिकाहुक्रे अपने समाज परिवारसे सुरक्षित नैरना, यौन शोषणके शिकार बनलफे उहा बटैली ।

धनगढी उपमहानगरपालिकाके नगर उपप्रमुख कन्दकलाकुमारी राना बालविवाहके मुद्दा तिनु सरकार मिल्के न्यूनिकरण कैना जरुरी रहल बटैली । उहाँ कहली, बालविवाह हुइटी बा कलेसे एकल प्रयाससे रोके नैसेक्जैना बल्की सकारात्मक सोचकेसाथ समन्यवय करके आघे बह्रना जरुरी बा ।

कैलालीके ठाउँक उदाहरण डेटी उहाँ कहली, यिहे अइना १३ गते हुइना एक ठो भोज तय हुइल रहे । भोजहा तयारी, नेउटा बँटना कामफे हुसेकल रहे । मने ओइनके भोज कैना उमेर नैपुगलपाछे उ भोज रद्द करुवागिल बा ।

उहाँ कहली, बालविवाह आर्थिक अवस्था कम्जोर हुइल परिवारमे पह्रे नैसेक्के कहठै, मने शिक्षित ओ आर्थिक रुपमे बल्गर रहल परिवारमेफे अपनही भागके बालविवाह हुइना करल बा । बालविवाह थारु समुदाय ओ दलित समुदायमे ढेर उहाँ बटैली ।

बालविवाह ओ यौन शोषणमे परल महिलाहुक्रनसे जन्मल बच्चा झाँडीमे फेकल, सडकमे छोरल घटना अइटी रहठ । उहीहे बच्चाहुकनके जलम दर्तामे समस्या आइल उहाँ बटैली ।

जिल्ला सरकारी वकिल कार्यालयके कविराज शर्मा पहिले बाहुन समुदायमे बालविवाह व्याप्त रहल मने अब्बे दलित समुदायमे ढेर डेखल बटैलै ।

नेपालमे १३ हजार बालिकाबालिका सम्बन्धी मुद्दा परलमे करिव ५० प्रतिशत केल्ह फछयौट हुइल बटैलै ।

उहाँ कहलै, सामाजिक संजालके कारण बालबालिका नियन्त्रणसे बाहेर जैटी रहल बटै । सामाजिक संजालके प्रयोगसे बालबालिका ढेर विगरल कहटी सामाजिक संजालके प्रयोग ओ मोवाइल चलैना बालबालिकाके उमेर तोक्ना जरुरी रहल बा । जौन विश्वके कौनो कौनो ठाउँमे अभ्यासमे रहल बा ।

बालबालिका हो कहटी हम्रे कौनोफे चिज सामान्य रुपमे लेहल लेना करल बटैलै । उहाँ एक जाने १५ बरसके बालिका गैल कुवाँरमे भागके भोज करल ओ यिहे चैतमे हत्या करल घटना सुनैटी, बालविवाहके कारण ढेर बालबालिकाके भविष्य अन्धकारमे धकेल्टी गैल बटैलै ।

कैलाली बहुमुखी क्याम्पसके कानून संकाय प्राध्यापक तथा अधिवक्ता पदमबहादुर पाल बालविवाह करुइयाके ढेर जैसिन सम्बन्ध विच्छेद करल तथ्याङकमे डेखल बटैलै । बालविवाह न्यूनिकरण करेक लाग आब ऐकेडेमिक बाट करके केल्ह नाही व्यवहारिक रुपमे ध्यान डेहे पर्ना बटैलै ।

बाल संजालके सदस्य शिवानी बम बालविवाह भिटरेभिटर हुइटी रहल मने बाहेर कम अइना करल बटैली । बालविवाह न्यूनिकरणके लाग सचेतना जरुरी रहल ओ बालबालिकाके करल कार्यक्रममे ढेरसे ढेर बालबालिकाहुकनहे सहभागी करैना उहाँ आग्रह करली ।

वेसके कार्यक्रम निर्देशक पिङकी डाँगी बाल संरक्षण, बाल अधिकार प्रभावकारी ढंगसे आघे बह्राइक लाग यी कार्यक्रमके आयोजना करल बटैली ।

वेसके अगुवाईमे कमैया मुक्तीके अभियान संचालन करल ओ पाछे कमैया मुक्तीफे हुइल उहाँ बटैली । उहाँ बालबालिकाके न्यायमे पहुँच परियोजना लुम्विनी, कर्णाली ओ सुदूरपश्चिम प्रदेशमे लागु हुइल बटैली ।

कार्यक्रममे राष्ट्रिय बाल अधिकार परिषदके अधिकृत तथा सूचना अधिकारी रामबहादर चन्द बालविवाह अन्त्यके लाग कानूनी व्यवस्था, राष्ट्रिय रणनीति तथा कार्यान्वयन कार्ययोजनामे २०८२ मेरहल प्रावधान ओ स्थानीय तहके जिम्मेवारी तथा भूमिकाबारे प्रस्तुतीकरण ओ छलफल करैले रहिट ।

ओस्टेक करके बालविवाह, बाल यौन दुव्र्यवहार, बालश्रम तथा बालबालिका ओसार पसारके न्यूनिकरणके लाग आवश्यक हुइना नीतिगत ओ संस्थागत व्यवस्था, अइना बजेट तथा कार्यक्रम तर्जुमा सम्बन्धी छलफल ओ मार्गचित्र निर्धारणबारे छलफल कराइल रहे । जेम्ने स्थानीय तहके नगर उपप्रमुख, उपाध्यक्षहुक्रे, बाल कल्याण अधिकारीहुक्रे आपन पालिकामे रहल समस्या सुनाइल रहिट ।

कार्यक्रममे सन २०३० सम्म बालविवाह अन्त्यके लाग विस्तृत स्थानीय कार्ययोजना निर्माण तथा प्रस्तुतीकरण कैगिल रहे । कार्यक्रममे स्वागत मन्तव्य वेस कैलालीके अध्यक्ष राम प्रसाद चौधरी करल रहिट । कार्यक्रमके संचालन वेसके कर्णाली प्रदेश कार्यक्रम अधिकृत जिवराज लम्साल करल रहिट ।

कार्यक्रममे कैलाली कञ्चनपुरके स्थानीय तहके उप प्रमुखहुक्रे, सरकारी वकिल कार्यालय, सामाजिक विकास मन्त्रालय सामाजिक विकास महाशाखा, महिला, बालबालिका तथा जेष्ठ नागरिक सहायता कक्ष कैलाली, कञ्चनपुरके प्रतिनिधि, जिल्ला प्रहरी कार्यालयके प्रतिनिधिकेफे सहभागिता रहे ।