हक अधिकारके लाग संगठित हुइना आवश्यकः थारु अगुवा
पहुरा समाचारदाता
धनगढी, १६ पुस । थारुहुक्रनके हक अधिकार तथा पहिचानके लाग संगठित ओ रणनीतिक रूपमे आघे बह्रे पर्र्ना थारु अगुवाहुक्रे बटैले बटैं ।
शनिन्नरके धनगढीमे हुइल एक कार्यक्रमके सहभागी थारु अगुवाहुक्रे थारु समुदायके हक अधिकार तथा पहिचानके लाग एकजुट होके रणनीतिक रुपमे आघे बह्रे पर्ना बटाइल हुइट ।
अधिवक्ता जोहारीलाल चौधरी थारु समुदायके हक अधिकारके लाग उठाइ पर्ना विषयवस्तु ढेर रहल बटैलै । उहाँ थारु समुदायके हक अधिकार, पहिचान लगायत टमान ठाउँमे प्रतिनिधित्वके सवालके विषय ढेर रहल बटाइल रहिट ।
अधिवक्ता चौधरी राजनीतिक सवालमे चेतना ओ अग्रसरता बह्रलेसे फेन आभिन थारु समुदाय आपन माग मुद्दा हक अधिकार ओ पाइ पर्र्ना सेवा सुविधासे वञ्चित हुइ परल बटैलैं ।
‘थारु समुदाय आपन हक अधिकार ओ पहिचानके लाग राज्य सामु उठाइ पर्ना ढेर माग मुद्दा ओ विषयबस्तु रहल बावै’, उहाँ कहलै– ‘थारु समुदायमे राजनीतिक रुपमे चेतना तथा अग्रसरता बह्रलेसे फेन आभिन आपन माग मुद्दा सम्बोधनके लाग आवाज उठाइ नैसेकल अवस्था रहल बा ।’
उहाँ जुनसुके विचारधारा तथा नेतृत्वदायी भूमिकामे रहल पार्टीके थारु नेतृत्वहे थारु समुदायके हक अधिकार तथा पहिचानके लाग संगठित होके आवाज उठाइ पर्ना फेन औंल्याइल रहिट ।
थारु अगुवा तथा पूर्व शिक्षक गुरुप्रसाद चौधरी थारु समुदायके माग मुद्दा लेके राजनीतिमे स्थापित हुइना मने पाछे उ मुद्दाहे नै ओझेल पारडेना हुइल ओरसे थारु समुदाय आफन हक अधिकार पाइ नैसेकल बटैलै ।
उहाँ कहलै– ‘चुनावके बेला थारु समुदायके हक अधिकार तथा माग मुद्दाके विषय ढेर उठ्ना करठ्। उ माग मुद्दासे थारु समुदायके नेतृत्वकर्ता राजनीतिमे स्थापित फेन हुइल अवस्था रहल बावै । मने उहाँहुक्रे आपन पार्टीसे उप्पर उठे नसेक्ना ओ माग मुद्दा बारे सम्बन्धित ठाउँमे आवाज उठाउन नैसेकल ओरसे थारु समुदायके हक अधिकार तथा पहिचानके मुद्दा आझेल पर्टी गैल बा ।’
‘जबसम थारु नेतृत्वकर्ता आपन पार्टीसे उप्पर उठके थारु समुदायके लाग आवाज नैउठैही, तबसम थारु समुदाय आर्थिक, सामजिक, राजनीतिक रुपमे पाछे टे परब नै आपन हक अधिकारसे फेन वञ्चित रहब’, उहाँ कहलै ।
धनगढी नगरपालिका स्तरीय भलमन्सा समितिके अध्यक्ष रोहित चौधरी आपन माग मुद्दाके लाग जुनसुके संघसंगठनसे क्रियाशिल होके लागे पर्ना बटाइल रहिट । थारु समुदाय आपन हक अधिकारके लाग क्रियाशिल नैरहल कारण टमान माग मुद्दा सम्बोधन हुइ नैसेकल उहाँ बटैलै ।
कार्यक्रममे थारु अगुवा बुन्दीलाल चौधरी थारु समुदायके हकअधिकारमे वकालत कैना संघ संगठनहे क्रियाशिल बनाइ पर्ना औँल्याइल रहिट ।
समाजसेवी धनबहादुर चौधरी थारु समुदाय आपन हक अधिकारके सवाल सम्बन्धित ठाउँमे स्पष्ट ढारे नैसेकल ओरसे अधिकारसे वञ्चित हुइ परल बटैलै ।
युवा अभियन्ता ठाकुरप्रसाद करियाप्रधान थारु समुदायके हक अधिकारके सवालमे कार्ययोजना बनाके उ कार्ययोजनाहे कार्यान्वयन करे पर्ना आवश्यक रहल बटैलै ।
कार्यक्रममे थारु नागरिक समाजके सदस्य बसन्ती चौधरी थारु समुदायके हक अधिकारके लाग रणनीतिक रुपमे आघे बह्रे पर्ना ओ दवाव सृजना करे पर्ना बटाइल रही ।
शिक्षक राजकुमार महतो थारु युवाहे थारु भाषा, कला तथा संस्कृति ओ आपन हक अधिकार, माग मुद्दाके विषयमे सचेत कैना आवश्यक रहल बटाइल रहिट ।
थारु कल्याणकारिणी सभा कैलालीके कार्यबाहक सभापति माधव चौधरी थारु समुदायके हक अधिकारके लाग मजा सुझाव आइल बटाइल रहिट । उहाँ उ सुझावके आधारमे थाकससे अगामी कार्ययोजना बनाके आघे बह्रना बटाइल रहिट ।
थारु नागरिक समाज कैलाली अध्यक्ष दील बहादुर चौधरी थारु समुदायके हक अधिकारके लाग सक्कु जाने एकजुट हुइना आवश्यक रहल बटाइल रहिट । उहाँ हक अधिकार तथा अन्य विषय बस्तुमे फेन थारु समुदाय संगठित हुइ पर्ना बटाइल रहिट ।
कार्यक्रम थारु काल्याणकारिणी सभा कैलाली ओ थारु नागरिक समाज कैलालीके आयोजनामे हुइल रहे ।
