थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]
‘ कैलारी चौठा अध्यक्ष रनिङ कप ’

पुरुष फुटवलमे वडा–६, ओ महिला फुटवल ओर वडा–२ हे उपाधि

पहुरा | २३ पुष २०७९, शनिबार
पुरुष फुटवलमे वडा–६, ओ महिला फुटवल ओर वडा–२ हे उपाधि

पहुरा समाचारदाता
हसुलिया, २३ पुस ।
कैलालीके कैलारी गाउँपालिकामे हुइल चौठा अध्यक्ष रनिङ कप अन्र्तगतके पुरुष फुटवलके उपाधि वडा–६ ओ महिला फुटवलके उपाधि वडा–२ हासिल करले बा ।

पुरुष फुटवलओर शनिच्चरके रोज वडा नम्बर ३ ओ ६ विच हुइल फाइनल खेलमे वडा नम्बर ६ अपन प्रतिस्पर्धी वडा नम्बर ३ हे तीन गोल मारके विजयी हुइल बा । वडा नम्बर ३ दुसरा स्थानमे चित्त बुझाईल ।

ओस्टेक शनिच्चरके रोज हुइल क्रिकेटके फाइनल खेलमे वडा नम्बर ९ विजयी हुइल बा । पहिलके लाग प्रतिस्पर्धामे उटरल वडा नम्बर २ दुसरा स्थान उपविजेता बनल कैलारी युथस युनाईटेड क्लवके वरिष्ठ सल्लाहकार श्रीराम चौधरी बटैलै ।
उ प्रतियोगिता अन्र्तगत व्याडमिन्टन खेलमे वडा नम्बर १, भलिवल खेलमे वडा नम्बर ७ ओ महिला फुटवल खेल ओरसे वडा नम्बर २ फाइनल खेलमे विजयी हुइल बा । महिला फुटवल खेलओरसे शुकके रोज हुइल फाइनल खेलमे वडा नम्बर २ ओ वडा नम्बर ६ विच प्रतिस्पर्धा हुइल रहे । जेम्ने वडा नम्बर २ से वडा नम्बर ६ हे दुई गोल मारके विजयी हुइल बा । वडा नम्बर ६ गोल मारे नइसेक्के दुसरा स्थानमे चित्त बुझैले बा ।

गाउँपालिका स्तरीय अध्यक्ष रनिङ कपमे पुरुष ओ महिला फुटवलके पहिल हुइना टिमहे एक लाख नगद प्रमाणपत्र, मेडल ओ ट्रफी पैलै । दुसर टिम ५० हजार नगद प्रमाणपत्र, मेडल ओ ट्रफी पैलै ।

ओस्टेक करके उत्कृष्ट खेलाडी, सर्वाधिक गोलकर्ता, उत्कृष्ट गोल रक्षक ओ उदयमान खेलाडी ३÷३ हजार नगद रुप्या प्रमाणपत्र, मेडल ओ ट्रफी पैलै । प्रतियोगिताके पुरुष भलिवलके पहिल विजेता ५० हजार नगद रुप्या, प्रमाणपत्र, मेडल ओ ट्रफी दुसरा टिमहे २५ हजार, उत्कृष्ट खेलाडी ३ हजार नगद रुप्या प्रमाणपत्र, मेडल ओ ट्रफी पैलै बटै । पुरुष व्याडमिन्टनहे पहिल राशी २० हजार, दुसराहे १० हजार नगद रुप्या ओ प्रमाणपत्र, मेडल ओ ट्रफी पैलै ।

ओस्टेक करके पुरुष क्रिकेटमे पहिल राशी २० हजार, दुसराहे १० हजार प्रमाणपत्र, मेडल ओ ट्रफीके व्यवस्था रहे । कैलारी गाउँपालिकाके आर्थिक सहयोग तथा कैलारी युथस युनाईटेड क्लवके आयोजनामे यिहे पुस १५ गतेसे गाउँपालिका स्तरीय अध्यक्ष कपके आयोजना हुइल रहे ।

समापन कार्यक्रम कैलारी गाउँपालिकाके अध्यक्ष राजसमझ चौधरीके वडका पहुनामे हुइल रहे । कार्यक्रममे बोल्टी उहाँ यहाँके खेलाडी कैलारी गाउँपालिकाके खेलाडीके पालिका, खेलकुदके नाउँसे चिन्हैना भारी योगदान पुगाइल बटैलै । प्रतियोगिताहे अइना दिनमे निरन्तरता डेना प्रतिवद्धता जनैलै । कैलारी गाउँपालिकाके नाउँसे और ठाउँमे खेल खेले गैलेसे ओकर लाग स्थानीय सरकार सहयोग कैना बटैलै ।

उहाँ कहलै, मै घोषणा करले बटु । बरस भरके जटराफे सेवा सुविधा बा एक बरसमे कटरा आइठ । ओकर पार्टीहे डेना लेबी कटाके शिक्षा ओ खेलकुदमे लगैम ।’ और ठाउँमे खेल खेले गैलेसे अनुशासन पूर्वक खेल खेलडेना आग्रह करलै । अनुशासनमे नइरहलेसे खेलाडी संगे पालिकाके बदनाम हुइना कहलै । और देश खेलकुदके नाउँसे चिन्हजाइठ । और ठाउँमे मजासे खेल प्रर्दशन करलेसे कैलारी गाउँपालिकाफे चिन्हजैना उहाँ कहलै । खेलकुदके सामाग्री आवश्यक परलेसे स्थानीय सरकार सहयोग कैना बटैलै ।

कार्यक्रममे वडा नम्बर ६ अध्यक्ष प्रेम बहादुर चौधरी, विशिष्ट पहुना गौरीशंकर डेन्टल क्लिनिकके दिनेश चौधरी लगायत मन्तव्य व्यक्त करले रहिट । कैलारी युथस युनाईटेड क्लवके अध्यक्ष बनसराम चौधरीके अध्यक्षतामे हुइल समापन कार्यक्रममे स्वागत मन्तव्य क्लवके कोषाध्यक्ष सबिता चौधरी करले रहिट कलेसे संचालन रामबहादुर विक करले रहिट ।

कार्यक्रममे विजेता, उपविजेता, खेलाडीहुकनके प्रमाणपत्र कार्यक्रमके विशिष्ट, वडा अध्यक्ष, इप्रका हसुलियाके प्रमुख लगायत वितरण करल रहिट । ओस्टेक करके जनप्रतिनिधि ओ कर्मचारीविच हुइल फुटवल खेलमे कर्मचारीहुक्रे ७ गोल करके विजयी हुइल रहिट ।

जनाअवजको टिप्पणीहरू