कैलारीमे राष्ट्रपति रनिङ शिल्ड प्रतियोगिता सुरु

पहुरा समाचारदाता
हसुलिया, २३ माघ । कैलालीके कैलारी गाउँपालिकामे राष्ट्रपति रनिङ शिल्ड प्रतियोगिता सुरु हुइल बा ।

कैलारी गाउँपालिका शिक्षा यूवा तथा खेलकुद शाखाके आयोजनामे गाउँपालिका अध्यक्ष राजसमझ चौधरीके अध्यक्षतामे सोम्मारसे विद्यालयस्तरीय राष्ट्रपति रनिङ शिल्ड प्रतियोगिता सुरु हुइल हो । प्रतियोगिताके उदघाटन करटी उहाँ खेलकुद विद्यार्थी ओ खेलाडीहुकनके अनुशासनमे रख्नामे काम करटी बटैलै । गाउँपालिकासे शिक्षा तथा खेलकुदहे आघे बह्राइक लाग सदा तत्पर रहल उहाँ बटैलै ।

कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर, गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बम, वडा नम्बर ३ के वडा अध्यक्ष सन्तराम चौधरी, दिपेन्द्र माविके प्रअ विनोद भट्टराई लगायत मन्तव्य व्यक्त करले रहिट ।

प्रतियोतामे कैलारी गाउँपालिकाके १२ ठो माध्यमिक विद्यालय रहल बटै । जेम्ने ३ ठो संस्थागत ओ ९ ठो सामुदायिक विद्यालयके सहभागिता रहल बा । प्रतियोगितामे भलिवल छात्रा, छात्र, कबडडीमे छात्रा, छात्र, दौडमे सय, दुई सय मिटर, चार सय मिटर, पन्ध्र सय मिटर, तीन हजार मिटर रहल बा । कुदगना ओ फेक्ना, हाइजम्प, लङ जम्प, फेक्नामे सटफुट जेम्बलिङ थ्रो छात्रा, छात्र विच हुइटी रहल बा । राष्ट्रपति रनिङ शिल्ड प्रतियोगिता व्यवस्थापन निर्देशन समिति संयोजक रहल विद्यालय दिपेन्द्र माविसे व्यवस्थापन तथा संचालन करटी रहल बा ।

कार्यक्रमके संचालन गाउँपालिकाके सामाजिक विकास शाखा प्रमुख यगम कलेल ओ स्वागत मन्तव्य शिक्षा शाखा प्रमुख गणेश प्रसाद मिश्र करले रहिट । प्रतियोगिता उदघाटन कार्यक्रममे वडा अध्यक्ष, कार्यपालिका सदस्य, नेपाली काँग्रेस कैलारी गाउँपालिका सभापति कृष्णप्रसाद चौधरी, टमान विद्यालयके प्रअ, शिक्षकहुकनके सहभागिता रहल रहे ।