भुवनेश्वरी विद्यामन्दिर गडडाचौकी ओ नव बालबाटिका बौनिया विजयी

पहुरा समाचारदाता
धनगढी, २३ माघ । कैलालीके धनगढीमे जारी विद्यालय स्तरीय यु–१९ राष्ट्रिय टी–२० क्रिकेट प्रतियोगिता लिटल फलावर प्रिमियर लिग (एलपीएल) मे कञ्चनपुरके भुवनेश्वरी विद्या मन्दिर गडडाचौकी ओ नव बालबाटिका विद्या मन्दिर बौनिया विजयी हुइल बटै ।

सोम्मारके हुइल पहिल खेलमे धनगढीके शारदा विद्या निकेतन धनगढीहे ४ रनसे पराजित करटी भुवनेश्वरीलसे विजयी सुरुवात करल हो । ओकर जितमे टिम कप्तान खगेन्द्र ठगुन्नासे अलराउण्ड प्रदर्शन करलै । उहाँ ब्याटिङमे ३२ रन ओ बलिङमे ३ विकेट लेलै ।

धनगढी स्थित फाप्ला क्रिकेट मैदानमे टस जिटके ब्याटिङ कैना निर्णय करल भुवनेश्वरीसे निर्धारित २० ओभरमे ७ विकेट गुमाके १ सय २० रन जोरल । १ सय २१ रनके विजयी लक्ष्य पछ्याइल शारदा विद्या निकेतन २० ओभरमे ७ विकेट गुमाके १ सय १६ रन केल बनाई सेकल । ओकर लाग दीपक रोकायासे २६ ओ कृष्ण भट्टसे २१ रन बनैलै । बलिङओर भुवनेश्वरीके खगेन्द्र ठगुन्नासे ३ विकेट लेलै ।

उ आघे भुवनेश्वरीके ब्याटिङमे खगेन्द्र ठगुन्नासे ३२ रनके पारी खेल्लै । ओकर प्रकाश पाण्डेसे २२ ओ लोकेश जोशीसे १८ रन बनैलै । बलिङ ओर शारदाके हृदय बिठारी २ विकेट लेलै ।

खेलके प्लेयर अफ दी म्याच खगेन्द्र ठगुन्ना चुन्लै । सोम्मार हुइल दुसरा खेलमे नव बालबाटिका विद्या मन्दिर बौनियासे वेष्टन क्रिष्टल एकेडेमी धनगढीहे ९० रनसे पराजित करल ।

टस जिटके ब्याटिङ करल बाल बाटिकासे निर्धारित २० ओभरमे ५ विकेट गुमाके १ सय ८८ रनके विशाल योगफल तयार पारल रहे । १ सय ८९ रनके लक्ष्य पछ्याइल वेष्टन क्रिष्टल एकेडेमीसे निर्धारित २० ओभरमे ९ विकेट गुमाके ९८ रन केल बनाई सेकल । वेष्टनके लाग नीरज ऐर २४ ओ आशिष् लुहारसे १६ रन बनाइल । बलिङ ओर बाल बाटिकाके वीरबहादुर घर्ती मगरसे ३ ओ प्रकाश जैशीसे २ विकट लेलै ।

उ आघे पहिल इनिङमे बाल बाटिकाके लाग नेपाली यु–१९ राष्ट्रिय टिमके सदस्य समेत रहल प्रकाश जैशीसे २६ बलमे ७ छक्का ओ ६ चौकासहित अविजित ७८ रनके विस्फोटक पारी खेल्लै । ओकर लाग आशिष ओलीसे ४३ ओ विराट सिंह भण्डारी ३७ रन बनैलै । बलिङ ओर वेष्टन क्रिष्टलके रोशन थापा २ विकेट लेलै । खेलके प्लेयर अफ दी म्याच प्रकाश जैसी चुन्लै ।

लिटल फलावर स्पोर्ट्स एण्ड इभेन्ट्सके आयोजनामे फागुन ६ गतेसम सञ्चालन हुइना प्रतियोगितामे लिटल फलावरके बोर्डिङ हाई स्कुल धनगढी कैलाली, श्री होली फेमली इ. मिडियम स्कुल भीमदत्तनगर कञ्चनपुर, शारदा विद्या निकेतन धनगढी, सैनिक आवासीय महाविद्यालय तेघरी कैलाली, नव बाल वाटिका विद्यामन्दिर बौनियाँ कैलाली, भुवनेश्वरी विद्यामन्दिर गडडाचौकी कञ्चनपुर, वेष्टन क्रिष्टल एकेडेमी धनगढी, गुराँस एकेडेमी अत्तरिया कैलाली, सत्यवती एकेडेमी अत्तरिया कैलाली ओ लोटस आइ इ. सेकेन्डरी स्कुल अत्तरिया सहभागी बटै ।

फागुन ६ गतेसम सञ्चालन हुइना प्रतियोगिताके विजेताहे २ लाख ५१ हजार १ सय ११ ओ उपविजेताहे १ लाख २५ हजार ५ सय २५ नगदसहित ट्रफी, मेडल ओ प्रमाण पत्र प्रदान कैना बा । प्रतियोगिताके सर्वोत्कृष्ट खेलाडीसे नगद २० हजार, उत्कृष्ट बलर ओ ब्याट्सम्यानसे १०÷१० हजार नगदसहित ट्रफी, मेडल ओ प्रमाण पत्र प्राप्त करही । ओस्टेक उदयमान खेलाडीहे नगद ५ हजार प्रदान कैना आयोजक जनैले बा ।