नवलपरासीके फोर ब्रदर्शफे अन्तिम चारमे
पहुरा समाचारदाता
धनगढी, २६ चैत । नवलपरासीके फोर ब्रदर्श फुटबल क्लवसे गौरीगंगा गोल्डकपके अन्तिम चारमे स्थान सुरक्षित करले बा ।
अँटवारके बाजुरोके रानीवन फुटवल क्लवहे ४–० गोल अन्तरसे पराजित करके फोर ब्रदर्श एफसी सेमिफाइनल पुग्न चौठा टोली बनल हो । ‘जगशक्ति गोल्ड टिएमटी टिसरा सुदूरपश्चिम गौरीगंङगा गोल्ड कप’ मे कैलालीके स्टार सिटी युवा क्लब, बर्दियाके नव युवा मैत्री भाव एकता समाज क्लव ओ बाँकेके रेसिङ सहारा क्लब यी आघे सेमिफाइनल पुगसेकल बा ।
अँटवारके खेलमे फोर ब्रदर्शके कप्तान विनोद केवटसे २ गोल करलै । खेलके ४२ औँ मिनेटमे उहाँक गोल मार्फत फोर ब्रदर्शसे अग्रता बनाइबेर पहिल हाफके खेल १–० मे सेकल । ८४ औँ मिनेटमे केवटके गोल मार्फत फोर ब्रदर्शले अग्रता दोब्बर बनाइल । ओकर ३ मिनेटपाछे खेलके ८७ औँ मिनेटमे रानीवनके अभिषेक यादव आत्मघाती गोल करे पुग्लै । निर्धारित ९० मिनेटमे ३–० से आघे रहल फोर ब्रदर्शके लाग सुमित मल्ल थपल समयमे १ गोल करलपाछे उ प्रतियोगितामे सहज जित निकारके अन्तिम चारमे स्थान पक्का करल हो ।
आब फाइनल प्रवेशके लाग फोर ब्रदर्शसे मंगर बर्दियाके नव युवा मैत्री भाव एकता समाज क्लबके सामना कैना बा । ओकल आघे पहिल सेमिफाइनलमे सोम्मार कैलालीके स्टार सिटी ओ कोहलपुर रेसिङ सहारा क्लब बाँकेके प्रतिस्पर्धा हुइना बा ।
‘खेलौँ फुटबल रमेर, खेलकुदको सन्देश, शान्ति स्थायित्व र एकताबद्ध देश’ कना नाराके साथ गौरीगङगा–११ स्पोर्टस् क्लवसे आयोजना करल प्रतियोगिता चैत ३० गते समापन हुइना बा । १० टोलीसे सहभागिता जनैले बा । प्रतियोगिताके विजेताहे ट्रफी सहित नगद ४ लाख ओ उपविजेताहे ट्रफी सहित नगद २ लाख पुरस्कार प्रदान कैना बा । कलेसे सर्वोत्कृष्ट खेलाडीहे नगद ५० हजार प्रदान कैना आयोजक जानकारी डेले बा । सर्वाधिक गोलकर्ता, उत्कृष्ट गोलरक्षक लगायत टमान विद्याके उत्कृष्ट खेलाडीहे विधागत रूपमे ट्रफी सहित नगद १० हजार पुरस्कार डेजाई ।
