थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०२ सावन २६४८, बुध ]
[ वि.सं २ श्रावण २०८१, बुधबार ]
[ 17 Jul 2024, Wednesday ]

सुदूरपश्चिम डेंगु संक्रमित ३१८ पुग्लै

पहुरा | १३ श्रावण २०८०, शनिबार
सुदूरपश्चिम डेंगु संक्रमित ३१८ पुग्लै

पहुरा समाचारदाता
धनगढी, १३ सावन ।
सुदूरपश्चिम डेंगु संक्रमितके संख्या ३ सय १८ जाने पुगल बटै । सुदूरपश्चिम पदेश सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार जनवरी महिनासे जुलाईसम यी प्रदेशमे ३ सय १८ जनहनमे डेंगु संक्रमण हुइल बा ।

प्रदेश नौ जिल्ला मन्से सबसे ढेर १ सय ९० जाने दार्चुलाके संक्रमित रहल बटै । कुछ दिन यहोर डेंगु संक्रमण जोरसे बह्रल बा, कलेसे जुलाई महिनाके तथ्यांक हेरेबेर कञ्चनपुरमे संक्रमण बृद्धि दर उच्च डेखल बा । यी जिल्लामे जुन महिनामे जम्मा ५ जनहनमे केल संक्रमण डेखल रहे । कलेसे जुलाई महिनामे १८ जनहनमे संक्रमण डेखल बा ।

सुदूरपश्चिम प्रदेशके कैलाली ओ अछाम जिल्लामेफे डेंगु संक्रमण उच्च डेखल बा । जुन महिनामे कैलालीमे ४ जनहनमे ओ अछाम महिनामे ६ जनहनमे यी रोग संक्रमण डेखल रहे । कलेसे जुलाई महिनामे कैलालीमे १३ ओ कञ्चनपुरमे १५ जनहनमे डेंगु संक्रमण डेखल बा ।

नौ जिल्लामे सबसे ढेर दार्चुलामे १९०, कञ्चनपुरमे ५२, अछाममे ३१, कैलालीमे २३, डोटीमे, बैतडीमे ५÷५ जनहनमे, बझाङमे ६, बाजुरामे ४, डडेल्धुरामे २ जनहनमे डेंगु संक्रमण डेखल बा ।

सुदूरपश्चिममे सन २०२३ के जनवरी महिनामे १५ जनहनमे, फेबु्रअरी महिनामे ५२, मार्च महिनामे सबसे ढेर १२९ जनहनमे, अप्रिलमे २५, मैई महिनामे २२, जुन महिनामे २६ ओ जुलाई महिनामे ४९ जनहनमे डेंगु डेखा परल स्वास्थ्य निर्देशनालय जनैले बा ।

ओस्टेक देशभर जुलाई महिनासम ४ हजार ६१९ जनहनमे डेंगु रोगके संक्रमण डेखल बा । सबसे ढेर कोशी प्रदेशमे २ हजार ९७१ जनहनमे, बागमति प्रदेशमे ७ सय ६७ जनहनमे, गण्डकीमे ३ सय ४७ जनहनमे, सुदूरपश्चिम प्रदेशमे ३ सय १८ जनहनमे संक्रमण डेखल बा । ओस्टेक करके लुम्बिनी प्रदेशमे १ सय ६८, मधेश प्रदेशमे २५ ओ कर्णालीमे २३ जनहनमे केल डेंगु रोगके संक्रमण डेखल बा ।

मुलुकके टप १० जिल्ला सुनसरीमे २ हजार ७३७, धादिङमे ४ सय ८३, कास्कीमे २ सय ८, दार्चुुलामे १९० जनहनमे डेंगुरोगके संक्रमण डेखल बा । ओस्टेक काठमाण्डौ ८८, संखुवासभामे ७५, म्याग्दीमे ५४, कञ्चनपुरमे ५२, रुपेन्देही ४५, झापामे ४२ जनहनमे डेंगु रोगके संक्तमण डेखल बा ।

जनाअवजको टिप्पणीहरू