नेपालगन्ज म्याराथनके तयारी अन्तिम चरणमे
पहुरा समाचारदाता
नेपालगञ्ज, १६ कार्तिक । नेपालगन्जमे संचालन हुइटी आइल धारा नेपालगन्ज म्याराथनके नवौँ संस्करणके लाग तयारी अन्तिम चरणमे पुगल बा । अगहन ९ गते शनिच्चर हुइना नवौं धारा नेपालगन्ज म्याराथनमे यी वर्ष फे अन्तर्राष्ट्रिय मापदण्ड अपनाके सञ्चालन कैना आयोजक क्रियटिभ ह्याण्ड्स जनैले बा ।
क्रियटिभ ह्याण्ड्ससे बिफेक रोज नेपालगन्जमे पत्रकार सम्मेलन करटी म्याराथनके तयारी अन्तिम चरणमे पुगल जानकारी डेले बा । पत्रकार सम्मेलनमे बोल्टी क्रियटिभ ह्याण्ड्सके संस्थापक अध्यक्ष टीएस ठकुरी म्याराथनमे नगद पुरस्कारसम्बन्धि विस्तृत जानकारी हाली करैना बटैलै ।
नेपालगञ्ज म्याथनहे थप आकर्षक बनैना टमान क्षेत्रके दर्जन ढेर सफल ब्यक्तित्वहुकनके उपस्थितिमे एकदिने कनक्लेभ आयोजना कैना उहाँ बटैलै । ओस्टेक करके म्याराथनके रिपोर्टिङके विषयमे सञ्चारकर्मीसंगफे एक दिने अभिमुखीकरण कार्यक्रम कैना अध्यक्ष ठाकुरी बटैलै ।
क्रियटिभ स्याण्ड्सके आयोजना एवं क्रियटिभगन्ज मिडिया एण्ड इभेन्ट म्यानेजमेन्टके व्यवस्थापन रहल नवौ धारा नेपालगन्ज म्याराथनके लाग २०६० भदौ १ गतेसे ेलाडी दर्ता खुला करल ठकुरी बटैलै ।
पत्रकार सम्मेलनमे बोल्टी लुम्बिनी प्रदेश खेलकुद परिषदके सदस्य सचिव जयप्रकाश भट्टराई धारा नेपालगन्ज म्याराथनसे खेलजगतमे नयाँ आयाम नानल बटैलै । उहाँ नेपालगन्ज म्याराथन प्रदेश खेलकुदके एक सम्पत्ति बनल उल्लेख करटी यकर प्रवर्धन ओ विकासके लाग प्रदेशसे वार्षिक क्यालेण्डरमे समावेश कैना प्रतिवद्धता व्यक्त करलै । उहाँ कहलै, नेपालगञ्ज म्याथन लुम्बिनी प्रदेशके गौरवके प्रतियोगिता हो, यिहीहे प्रदेश सरकारसे आब अपनत्व लि ।’ गैल बर्षसे सुरु हुइल लुम्बिनी म्याथन ओ नेपालगञ्ज म्याथन प्रतियोगिताहे प्रदेश सरकारसे अपनत्व लेना बटैटी सदस्य सचिव भट्ट पहिल प्राथमिकतामे नेपालगञ्ज रहल दाबी करलै । प्रदेश सरकारसे करे पर्ना कार्य नेपालगन्जमे एक संस्थासे करटी रहल बटैटी उहाँ ओकर लाग म्याराथनके संस्थापक टीएस ठकुरी प्रति उच्च सम्मान प्रकट करलै ।
आयोजकके अनुसार यी वर्ष अघिल्का वर्षमे चार विधा थप करके टमान १४ ठो विधामे प्रतिस्पर्धा समावेश करल बा । स्कूलस्तरीयमे बाह्य जिल्ला ओ स्कूलस्तरीय दौडमेफे कक्षा ६ से ८ तथा ९ से १२ समके अलग–अलग स्पर्धा करैना बा । जेम्ने टमान बिद्यालयसे अति विपन्न परिवारके ३०० विद्यार्थीहुकनके लाग अमेरिकाके भर्जिनियामे बसोबास कैना नेपालीहुक्रे सहयोग कैना आयोजक जनैले बा ।
प्रतियोगितामे पुरुषओर म्याराथन ४२.१९५ किमी, महिलाओर हाफ म्याराथन २१ किमी, १० किमी पुरुष ओ महिला खुल्ला, ५ किमी स्कुलस्तरीय छात्र एवं छात्रा, किड्स रन ८ से १२ वर्ष उमेर समुह, ५ किमी कर्पोरेट रन ५ किमी ट्राइसाइकल ओ ५ किमी वाकाथन समावेश करल बा । स्कुलस्तरीय दौडहे बाँके जिल्ला तथा वाह्य जिल्ला करके अलग अलग स्पर्धा कराके पुरस्कृत कैना बा । ओस्टेक करके, बाँके जिल्लाके हकमे कक्षा ६ से ८ तथा ९ से १२ सम्मके अलग अलग दौड (५ किमी) सञ्चालन कैना बा ।
नेपालगन्ज म्याराथन एसोसियसन अफ इन्टरनेसनल म्याराथन एण्ड डिस्टेन्स रेश एम्ससे मान्यताप्राप्त दौड प्रतियोगिता हो । जापानके ओशाकामे हुइल २३ औ सभामे नेपालगन्ज म्याराथनके संस्थापक टीएस ठकुरी भाग लेहल रहिट । यी भविष्यमे अन्तर्राष्ट्रिय सम्बन्ध विस्तार हुइना अपेक्षा करल बा । एम्सके प्रमाणीकरण रुटमार्फत नेपालगन्ज म्याराथनसे नेपालके पुरान सहर नेपालगन्ज ओ उदीयमान सहर कोहलपुरहे जोरना काम करल आयोजकके दाबी बा ।
नेपाल सरकार ओ तत्कालीन विद्रोही नेकपा माओवादीबीच दशक नम्मा सशस्त्र द्वन्द्व विधिवत अन्त्य कैना करके हुइल विस्तृत शान्ति सम्झौता ५ अगहन २०६३ को स्मरणमे नौ वर्षसे निरन्तर नेपालगन्ज स्याराथन आयोजना हुइटी आइल बा । उहे सम्झौतामार्फत मुलुकसे शान्ति, विकास ओ समृद्धिके डगरके ात्रा तय करल स्मरण करटी हरेक वर्ष ५ अगहनमे नेपालगन्जके बीपी चौक ओ कोहलपुर चौराहामे क्रियटिभ ह्याण्ड्ससे दीप प्रज्वलन समेत करटी आइल बा ।
पत्रकार सम्मेलनमे म्याराथनके मुख्य प्रायोजक केएल दुगड ग्रुपके प्रबन्ध निर्देशक प्रदिप छाजेड, दुसर प्रायोजक चम्पालाल बोथरा लगायतके उपस्थिती रहल रहे ।
