फारवेष्ट पशुपति कप अगहन २२ गतेसे

पहुरा समाचारदाता
धनगढी, २३ कार्तिक । छैठौं फारवेष्ट पशुपति कप फुटबल प्रतियोगिता अइना अगहन २२ गतेसे आयोजना हुइना बा ।

बुधके रोज पत्रकार सम्मेलनके आयोजना करटी आयोजक फारवेष्ट पशुपति युवा क्लबसे प्रतियोगिता अगहन २२ गतेसे आयोजना कैना जानकारी डेहल हो । पाचौं संस्करणके आयोजनापाछे तीन वर्ष रोकल प्रतियोगिताके छैठौं संस्करण अगहन २२ गतेसे २९ गतेसम धनगढी रंगशालामे हुइना बा ।

प्रतियोगिताके विजेतासे पाँच लाख ओ उपविजेतासे २ लाख पैही । प्रतियोगिताके उत्कृष्ट खेलाडीहे २५ हजार तथा टमान विधाके उत्कृष्टसे १५–१५ हजार रुप्या पुरस्कार पैना आयोजक फारवेष्ट पशुपति युवा क्लबके अध्यक्ष खेम रावत बटैलै । प्रत्येक खेलके म्यान अफ द म्याच पाँच हजार नगद पैही । सक्कु धनराशी जोरके आठ लाख ७० हजार नगद पुरस्कार डेना आयोजक फारवेष्ट पशुपति युवा क्लब जनैले बा ।

धनगढी रंगशालामे आयोजना हुइना प्रतियोगितामे १६ टिमके सहभागिता रहन क्लबके सचिव ललित मिश्र जानकारी डेलै । उहाँक अनुसार प्रतियोगिता आयोजनामे झण्डै ४९ लाख रुप्या खर्च हुइना अनुमान करल बा । प्रतियोगिताके लाग आयोजक क्लबसे प्रायोजक तथा प्रबद्र्धकक खोजी करटी रहल बा ।