डेवारी सक्कुहुनके मजा होए शुभकामना बा
शान्ति ओ समृद्धिके सैचिन डेवारी हिन्दू धर्मलम्वी तथा समस्त नेपालीहुकनके घर अंगनामे मचल रौनक डसिया ठनसे डेवारीसम कायमे रहल बा । सक्कुओहोर चैनार बा । रौनक छाँइल बा । डेवारी टिहुवार रंगीचंगी, भातृत्वसहित ढिउर कारणसे ऐतिहासिक ओ विशेष मानजाइठ । सत्ययुगमे वामन अवतारके भगवान विष्णुसे ३ पाउ भूमि दानवराज बलि राजासे मागल रहिट । भगवानहे सन्तुष्ट पारेक लाग उहाँ उ माँगन फेन पूरा करके दानवीरके अनुपम उदाहरण प्रस्तुत करल रहिट । कलान्तरसे उहाँके सम्झनामे यमपञ्चकमे दीपावली करटी आगिल बा । जौन डेवारीके ऐतिहासिक पक्ष हो । डेवारी मौसमी हिसाब ओ समृद्धि तथा ओजरारसे जोरल टिहुवार फेन हो । यी बेला न ढिउर घाम न ढिउर ठण्डी रहलओरसे फेन डेवारीमे मौसमी अनुकुलता ठिक मानजाइठ ।
नेपालीहुकनके महान पर्व शुभ डेवारीमे शान्ति अमनचयन छाए कौनौ अप्रिय घटना नघटे कना उद्देश्यके साथ कैलालीमे रातके ९ बजेपाछे नाचगान तथा देउसी भैलो खेले नइपैना जिल्ला प्रशासन कार्यालय कैलाली कहले बा । सुरक्षा व्यवस्थाहे ध्यान डेटी रातके ९ बजेपाछे नाचगान तथा देउसी भैलो खेल्नमे रोक लगाइल बा । ,‘रात अबेरसम देउसी भैलो खेलेबेर चोरी डकैती लगायतके घटना हुइना ओरसे उहीसे ध्याने रख्टी ओसिन कार्य रात ९ बजेसम केल सभ्य एवं शान्तिपूर्वक कैना प्रशासनसे जारी सूचना करटी अनुरोध करले बा । डेवारीमे बिस्पोटक पदार्थ समेत बिक्री बितरण तथा प्रयोग नइकैना जिल्ला प्रशासन कार्यालय कैलाली अनुरोध करले बा । बिस्पोटक पर्दाथसे मानविय क्षती आगलागी जैसिन घटना हुइना ओरसे उ बिक्री बितरण तथा ओसार पसार ओ प्रयोग नइकैना नइकरैना अनुरोध करले बा ।
मादक पदार्थ लगायतके नशालु पदार्थ सेवन करके पर्वके समयमे सार्वजनिक स्थलमे होहल्ला, झैझगडा जैसिन कार्य करके शान्ति सुरक्षाहे असर पर्ना कौनोफे कार्य करे नइपैना कहल बा । देउसी भैलोमे दक्षिणाके लाग रकम तोक्के दक्षिणा डेना दबाब नइडेना ओ देउसी भैलो लगायतके कौनोफे कार्यक्रम करेबारे सार्वजनिक यातायात ओ जनजीवनहे असर पर्ना कौनोफे गतिविधि नइकैना अनुरोध करल बा । हर्ष, खुसयाली, शान्ति ओ समृद्धिके सैचिन तथा प्रतीकके रुपमे रहल यी बरसके डेवारी टिहुवारके अवसरमे हमार सक्कु पाठक वर्ग, विज्ञापनदाता, शुभचिन्तकलगायत समस्त नेपाली डाडुभैया, डिडीबहिनियाहुकनमे मैगर शुभकामना व्यक्त करटी । अन्तमे, कौनो फेन टर–टिहुवार केक्रो डेखासिखीमे नाई, आपन क्षमता अनुसार मनाई । आपन स्वास्थ्य अवस्थाहे ख्याल करके खानपानके सगेना लगाई ।
