लागु औषध न्युनिकरण सम्बन्धी जनचेतनामुलक कार्यक्रम

पहुरा समाचारदाता
धनगढी, १४ अगहन । “लागु औषध नियन्त्रण महाअभियान २०८०” अन्तर्गत बुधके रोज कैलाली धनगढी उप–महानगरपालिका वडा नं. ०३ स्थित श्री जनता माध्यमिक विद्यालयमे लागु औषध न्युनिकरण सम्बन्धी जनचेतनामुलक कार्यक्रम सम्पन्न हुइल बा ।

जिल्ला प्रहरी कार्यालय कैलालीके आयोजनामे जनता माध्यमिक विद्यालय धनगढीके समन्वयमे लागु औषध न्युनिकरण सम्बन्धी जनचेतनामुलक कार्यक्रम हुइल हो । कार्यक्रममे जिल्ला प्रहरी कार्यालय कैलालीमे कार्यरत प्रहरी सहायक निरीक्षक कृष्णबहादुर मल्ल लागु औषध सेवन, बिक्रि बितरण तथा ओसार–पसार न्युनिकरण लगायत अन्य बिबिध बिषयमे अन्तरक्रियात्मक प्रशिक्षण डेहल रहिट । जनता माध्यमिक विद्यालय धनगढीके सभा हलमे हुइल उ कार्यक्रममे विद्यालयके शिक्षक, शिक्षिका ओ विद्यार्थी करके ८० जानेक उपस्थिति रहल रहे ।

ओस्टेक करके लागु औषध नियन्त्रण महाअभियान २०८०” अन्तर्गत ब्ुधके रोज ईलाका प्रहरी कार्यालय टिकापुर कैलालीके आयोजना ओ सरस्वती माध्यमिक विद्यालय बनगाउँके समन्वयमे जिल्ला कैलाली टिकापुर नगरपालिका वडा नं. ०१ स्थित सरस्वती माध्यमिक विद्यालय बनगाउँके सभा हलमे उ विद्यालयके शिक्षक, शिक्षिका ओ विद्यार्थी करके ६८ जानेक उपस्थितिमे ईलाका प्रहरी कार्यालय टिकापुर कैलालीमे कार्यरत प्रहरी निरीक्षक लोकराज अवस्थीसे लागु औषध सेवन, बिक्रि बितरण तथा ओसार–पसार न्युनिकरण लगायतके अन्य बिबिध बिषयमे अन्तरक्रियात्मक प्रशिक्षण डेहल रहिट ।

अवैध लागूऔषधसहित चार ६ जाने पक्राउ

अवैध लागु औषधसहित प्रहरीसे टमान ठाउँसे ६ जनहनहे पक्राउ करले बा ।
कञ्चनपुर जिल्ला भीमदत्त नगरपालिका–१८ सालघारीसे अवैध लागूऔषध खैरो हेरोइन १ ग्राम ४९ मिलिग्रामसहित उहे ठाउँ डेरा करके बैठना बेदकोट नगरपालिका–१ बैठना २३ वर्षीय सुनिल डगौरा समेत ३ जनहनहे मंगर रात प्रहरी पक्राउ करले बा । जिल्ला प्रहरी कार्यालय कञ्चनपुरसे खटल प्रहरी ओइनहे उ लागूऔषधसहित पक्राउ करल हो ।

ओस्टेक बर्दिया बढैयाताल गाउँपालिका–२ फुटाहासे अवैध लागूऔषध ब्राउनसुगर जैसिन विल्गना पदार्थ १ ग्राम ३ सय १० मिलिग्रामसहित उहे गाउँपालिका–१ शान्तिपुर बैठना २८ वर्षीय सुजन पुन मगरहे मंगर साँझ प्रहरी पक्राउ करले बा । प्रहरी चौकी जमुनीसे खटल प्रहरी भारतहे नेपालओर पैदल अइटी रहल उहाँहे उ पदार्थसहित पक्राउ करल हो ।
ओस्टेक दुर्गाथली गाउँपालिका–४ आमरुखसे अवैध लागूऔषध चरेस जैसिन पदार्थ ६ केजी ६० ग्रामसहित २ जनहनहे मंगर रात प्रहरी पक्राउ करले बा ।

पक्राउ परुइयामे केदारस्युँ गाउँपालिका–९ बैठना २९ वर्षीय प्रेमबहादुर बोहरा ओ उहे गाउँपालिका–८ बैठना २८ वर्षीय सुनिल बोहरा रहल बा । ईलाका प्रहरी कार्यालय दुर्घाथलीसे खटल प्रहरी सु.प.प्र.०१००९ प १४४० नम्बरके मोटरसाइकल जाँच कैना क्रममे ओइनहे उ पदार्थसहित फेला पारी पक्राउ करल हो । यी सम्बन्धमे प्रहरी आवश्यक अनुसन्धान करटी रहल बा ।