डा.तारानाथ शर्मा घनघस्याको उकालो कना नियात्रा संस्मरणम कलबाट–‘जीवन एकठो निटुङ्ग्यैना यात्रा रलक ।’ यात्रा निरन्तर चल्ती रहठ । हर मनैनके मेरमेरके चाहना, रुचि, सोच विचार भिन्न रहठ । मोर जिन्गिक यात्रा फेन भिन्न बा । यात्राके विधा फे भिन्न मेरिक रहठ । मोर साहित्यिक यात्राके चर्चा कर चाहटु । मोर साहित्यिक यात्राके करिब तीन दशक पुगटा । कक्षा ८ म पह्रबेरिक समय रह वि.स. २०५१ सालम सुर्खेतम थारु समुदायके भाषिक, सामाजिक, सांस्कृतिक एवम् खेलकुदके क्षेत्रम काम कर्ना उद्देश्यसे गोचाली परिवार कना संस्था जन्मल रह । ओह संस्थाके आयोजनाम २०५१ फागुन महिनाम तिलपुरम कैगिल थारु सांस्कृतिक कार्यक्रमम विविध सांस्कृतिक नाच ओ थारु गीत प्रतियोगिताके डब्निभि¥या हुइल रह । ऊ डब्निभि¥याम म्वार लिखल गीत गाउँक बाबुन गैल रलह । जुन दोस्रो स्थानम पुरस्कृत हुइल रह । ओह गीत नै साहित्यक यात्राके पहिल परगा रह । गीतम छाइन्के दुःख पिर ब्वाकल बिलौना मुख्य विषयवस्तु रह–
छाइ हम्र भातभन्सा चुल्हा चौकी करना डाडुभैया पह्र जैना हम्र पाछ परना के बुझी हमार व्यथा हो के बुझी दुःखक कथा हो ।
इ उप्रक गिटके बोलम गाउँक बाबुन गैल रलह । जुन गीत वि.स.२०६४ म प्रकाशित भ्यावक घर कना गीति एल्बम समाबेश कैल बाटु । जब मै एस.एल.सी. उत्तीर्ण हुइनु तब वीरेन्द्रनगर बहुमुखी क्याम्पसम पह्र लग्नु । ऊ ब्याला सुर्खेतम दाङ, देउखर, बर्दिया, कैलालीके थारु संघरेन फे उच्च शिक्षा लेना उद्देश्यले सुर्खेत शिक्षा क्याम्पसम अध्ययन कर आइल रलह । तबह शत्रुघन चौधरीके अध्यक्षताम थारु विद्यार्थी युवा परिवार कना विद्यार्थी संगठन बनल । ओह विद्यार्थी संगठनमार्फत ‘डौना बेबरी ’ कना थारु भासक पत्रिका प्रकाशन कर्ना निर्णय हुइल । दाङ देउखरके बालगोबिन्द चौधरी, सुमन चौधरी, बर्दियाके बुद्धिराम चौधरी, कैलालीके खड्क बहादुर चौधरी लगायतके टिम जुर्मुरैल । मै फे ओह टिमम रनहुँ । क्याम्पसम पहर्ना विद्यार्थीन् कविता, गीत, खिस्सा, लेख रचना लिख्ना सूचना कैगिल । मै फेन एकठो कविता लिख्नु । रसरस थारु भासाम कलम चलैना मनस्थिति बन्टी गिल । असहख काठमाडौँसे प्रकाशित हुइना थारु पत्रिका ‘बिहान’ मोर हाठम परल । ऊ पत्रिकाम फेन विभिन्न जिल्लाके साहित्यकार हुकनक लिखल कविता, गीतबास, खिस्सा, पहर्ना मौका मिलल । मै फेन लिख परठ कना भावनाके विकास हुइटि गिल । यह क्रमम कविताम घैखरसे जाननाजान कविता लिख लग्नु ओ वि.स.२०५७ सालम ‘ढुकढुकी’ कना कविता ओ मुक्तक सङ्ग्रह प्रकाशन कर्नु । कविता, मुक्तकके संरचनात्मक बारे महि मजासे कुछ ज्ञान फे नैरह लेकिन किताब निकर्ना साहस कैलेनु । सुर्खेतसे पहिल थारु कविके पगरी गुँठनु । यी कविता सङ्ग्रहम खासकैक मैयापिरिमके विषयवस्तु ढेर बा । जुन उमेरके प्रभाव हो कनासक लागठ ।
यकर पाछ थोर बहुट कविता लिख्ना क्रम बर्हटि गिल । वि.स. २०५८ सालम काठमाडौँ गैल ब्यालम अग्रज साहित्यकार डा.कृष्णराज सर्वहारीके डेराम बसेरा लेनु ओ मोर ढुकढुकी कना किताब देनु । उहाँ महि आपन सग्गे भैयाअस मैया कर्ल ओ साहित्यम कलम चलैटि रबि भाइ कैक हौसला ओ प्रेरणा डेल । यी मोर लाग साहित्यिक यात्राके टर्निङ प्वाइन्ट रह । यह नै मोर लाग साहित्यिक पृष्ठभूमि बन पुगल ।
साहित्यिक यात्रा
यी साहित्य गीत बास लिख्ना, नाटक खेल्ना, मन्द्रा बजैना, चित्र बनैना मनैनके रुचिअनुसार एकठो रहर फे हो । हरेक सर्जक हुकहनके कुछ न कुछ उद्देश्य रहट । ओसहख समाजम कुछ कृति लिख्खन आपन नाउँ चलैना एकमेरिक मनम बसेरा लैसेक्लक ओहर्से रसरस साहित्यिक यात्राओहर अग्रसर हुइ लग्नु । यत्र क्रमम खण्डकाव्य लिख्ना मन बनैनु । रहर रहरम मै वि.स. २०६१ सालओहर खण्डकाव्य लिख्ना साहस कर्नु । कौनो कव्यम कथावस्तु महत्वपूर्ण मानजाइठ । कथावस्तुके लाग एकठो किसानके जीवनके कहानीम लिख्ना जर्मको कर्नु । उह ब्याला दाजु सर्वहारी फेन काठमाडौँसेस्वान नेपाल कना संस्थाम काम कर नेपालगञ्जम आइल रलह । टब्बहे ‘किसानके जिन्दगी’ कना खण्डकाव्यके भूमिका लिख्ना आग्रह कर्नु । उहाँ मोर खण्डकाव्यके पाण्डुलिपि सरसर्टि हेर्ख भूमिका फे लिख्डेल ओ काव्यम रहल कमिकमजोरी सुधारक लाग सुझाव फे डेल । मै ओह अनुसार काव्यके विषयवस्तु परिमार्जिट कर्नु । उहाँक सुझाबके कारण खण्डकाव्य संरचनागत ओ भावात्मक विषयवस्तु लिक पक्रल ओ काव्यगत रुपम उत्कृष्ट बनल । इ मोर साहित्यिक यात्राके कृतिगत यात्राके दुसर परगा रह । इ खण्डकाव्यके बारेम वि.स.२०७० सालके सगुनलाल चौधरीके स्मृति दिवसके अवसरम बर्दिया सेम्रह्वाम हुइल एक कार्यक्रमम थारु विद्वान स्व. महेश चौधरी थारु भासाम लिखल यी खण्डकाब्य उत्कृष्ट रलक धारणा ढर्ल रलह ।
काठमाण्डौसे प्रकाशन हुइना थारु भासक पत्रिका बिहान, दाङ देउखरसे प्रकाशन हुइना लावा डग्गर, गोरखापत्रसे प्रकाशन हुइना थारु भाषापृष्ठ अङ्कम फुटकर रुपम कविता, बटकुहि, निबन्ध लिख्ना क्रम जारी रह । वि.स. २०६१ सालम एफ. एम. रेडियोम काम कर्ना मौका पैनु । साहित्यम रुचि रहल मै रेडियोकर्मी बन्खन थारु भासक कार्यक्रम चलैना अवसरले थारु गीतबास, संस्कार संस्कृतिके बारेम जन्ना बुझ्ना मौक जुुराडिहल । ऊ ब्यालम एफ.एम. बजाइक लाग थारु गीतके एक मेरिक अभाव रह । टब्बेहे थारु गीत लिख्नु ओ वि.स. २०६४ सालम गिटि एल्बम ‘भ्यावक घर’ कना थारु भाषक लोक तथा आधुनिक गिट प्रकाशन कर्नु । यि मोर लाग गिटके विधाम पहिल परगा समग्र साहित्यिक यात्राके टिसर परगा रह । वास्तव कविता, गीत, गजल, बटकुहि लिख्ना लिरौसी बात निहो । यकर लाग अध्ययन, अभ्यास ओ साधना चाहट । रुचि, रहर ओ इच्छाशक्ति फे चाहट । थारु गिटि एल्बमले एफ. एम. बज्ना गीतके कुछ हदसम टेवा पुगाइलसक लागठ ।
वि.स. २०७० सालम बाँकेके गाभर भ्यालिम थारु होमस्टेम थारु साहित्यकारनके भेला (बखेरी) हुइल रह । ऊ बखेरीम अग्रज साहित्यकार कृष्णराज सर्वहारी, शुसिल चौधरी, छविलाल कोपिला, सोम डेमनडौरा, बालिका चोधरी, सागर कुश्मि, ठाकुर अकेला लगायतस्वयम यी पंक्तिकार फेन उपस्थिटि रह । ऊ बसाइले पुन एकमेरिक ऊर्जा भरडेहल । ओह बरस थारु भासक कथा सङ्ग्रह ‘ककनडरान छोट्की’ कना कथा सङ्ग्रह प्रकाशन कर्नु । यि कथा सङ्ग्रहम थारु समुदायके जनजीवन, दुःख, पिरव्याथा, समाजके समसामयिक, सामाजिक, सांस्कृतिक यर्थाथके चित्रण कैगिल कथा समेट्गिल बा । २०७० सालम नै थारु भासाके पौराणिक ऐतिहासिक विषयवस्तुके गाथाम आधारित ‘सख्या नाच गीतके पूरा पाठ’ प्रकाशन कर्ना अवसर जुटल । जुन गिट मै दुइ टिन बरस आघसे संकलन कैक पाण्डुलिपि तयार कैरख्नहु । यि पोष्टाके प्रकाशन युनिक नेपाल बर्दिया जिम्मा लिहल । यकर सम्पादन डा. गोपाल दहित कैडेल । असिक बिसा बिसा किताब लिख्ना क्रम चल्टी रह । कुछ समय मै कर्णाली प्रदेशके विकट जिल्ला कालिकोट, मुगुओहर जागिरके क्रमम हेराइल अवस्थाम रनहु । साहित्य लिख्नौटिम ओत्रा चासो निढारु । मुगुम जागिरके सिलसिलाम रहल ब्यालाम फेन काठमाडौँसे सर्वहारी का करटि भाइ ? अप्नेक त चामचिम बटि । कुछ पर्बत्वओहरिक जीवन भोगाइ लिख परल कैक गार खोड्डा कर्ल । मोर फुटकर रुपम विभिन्न पत्रपत्रिकाम प्रकाशित हास्यव्यङ्ग्य निबन्ध रह ओह दुनु भाइ मिल्क निकारी कल । उहाँ दाजुसे सहकार्य सहलेखनम ‘एक गोरुक बट्कुहि’ हास्यव्यङ्ग्य वि.स.२०७५ सालम संयुक्त रुपम प्रकाशन कर्लि ।मस्टर्वा जागिर सरुवा कर्ना महा कर्रा परठ मुले २०७५ सालके अन्तिम चैतम सुर्खेत सदरमुकाम कर्णाली प्रदेशके राजधानी वीरेन्द्रनगरम सरुवा हुइल । फेनसे आपन समुदायसे जोर पैनु । अइलक बरस भ्यावक घर कना एल्बमके अडियो गिटम म्युजिक भिडियो निर्माण कर्ना रहर जागल । सुर्खेतसे कौनो स्रष्टा थारु गिटम म्युजिक भिडियो नैबनैल रलह । ऊ काम फे मै रहर रहरम निर्माण कर्नु । वि.स. २०७६ सालम रसरस साली हमार… कना लोक छोक्रा दोहरी गिटम म्युजिक भिडियोले सुर्खेती थारु कलाकारिन् हौस्यैना काम करल ।
यहक्रमम थारु साहित्य सम्मेलनके चर्चा परिचर्चा चल्टी रह । कोरोनाके महामारीके कारण पाँचौ थारु राष्ट्रिय साहित्य सम्मेलन मोरङमा कर्ना कार्यक्रम स्थगित हुइल रह । पँचवा साहित्य सम्मेलन २०७७ सालम सुर्खेत कर्ना छलफल हुइ लागल । अप्नेक सम्मेलनम अम्मिनसम परगा नैदबैल हुई भाइ अप्नेकह खारा मारटि । सुर्खेतम जिम्मा लिह परल कना एकमेरिक नैतिक दबाब आइल । सुर्खेतम साहित्य सम्मेलन कराइ परठ कैक सुर्खेतके अग्रज व्यक्तित्व स्व.शनिसरा महत्तम फेन जोडबल कर्ल । ऊ ब्यालाम कैलालीके दिल बहादुर चौधरी, बर्दियाके सोम डेमनडौरा, बालिका सुर्खेतम कार्मठलो बनैल रलह । उहाँ हुकनक सरसल्लाह फे सुर्खेतम नै सम्मेलन करैना दबाब डेल । आदरणीय दाजु सुशिल चौधरी फे कल भाइ मन बलगर मन कराई मोर जनम घर फे सुर्खेत हो । भिडियो खिच्ना भान्जा दिर्घ चौधरी फे सुर्खेतम कराइ मामा मै फेन कोहलपुरसे जति सक्दो झट्ट आखन सहयोग करम कना बचन डेल । ओहअनुुसार सुर्खेतम मोर संयोजन ओ व्यवस्थापनम पँचवा थारु राष्ट्रिय सम्मेलन हुइल । सम्मेलन पाछ वि.स. २०७८ म सुर्खेतसे थारु जर्नल ‘लखागिन जर्नल’ मोर सम्पादनम प्रकाशन हुइल । लौव थारु संस्था लखागिन थारु उत्थान मञ्च कना स्थापना फे हुइल । यकरपाछ लगत्त थारु समुदायके ऐतिहासिक, पौराणिक विषयवस्तुम आधारित सबसे लम्मा समयसम नाच्जिना नाच सख्या नाचके डकुमेन्ट्री बनैना कामके सुरुआत हुइल । २०७८ म निर्माण करल ऊ डकुमेन्ट्री वि.स. २०८० कार्तिकम सार्वजनिक कर पैली । थारु समुदायके सामाजिक जनजीवन, रीटभाँट, रहनसहन, सुर्खेतके थारु तथ्याङ्क, थर उपथर, ब्यवहारिक रुपम प्रयोग कैजिना थारु शब्द, व्याकरण नेपाली भासक व्याकरणसे तुलनात्मक अध्यययन करल ‘हाम्रो थारु समाज र संस्कृति’ कना अनुसन्धानात्मक कृति वि.स.२०७९ सालम प्रकाशन कर्नु ।
वास्तवम कौनो फे प्रतिभाशाली मनै कुछ न कुछ कर्ना सोचले प्रेरित रठ न कि कुछ हासिल कर्ना या गुमैना । कुनै न कुनै दिन समय समय जरुर बदलठ कहसक मैया पिरिमके कविता लिख्ना पन्ना उमेर समयले परिपक्व लेखनओहर अग्रसर हुइल अवस्था रह । एकठो कहाइ फे बा–‘कर्म करो फलके आस नाकरो ।’ कना कहाइम विश्वास कर्ना मनै हुइटुँ । २०५१ सालसे सुरु करल साहित्यके यात्रा २०८१ म राज्यसे सम्मान पैना स्रष्टाम मै फेन पर ब्याला खुशी लागल बा । करिब तीन दशकठेसे निरन्तर थारु भाषा, कला, साहित्य, संस्कृति बारे खोजबिन कर्ना, कलम चलैना क्रम चल्टि रहल । तर कब्बु फे पुरस्कार ओ सम्मानके आश नैकैगिल । मुले आफन भाषा, साहित्य, संस्कृति बारे कलम चलैना सर्जक स्रष्टा हुकहन सम्मान ओ पुरस्कार आवश्यक बा कनासक लागठ । काखरकि ऊ एकठो हौसला हो यिहीसे स्रष्टा हुकहनके मनोबल उच्च बनाइठ ।
मै थारु भाषा साहित्यम कलम बिसैटि, चलैटि रहल अवस्थाम ‘थारु सख्या नाच गीतके पूरा पाठ’ २०७० म प्रकाशित हुइलक साल सर्वहारी दाजु कल रलह भाइ अप्नेक क्षेत्रीय प्रतिभा पुरस्कारके लाग दाबी कर सेक्ठी । यि पोष्टाके अनुसन्धान कैक संकलन कैना बरवार बात हो कल । ऊ ब्यालाम मै सोच्नु कि ओत्रा अब्बल साहित्यकार निहु कनासक लागल ओ चासो फे नैकर्नु । ओह बरस थारु भाषा तथा साहित्य मञ्च लमही देउखर, दाङसे छविलाल कोपिला गोचा हुक्र थारु भाषा साहित्यम योगदान कर्लक कैक सम्मान पत्रसे सम्मानित कर्ल । यिहीसे आघ कब्बु सम्मानित निहुइल मनै महि एक मेरके लौव ऊर्जा ओ जाँगर ठपल । छिटपुट रुपम बटुकुहि, कविता, लेख लिख्नाम निरन्तरता रहल । वि.स. २०७७ सालके पुस महिनाम बर्दियाके जंग्रार साहित्यिक बखेरीके दशवा बर्ष गाठके अवसरम विभिन्न जिल्लाके १० ठो स्रष्टा हुकहन् सम्मान कर्ना सूचीम रुपन्देहीके बमबहादुर थारु, बर्दियाके डा. गोपाल दहित, कैलालीके दिल बहादुर चौधरी लगायतके सूचीम मोर नाउँ फे दर्ज हुइल रह । यि मेरिक सम्मानले मोर लिखाइ, सिखाइम कलम टिस्लोर हुइटि गैल ।
“हम्र दुनुजे आफन थारु भाषा साहित्य, कला, संस्कृतिके बारेम योगदान पुगैलक कारण इ पुरस्कारके लाग दाबेदार रलहि सायद ओहमार छानगिल रलहि । हरेक भाषा, साहित्य, संस्कृतिम ज्ञान रहठ, विज्ञान रहठ, सञ्चार रहठ ओ ऊ ज्ञान, विज्ञानहसर्वव्यापी करैना कलमके महत्वपूर्ण भूमिका रठिस् । जुन मानवके अभिन्न अङ्ग बन पुगठ । थारु, कला, साहित्य, संस्कृति नेपालके ज्ञानके भण्डार हो । यिही आम सञ्चारम लान पर्ना जरुरी फे बा । आज देशम लोकतान्त्रिक गणतन्त्रके स्थापना पश्चात पुरस्कारम फे समावेशिताके सोचले गाउँ कोन्वाम रहल स्रष्टा हुकन फे अवसर मिलल महसुसले मन चौकस हुइलक अनुभूति कर्नु । ऊ दिन पुरस्कार ग्रहण कैक देशके एकसे एक क्षमतावान स्रष्टा हुकहनसे उक्वारभ्याट कर्ना मौका मिलल । हम्र पुरस्कृत सक्कु ठाउँके स्रष्टा हुक्र फोटो खिचोइली खुशी शेयर कर्लि ।“
नेपाल सरकारके प्रावधानअनुसार हरेक बरस संस्कृति, पर्यटन तथा नागरिक उड्डययन मन्त्रालयसे भाषा तथा साहित्य, संस्कृति विधाम प्रादेशिक प्रतिभा पुरस्कार प्रदान कर्टि आइल बा । यि विषय काठमाडौँम बैस्टि अइलक डा.कृष्णराज सर्वहारीह विशेष जानकारी रठिन् । उहाँ मन्त्रालयसे प्रकाशित विज्ञप्ती शेयर कर्टि सामाजिक सञ्जाल फेसबुकम लिख्ल– ‘संस्कृति, पर्यटन तथा नागरिक उड्डयन मन्त्रालयसे गैलक बरस आख्यानकार भाइ शेखर दहित क्षेत्रीय प्रतिभा पुरस्कार पैले रहिट । इहिसे पहिले अशोक थारु, महेश चौधरी, कृष्णराज सर्वहारी, फनिश्याम थारु, लक्की चौधरी, छविलाल कोपिला, बमबहादुर थारु साहित्यकार इ पुरस्कार पा सेक्ले बटाँ । कर्णाली प्रदेशसे मानबहादुर पन्ना यम्ने हकदार बटाँ । आउर प्रदेशके थारु साहित्यकार आइ हालि दावी करि ।’ कना स्टाटस्ले मन्त्रालयम आवेदन डेना विचार आइल । यि बारेम का कसिन प्रक्रिया बा कना बात बुझ्नु । हस्त लिखित निवेदनसहित व्यक्तिवृत विवरण, प्रकाशित कृति ओ मूल पोष्टा, विधा छुट्याख भर पर्ना स्वयम् उपस्थित होखन निवेदन दर्ता कर्वाइ पर्ना रलक । एकठो पुरस्कारके लाग काठमाडौँ जैना ओत्रा उचित नैलागल । निवेदनसहित कागजात हवाइजहाजमार्फत पठैनु । काठमाडौँम मोर भान्जा गोपाल चौधरी नागरिक लगानी कोषम जागिर खैठ । भान्जा हुकिहिन् ऊ निवेदन पेश कर लगैना जुगार लगैनु । दाजु सर्वहारीके सूचना, भान्जा गोपाल चौधरीके हाठ मोर लाग शुभ हुइल कनासक लागठ । ऊ पुरस्कारके लाग राज्य महि योग्य ठानल । कुछ महिना पाछ मन्त्रालयसे सूचना प्रकाशित करल भाषा तथा साहित्य विधाम कर्णाली प्रदेशके सुर्खेतके मानबहादुर पन्नाके नाउ बा कना सुचना तुरुन्ट लावा डग्गरके प्रधानसम्पादक छविलाल कोपिला डेल । महि यि बात सत्य हो कि निहो कना अप्रत्याशित खबरले मनम विभिन्न विचार ख्यालल। ठाउँ ठाउँसे हार्दिक बधाइके बौछार आइ लागल त विश्वस्त हुइनु ।
एकठो सामान्य खेती किसान कर्ना थारु किसानके छावा राज्यसे पुरस्कार ओ सम्मान पैना मोर लाग सगरमाथा चिउरल बराबर रह । ऊ ब्याला मै आपन डाइबाबन सम्झनु जे महि भुखपियास कटाक अक्षर चिन्हाइक लाग स्कुल पठैल । कर्णाली प्रदेशके माटी सम्झनु जहाँ मै जन्मनु, हुर्कनु, पहर्नु, जिन्गी जिए सिख्नु । आपन समुदायह सम्झनु जहाँ अथाह कला संस्कृतिके भण्डार बा, भाषा, साहित्य कला संस्कृतिके उत्थानके लाग कलम चलैना काम कर्नु, आज ओह समुदायके बारेम लिखल थारु कृति, पोष्टाले कर्णालीम फेन थारु बाट कना राज्यह अनुभूत करैलकम गर्व लागल । जे महि हरदम थारु भासाा साहित्यम कलम चलेनाम हौस्यैना, दालभातम अघाला चलैना, प्रेरणासहितके गरखोड्डा कर्ना द्वय कृष्णराज सर्वहारी, सुशिल चौधरी लगायत चिरपरिचिल व्यक्तित्व हुकहन् सम्झनु । राज्यसे असिख डेलक पुरस्कारले महि एक मेरिक जिम्मेवार लेखकक दर्ज कर्लक अनुभूत कर्नु । अम्हिन् फे आपन भासा, साहित्य, कला, संस्कृतिके विषयम ढेर कुछ कर पर्ना बा कना महसुुुस् हुइल । यि पुरस्कार प्राप्तले विगतसे अम्हिन् खन्गर, अर्थपूर्ण साहित्य लिखपर्ना कर्तव्य बोध हुइल बा ।
काठमाडौँ, सम्मान ओ दुर्घटना
संस्कृति, पर्यटन तथा नागरिक उड्डयन मन्त्रालयसे डेजिना प्रादेशिक प्रतिभा पुरस्कार प्रदान कर्ना तिथिमिति अइटि रह । ओहअनुसार काठमाडौँ जैना मनम बसेरा लेल रनहु । मन्त्रालयसे मिति २०८१ असार २७ गते पुरस्कार समर्पण कार्यक्रम कर्ना निश्चित हुइल रह । ओहअनुसार असार २५ गते काठमाडौँ जैना पिलेनके टिकट लेनु । २६ गते बिहान्ख ९ः३० बजे एयरपोर्टम पुग पर्ना रह । साहित्यकार सर्वहारीसे फोनम बातचित हुइल । उहाँ कल भाइ सुर्खेतम फुट्की मिलट कि नाइ एकदु किलो लन्बी अप्नेक भौजि सिह्राइल बा कल । सन्झेक वीरेन्द्रनगरके हाट बजारसे फुट्की लानके पोक्या बनाइ टनहुँ । ओहम एक बोटल सिधा मेटैना थारुनके चलनअनुसार डारुके पहुरा बनैनु । २६ गते बजारसे कुछ सरसमान ओ एक ठाउँसे पैसा लेना रह ओह कामम करिब ७ः३० बजे बिहान्ख भेड्डीम घरसे निकर्नु । बजारके मंगलगढीसे ठनिक पश्चिउ चौकम रत्न राजमार्गसे सडक क्रस करब्याला पछाडिसे दुसर बाइक ठोकडेहल । बाइक दुर्घटना हुइल । कसिक ज्यानम कुछ नैहुइल । करिउँ(कुब्बर)म चोट लागल । मै सडकमसे झरफराख उठ गैनु । बाइक ठोक्कुइएनके फेन जम्म हाठगोरा खुल्कल रलहिन् । होगिल लफडा, ९ः३० बजे एयरपोर्ट पुग्ना बा । यहर हुइल दुर्घटना । मने दुनु पक्षम ढेर चोटपटक नैलग्लक कारण पुलिस केस नैकर्ना ज्यान बाँचल यह नै सबसे बराभारी बात हो ओहमार आपन आपन उपचार कर्ना सहमतिम घटना रफडफा कर्लि । ओठेसे निक्रनु, कुछ समान लेनु ओ घर गैनु । कुछ खैनास नैलागल । पुरस्कार ठाप जैना खुशीले फेह्याइल मन मुर्झुरागिल रह । मन भोहर हुइल रह । काठमाडौ नैजाऊ कि फेन मन करैनु । सर्वहारी दाजुह फोन लगैनु ट कर्रसे चोट लागल निहो त आइ भाइ यह काठमाडौँम उपचार करैबि कना सल्लाह डेल । यहाँ कह्रिउ (कुब्बर) कर कर कर मच मच पिर बठ्ठा हुइटि रह । टैँके कह्रिउक हड्डी गरबर्वागिल फ्याक्चर होगिल कि कैक शङ्का लागटह । सशङ्किट मनले काठमाडौँ गैनु । सुर्खेतसे १० बजे उरल पिलेन करिब ११ः०० बजे त्रिभुवन विमानस्थलम अवतरण हुइल । उहाँ झन पिर बठ्ठा हुइ लागल । आपन झोला, पोक्या बोक्ना फे मुस्किल हुइ लागल । नेङ्ना फे मुस्किल हुइ सक लागल । जसिक टसिक एयरपोर्टसे बल्खु चौकसम गाडिम गैनु । दाजु सर्वहारीह रिसिभ करक लाग फोन लगैनु । उहाँ भेड्डीम बल्खुम आसेक्ल रलह । मै ऊ ब्याला गाडिमसे धौ धौ झर्नु लेकिन जेब्रा क्रसिङ कर्ना मुस्किल परगिल । ओठे रहल एकठो अपरिचित मनैयाह आग्रह कैख रोड क्रस कर्नु । भेड्डीम मुस्किलसे बैठ्नु । मोर पिर बठ्ठा १०० प्रतिशत पुगल रह । कि कहु सुट्जाऊ कहसक लागटह । मै दाजुह आग्रह कर्नु महि सिधे अस्पतालम उपचार कराइ लैजाइ दाजु मुनासक लागटा कनु । उहाँ सिधे कीर्तिपुर सामुदायिक हस्पिटलम लैगैल ।
जब अस्पताल पुग्ली ट नाउ दर्ता करैना समय ओराइ भिरल रह । दाजु भेड्डी पार्किङ कर लग्ल मै अस्पतालम टोकन सिस्टम रलक सेक नासेक मै नाउ दर्ता करैना ठाउँम पुग्नु त भिड देख्नु । झट्ट उपचार हुइ कैक ऐया आत्ठा कर्टि हनहनाइ लग्नु ओ मोटर बाइक एक्सिडेन्ट भएर सुर्खेतसे अइनु कनु त तुरुन्त इमरजेन्सीम पठ्वाडिहल । इमरजेन्सी वार्ड पूरा प्याक रह । दाजु पर्चा कट्वाए गिल मै एकठो बेड खालि डेख्टि कि झबाकसे सुट्कगैनु । ऊ बेडके बेरम्ह्या ट्वाइलेट गिल रह काहु । ट्वाइलेटसे फिर्ता आइल । ऊ कह लागल इ त मोर बेड हो । महि उठ्वाडिहल मै लग्गे कुुर्सिम बैस्नु दुठो नर्स आक मोर जरजुरी प्रेसर नप्ल । इन्चार्ज एकठो सुइ लिख्डिहल । नर्स ऊ सुइ पचपचसे लग्वाडिहल । महि सौ के उननसौ नै हुइल रह ।
इमरजेन्सीके डक्टर्वा ढाडके एक्सरे गरेर हेर्नुपर्छ कहल । कुछ समय पाछ दाजु बिल कटोइल मोर एक्सरे कर्ना पाला आइल । ह्विल चियरम बैठ्वाख उपर एक्सरे कक्षम लैजैना सुरसार कर्ल तर एकठो जन्नि मनैया मोर पाल्या बा कैक विरोध कर लागल फेनसे महि कुर्सिमसे उठ्वाडेल । पाछ पाल्या आइल । एकठो नर्स बाबु महि ह्विल चियरम डोरैटि उप्रक टल्हाम लैगिल । सँगसँग दाजु सर्वहारी फे रलह । मन डरभुटसल रह । टैके कह्रिउ टुगगिल कहु । जिन्गीभर ह्विल चियरम टैके बैस पर कना एक मन कह । इ मन कना चिजह फे आजसम कुइफे आम्हिन्सम नियन्त्रण कर्ना, नप्ना यन्त्र बनाइ निसेक्ल हुइट । ऊ ब्याला अशक्त, अपाङ्ग हाठगोरा टुटल मनैनके जिन्गी सम्झनु । मनैनके जुनी कब का हुइना बा कुछ पट्ट निरहठ । ऊ ब्यालाम खुब मन छट्पटाइल । दाजु सर्वहारी आपन सग्गे भैयाह स्याहारसुसार करपर्ना सक्कु भूमिका निभैल । चिन्ता जिन करी भाइ झट्टहे चुम्मर होजिबि । तर हड्डीके एक्सरे आइ कलसे ढुक्क हुइ कैख सान्त्वना डेटि रलह ।
उप्रक टल्हाम एक्सरे कक्षम पैठ्टि किल मोर पाल्या आगिल । एक्सरे क्वाठाम उल्टाबिल्टा सुट लगाख एक्सरे करल । एक्सरेके रिपोर्ट फे झट्टहे डिहल । कीर्तिपुर अस्पतालके सरसफाइ, काम कर्ना शैली, व्यवस्थापन महि खोब मन परल । बेरमेनके अवस्था हेर्ख फटाफट चेकजाँच कर्ना तरिका रलक । मोर रिर्पोट हेर अर्ठोपेडिक हड्डीसम्बन्धी डक्टरोन टुरुन्ट आक उल्टाबिल्टा एक्सरे हेर्ल । हड्डीम कुछ असर निहो । कर्रसे चोट लग्लक कारण बहुट पिरबठ्ठा हुइलक जानकारी करैल । पाँच दिनके दबाइ लिख्डेबु चोखाजाई चिन्ता जिनकरो कैख सुझाब डेल । डरभुटसल मन बल्ल हलुक हुइल । सुरुम नर्सक लगाइल सुइ फे काम करल काहु चोडगर लाग लागल । करिब ३ घण्टा पाछ खरखरिट नेङ्ना होगिनु । डक्टरोक लिखल दबाइ नियमित सेवनले धिर धिर चुम्मर हुइलक महसुस हुइ लागल ।
अस्पतालसे दाजुक कीर्तिपुरके भट्केपाटीम रलक घरओहर लम्गर्लि । घरम जैटि कि भौजि मिठ चिया खुवइली । चिया बिस्कुट खाक दबाइ खाक बिस्ताराम आराम कर्नु । सन्झाख दाजुसे बैठ्ख सट्कोइना योजना बिमारके कारण बन्द होगिल रह । तर दाजु देउखरके पुरान मैगर सङ्घर्या शत्रुघन चौधरीह बलावा कर्ल । मोर लैगिल कोदोक पहुरा दुनुजे मिठ फुट्की, सिकार, मच्छीक आराकसँग सटकोइल मै गफगाफम साथ डेनु । खानपिन पाछ राट्ख घरओहर फोन लगैनु । बुह्र्या, लर्कापकन सब ठिकठाक रलक स्वास्थ्य अवस्थाके बारेम जानकारी करैनु । दुर्घटनाले घाइट्या हुइल अवस्थाम काठमाडौँ गैलक कारन चिन्ता रलहिन् मुले भगवानके कृपाले मजसे उपचार हुइलक ओहर्से ढुक्क हुइल बटैनु । ओ दोसर बिहान्नी पुरस्कार ठाप जैना मिठ कल्पना लेटि कब सुट्नु पट निपैनु ।
पुरस्कार ग्रहण, खुशी ओ बधाई
जीवनम हरेक मनैनके फरक स्वभाव रहठ, फरक विचार रहठ तर मानवीय साझा गुणके रुपम सुखम रमैना, चौकस मन हुइना, दुःखम मन भोहर हुइना, कबुकाल मनम ईश्र्या डाहा हुइना मानवीय संवेग हो । कर्णाली प्रदेशसे राज्यसे डेना क्षेत्रीय प्रतिभा पुरस्कार पैना मोर लाग फे खुशीक बात रह । इ खुशीम आफन मनैन खबर कर्ना, सँगसँग कार्यक्रमम जैना किहि नि लागि ओहमार मै आफन जिन्गिक प्यारीह सँग लैजैना इच्छा रह तर टार नैबल । काठमाडौँम रलक भान्जा गोपाल चौधरीह फोन कर्नु । भान्जा कार्यक्रम ओराइल ट अइल । सर्वहारी दाजुक एकठो प्रोजेक्टके काम नाकैख निहुइना हुइलक कारण महि किर्तिपुरके चौकसम पुगाक पठाओम जैना व्यवस्ठा मिलाडेल । मै अकिली हिट्वासक राष्ट्रिय नाचघरके सभाहल जमलम कार्यक्रमम गैनु । थारु मानक भाषा मानकीकरण कार्याशाला गोष्ठि २०७८ साल भक्तपुरके बोडेम हुइल कार्यक्रमम परिचय हुइल सप्तरीके गोचा बुद्धसेन चौधरी फे मधेश प्रदेशसे क्षेत्रीय प्रतिभा पुरस्कार पैनाम नाउ रहिन् । मै उहाँह फोन कर्नु । उहाँसे सँगे एक्क ठाउँम पुरुब ओ पश्चिउके थारु सँगे बैठ्ली त खुशी लागल ।पाछे सप्तरीके दुसर संघर्या सियाराम चौधरी उपस्थिट हुइल । हम्रे सँगे फोटु फे खिच्ली । उहाँसे गफगाफ हुइल । उहाँ कल मै त सुर्खेतके दुसर मान बहादुर ठन्ले रहँु, अप्नेक पो रलक कैक आश्चर्य प्रकट कर्ल ।मै उहाँ हुकिहिन् अनुसन्धान करल ‘हाम्रो थारु समाज र संस्कृति’ किताब डेनु ।
हम्र दुनुजे आफन थारु भाषा साहित्य, कला, संस्कृतिके बारेम योगदान पुगैलक कारण इ पुरस्कारके लाग दाबेदार रलहि सायद ओहमार छानगिल रलहि । हरेक भाषा, साहित्य, संस्कृतिम ज्ञान रहठ, विज्ञान रहठ, सञ्चार रहठ ओ ऊ ज्ञान, विज्ञानहसर्वव्यापी करैना कलमके महत्वपूर्ण भूमिका रठिस् । जुन मानवके अभिन्न अङ्ग बन पुगठ । थारु, कला, साहित्य, संस्कृति नेपालके ज्ञानके भण्डार हो । यिही आम सञ्चारम लान पर्ना जरुरी फे बा । आज देशम लोकतान्त्रिक गणतन्त्रके स्थापना पश्चात पुरस्कारम फे समावेशिताके सोचले गाउँ कोन्वाम रहल स्रष्टा हुकन फे अवसर मिलल महसुसले मन चौकस हुइलक अनुभूति कर्नु । ऊ दिन पुरस्कार ग्रहण कैक देशके एकसे एक क्षमतावान स्रष्टा हुकहनसे उक्वारभ्याट कर्ना मौका मिलल । हम्र पुरस्कृत सक्कु ठाउँके स्रष्टा हुक्र फोटो खिचोइली खुशी शेयर कर्लि ।
असार २७ गते पुरस्कार ग्रहण कैक २८ गते घर फिर्ता हुइना सेडुल रह । तर ठुम्रार साहित्यिक श्रृङ्खलाके घरगोस्या डा. कृष्णराज सर्वहारी अनुरोध कर्ल भाइ काल्ह असारके अन्तिम सच्चिर हो, बैठी अप्नेक बर्का पहुनाइम ९९औ भागम हार्दिक बधाइ कार्यक्रम ढरबि कैब सुनैल । इ बात मोर लाग खुशीक बात रह । मै ओह कार्यक्रमके लाग २९ गतेक सन्झक टिकट बुक करैनु । ठुम्रार साहित्यिक श्रृङ्खला सञ्चालन १२ बरस आघसे लग्ढार थारु भासक कविता वाचन कर्ना, साहित्यकार हुकहनसे उक्वारभ्याट कर्ना, यि काइदा महा मजा लागल । इ श्रृङ्खलाके आयोजक संस्था बर्दियाली थारु विकास मञ्च, चम्पन सांस्कृतिम समुह, निस्राउ गु्रप प्रा.लि, राष्ट्रिय थारु कलाकार मञ्च धेर थारु संघसंस्थाके आयोजनाम यि कार्यक्रम कर्टि आइल बा । यिहीसे आघ इ कार्यक्रमके बारेम सुनलके रनहु । प्रत्यक्ष सहभागिता हुइना अवसर जुरल निरह । अप्खिस जुरल ऊ फे बर्का पहुनाको रुपम बधाइ लिह पैना मोर लाग धेर खुशीक बात रह । विभिन्न जिल्लाके साहित्यकारनसे साक्षात्कार हुइल । मै एकठो कविता फे सुनैनु ।ओह कार्यक्रमम अइलक दाङक सरला चौधरीसे उक्वारभ्याट हुइल । उहाँ इन्डिजिनियस टेलिभिजनसे प्रसारण हुइना थारु भासक इपिसोड चली गोचाली कार्यक्रम चलैठी । उहाँ चली गोचालीके लाग अन्तर्वार्ता लेना आग्रह कर्लि । मोर ३ः३० बजे ओहर टिकट हुइलक कारण एक बजेसम अन्तर्वाता डिह सेक्जैना सेडुल मिलागिल । ओहअनुसार नयाँ बानेश्वरम इन्डिजिनियस टेलिभिजनम दाजु सर्वहारीसँग गैली अन्तर्वार्ता डेनु । इ फेन एकठो बह्र्या अवसर के रुपम लेल बाटु ।
ओर्रानिम
मनै सामाजिक प्राणी हुइट ओहमार मनैनसे विभिन्न पाटो जोरगिल रहठ । मै फेन थारु भासा, साहित्य,कला, संस्कृतिसे जोरगिलक कारण प्रत्यक्ष अप्रत्यक्ष धेर व्यक्तित्व हुकहनसे जोरगिल सक लागठ । भासा, साहित्यक, कला, संस्कृति कना अकिली बचैना सम्भव फे नैहो । यमन सब बौद्धिक वर्ग जोर पर्ना जरुरी बा । ओहमार विभिन्न माध्यमसे थारु साहित्यके शिखर व्यक्तित्व कृष्णराज सर्वहारी अप्नकिल नाहि हर जिल्लाके साहित्यकारन हौस्यैना, गरखोड्डा कर्ना काम कर्ठ । मै फ उहाँप्रति ऋणि बटुँ । काम कर्ना मनैन प्रोत्साहन कर परठ कना जौन मान्यता बा उहिह राज्य फे प्राथमिक डेहल महसुस् करैल बा । असहख हमार साहित्यकार, समाजसेवी, सर्जक हुक्र आघ बह्रही त भासा साहित्यम फेन संरक्षण हुइने बा । काठमाडौँ पुरस्कार ठाप गिलम धेर स्रष्टा हुकहनसे अनुभव आदान प्रदान कर्ना अवसर मिलल । काम कर्टि गैलसे एक न एकचो सम्मानके पगरी गुँठ मिलट कना फे अनुभूति हुइल बा । आम्हिन् घैखरसे साहित्यिक क्षेत्रम लग्ना प्रेरणा जागल बा । आपन भाषा चिन्हैलक कारण विभिन्न थारु संघसंस्थामसे फेन बधाइ सम्मानले स्रष्टा हुकहनके योगदानके कदर कर्ना संस्कारके वृद्धि विकास हुइटि बा । काठमाडौँम रहल ब्यालाम सम्मान ओ बधाइ डिहल ठुम्रार साहित्यिक श्रङ्खलाके टिम, थारु भसा साहित्य केन्द्र नेपाल, काठमाडौँ, इन्डिजिनियस टेलिभिजनके चली गोचाली कार्यक्रमके टिम सबजहन हृदयसे धन्यवाद ओ आभार प्रकट फे कर चाहटु । तर विगतसे हालसम जिन्गिभर जानटसम सुर्खेतक माटि चिन्हैना, समुदाय चिन्हैना कामम लग्नु, लग्टि फे बाटु । लखागिन थारु उत्थान मञ्च सुर्खेतसे बधाइ कार्यक्रम करल तर थारु कल्याण कारिणी सभाके स्थापना कालसे हालसम विविध जिम्मेवारीम बैठ्ख काम कैगिल तर एक शब्दसम बधाई खर्च नैकरल आपन गृह जिल्लासे असिन व्यवहारले दुःखी फे बनाइल । असिन संस्कारले हमार स्रष्टा हुकनक मनोबल कसिक बह्री कनासक अनुभूत कर्नु । इ अवश्य फे मजा नैहो । हम्र आगामी दिनम व्यक्तिगत ईश्र्या द्धेष हटाइ पर्ना जरुरी बा । थारुनके छाता संगठनसे असिन व्यवहार हुइना पक्क फे मजा पक्ष नैहो ।
