शनिवारे मेलासे महिला उद्यमी उत्साहित

पहुरा समारदाता
धनगढी, ९ अगहन । कैलालीके धनगढी उपमहनगरपालिकासे अगहन १ गते शनिच्चरसे सुरु करल ‘शनिवारे महिला उद्यम मेला’ मे धनगढी उपमहानगरपालिका वडा नम्बर ३ के निर्मला सिंह सेलरोटीके स्टल राखल रहिट । घरमे समय बिटैना निर्मला ‘शनिवारे महिला उद्यम मेला’ के कारण अपन आम्दानीके डगर खुललमे उत्साहित बटी ।

ओस्टेक करके, मोहनपुरके उमा तामाङ शनिवारे मेलामे अचारके स्टल राखल रहिट । अघिल्का शनिच्चर स्टल बुकिङ हुइल कारण अचारके स्टल धारे नैपाइल बटैना तामाङ यी बार चार मेरके अचार बिक्रीके लाग धारल रहिट । मेलाके कारण अचार बनैना उत्साह बह्रल ओ अपन जस्टे सीप रहल महिलाहे आम्दानी कैना सहज हुइल तामाङके कहाई बा ।
‘घरमे बैठे पर्ना ओ बनाइल अचार बिक्री कैना रहे,’ उहाँ कहली, ‘शनिवारे महिला उद्यम मेला सञ्चालन हुइलपाछे अब अचार बिक्री ओ समय बिटैना सहज हुइल बा ।’

अगहन ८ गतेके शनिवारे मेलामे धनगढीके महिला उद्यमीसे ६० ठो स्टलमे अपने बनाइल बस्तु ओ खाना तथा खाजाके परिकार धारल रहिट । मेलामे रानाथारु, चौधरी तथा पहाडी खानाके परिकार धारल रहे । मेला लगैना सुरू हुइल ओरसे घर बैठल बेरोजगार महिलाहे आम्दानीके अवसर जुटल धनगढी वडा नम्बर ८ के रन्जिता राना बटैली । उहाँ उपमहानगरसे मेला लगाई लागल ओरसे महिलाके लाग आम्दानी कैना डगर खुलल बटैली ।

अगहन महिनाक पहिल शनिवारसे धनगढीके पार्कमोडमे घरमे बैठल महिला उद्यमीहे बजारसँग जोरना उद्देश्यसे धनगढी उपमहानगरपालिकासे ‘शनिवारे महिला उद्यम मेला’ के आयोजना करल हो ।

‘शनिवारे महिला उद्यम मेला’ हरेक शनिवार दुपहर २ बजेसे साँझ ६ बजेसम आयोजना हुइठ । मेलामे सुदूरपश्चिमके नेवारी खाजासे थारु समुदायके परिकार ढिकरी, गेंगटाके मासु, लोकल मुरगीके परिकार, घोंगी तथा पहाडी समुदायके सेलरोटी, कोदोके माडा, कोदोके सेल, फाउने माडा, बटका, निस्सोसे, मासके पुरी लगायतके टमान परिकार धारल रहठ
।
ओस्टेक करके मेलामे महिला उद्यमीसे घरमे बनाइल झोला, चप्पल, हातले बनाइल सामान, कपडा, दुना टपरी, फाइबरके घर सजावटके फूल महोत्सवके आकर्षण रहल बा । सीप सिखल मने कहु कटै व्यवसाय नैकरल महिलाहे निःशुल्क बजारके अवरस डेना उद्देश्यसे शनिवारे बजार सुरू करल धनगढी नगरप्रमुख गोपाल हमाल बटैलै ।

पहिल दिन अर्थात् अगहन १ गते धारल ५६ ठो स्टलसे दुईलाखके कारोबार हुइल ओ दुसरा दिन अगहन ८ गते ६० ठो स्टल धारल धनगढी उपमहानगरपालिका जनैले बा । मेलामे उद्यमी महिलासे उत्पादन करल सामग्री ओ परम्परागत खानपानके स्टल रहल बा । मेलामे सस्ता ओ ताजा खैनचिजके साथे सांस्कृतिक कार्यक्रमसे अपनहे बहुट रमाइलो लागल स्थानीय चेतराज जोशी बटैलै ।

उहाँ कहलैे–‘शनिवार विदाके दिन हुइल ओरसे घरमे दिन कटैना समस्या हुइना करल रहे । उद्यम मेलासे समय कटैना ओ ताजा अर्गानीक खैना चिजके साथे सांस्कृतिक कार्यक्रम हरे पाके खुसी लागल बा ।’ जोशी मेलामे छावाछाईसहित आइल रहिट ।
मेलामे टमान परम्परागत खाना तथा खाजाके परिकार बनाई जन्ना महिलाके लाग आम्दानीके डगर खुलल मेलामे आइल उद्यमी महिलाके तर्क बा । महिलाहुक्रे समूहमे मिलके समेत स्टल धारले बटै ।

ओस्टेक मेलामे नृत्य प्रतियोगितासहित टमान सांस्कृतिक कार्यक्रमसमेत सञ्चालन हुइठ । मेलामे बालबालिकासे खेले मिल्ना प्ले–स्टेशनसमेत धारल बा । व्यवसाय प्रवृद्धनसंगे स्थानीय कला ओ संस्कृतिके जगेर्ना कैना अइना दिनमे लग्ना मेलामे तालिकाअनुसार टमान कार्यक्रम कैना उपमहानगर जनैले बा ।

मेलामे खानेपानी, विद्युत्, शौचालय, स्टल तथा टेन्ट, टेबुल, कुर्सी, स्वास्थ्यकर्मीके टोली लगायत व्यवस्थासमेत रहल बा । धनगढीमे स्थायी बसोबास करटी आइल महिला अपन सीप अनुसारके सामग्री तथा बस्तु बिक्रीवितरण कैना मेलाके आयोजना करल नगरप्रमुख हमाल बटैलै ।

‘धनगढी उपमहानगरपालिकासे विशेष करके महिलाहे लक्षित करके स्वरोजगार बनैना लक्ष्यसहित शनिवारे महिला उद्यम बजारके व्यवस्था करल होֹ, नगरप्रमुख हमाल कहलै, ‘महिला केल सहभागि हुई पैना मेलामे अपने जानल परम्परागत खाना, सीप, उत्पादन करल बस्तुके बिक्रीवितरण कैना, टमान संघ÷संस्थासे डेहल तालिमसे सीप पाइल महिला सहभागि हुई पैही ।’ अब्बे धनगढीके महिलाहे प्राथमिकता डेना ओ विस्तारे अन्य पालिकाके महिलाहेफे अवसर डेना नगरप्रमुख हमाल बटैलै ।

स्कुले बालबालिकाफे खुसी

टमान परम्परागत खाना तथा खाजाके परिकार बनाई जन्ना महिलाके लाग आम्दानीके डगर खुलल मेलामे आइल उद्यमी महिलाके तर्क बा । महिलासे समूहमे मिलके समेत स्टल धारल रहिट । ओस्टेक मेलामे रहल सांस्कृतिक प्रतियोगिता भाग लेहे आइल विद्यालयके बालबालिका समेत बहुट खुसी विल्गाइठ ।

धनगढी वडा नम्बर १६ के बेहडाबाबा माध्यमिक विद्यालयके छात्रा पहिल चो मेलामे आइल ओ बहुट रमाइलो लागल बटैलै । नृत्य देखाई बेहडाबाबा विद्यालयसे छात्राहुकनके दुई समूह आइल रहे । धनगढीके १० ठो विद्यालयके विद्यार्थी नृत्य प्रतियोगितामे भाग लेहल रहिट ।