कैलारीमे प्रभातफेरी तथा विविध कार्यक्रम
पहुरा समाचारदाता
हसुलिया, १० अगहन । लैंगिक हिंसा विरुद्धके १६ दिने अभियान अन्र्तगत आज पहिल दिन कैलारी गाउँपालिकामे प्रभातफेरी तथा विविध कार्यक्रम कैगिल बा ।
कैलारी गाउँपालिका महिला तथा बालबालिका शाखाके आयोजना तथा कैलारीहे कार्य क्षेत्र बनाके विविध कार्यक्रम संचालन करटी टमान संघसंस्थाके समन्वय सहयोगमे प्रभातफेरी तथा विविध कार्यक्रम कैगिल हो ।
‘हामी सबैको प्रतिवद्धताः लैगिक हिंसा अन्त्यको लागि ऐक्यवद्धता’ कना मुल नाराके साथ प्रभातफेरी कार्यक्रम अन्र्तगत हसुलिया बजार परिक्रम कैगिल हो । महिला हिंसा न्यूनिकरण सम्बन्धी सचेतनामूलक प्ले कार्डसहित प्रभातफेरीपाछे कोणसभामे परिणत हुइल रहे ।
गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे हुइल कार्यक्रममे सम्बोधन करटी उहाँ महिला हिंसाके घटनामे वृद्धि बटैली ।
उहाँ कहली, ‘ढेर जैसिन महिलाहुक्रे कौनो ना कौनो ओरसे हिंसा पीडित बटै । मने महिलाहुक्रे अपन उप्पर हुइल हिंसाहे बाहेर नैल्यानल कारण केल घटना डेखा परल नैहो । एक ठो महिला उप्पर घरसे हिंसा सुरु हुइठ काम कैना ठाउँमे समेट पीडित हुइल अवस्था बा ।’ हिंसा न्यूनिकरणके लाग आब सहके नाही, उहीहे बाहेर ल्यन्ना जरुरी रहल गाउँपालिका उपाध्यक्ष भगवतीकुमारी चौधरी बटैली ।
कार्यक्रममे कैलारी गाउँपालिकाके प्रमुख प्रशासकीय अधिकृत खगेन्द्रराज जोशी, वडा नम्बर ३ के वडा अध्यक्ष सन्तराम चौधरी, वडा नम्बर ५ के वडा अध्यक्ष विष्णु प्रसाद चौधरी, कार्यपालिका सदस्यहुक्रे, शिक्षा शाखाके प्रमुख गणेश प्रसाद मिश्र, सामाजिक शाखा प्रमुख यगम कलेल, महिला तथा बालबालिका शाखाके प्रमुख बालकुमारी चौधरी, कैलारीमे रहिके महिला तथा मानव अधिकारके क्षेत्रमे कार्यरत रहल टमान संघसंस्थाके प्रतिनिधिहुक्रे, सहकारी सस्थाके प्रतिनिधि, टमान विद्यालयके विद्यार्थी, शिक्षक, सुरक्षा निकायके समेट सहभागिता रहे ।
लैंगिक हिंसा विरुद्धके १६ दिने अभियान अन्र्तगत अलग–अलग दिन अलग–अलग कार्यक्रम कैना कैलारी गाउँपालिका महिला तथा बालबालिका शाखाके प्रमुख बालकुमारी चौधरी जनैली ।
