धनगढीमे अतिक्रमित सडक ओ सार्वजनिक जग्गा खाली कैटी

पहुरा समाचारदाता
धनगढी, ११ अगहन । कैलालीके धनगढीमे अतिक्रमण करके निर्माण करल संरचना हटाई लागल बा । धनगढी उपमहानगरपालिकासे सडक ओ सार्वजनिक जग्गामे करल अतिक्रमण हटाई लागल हो ।

अतिक्रमण हटैना एक हप्ताभिटर फिल्डमे जाके अतिक्रमित क्षेत्रमे रेखांकन कैना हुइल बा । गैल वर्ष उपमहानगरसे ५ किलोमिटर क्षेत्रमे खोलानालाके अतिक्रमण हटाइल रहे । यी वर्षफे खोलानालाके ५ किलोमिटर क्षेत्रमे करल अतिक्रमण हटैना तयारी बा ।

सडक क्षेत्र, खोलानाला, ताल तलैया ओ सार्वजनिक क्षेत्रमे हुइल अतिक्रमण हटैना उपमहानगरसे गुरूयोजना बनैले बा । गैल वर्ष १३ ठो सार्वजनिक ताल ओ ५ किलोमिटरमे हुइल खोलानाला अतिक्रमण हटाइल उपमहानगरसे यी वर्षफे अतिक्रमण हटैना अभियानहे निरन्तरता डेहल बा ।

सडक मापदण्ड, भवन निर्माण संहिता ओ भवन निर्माण मापदण्ड विपरीत निर्माण हुइल संरचना हटैना कामहे यी वर्षफे निरन्तरता डेना डिभिजन इन्जिनियर दिजराज भट्ट बटैलै । ‘गैल वर्ष अतिक्रमित १३ ठो ताल खाली करलमे यी वर्षफे अतिक्रमणमे परल ताल खाली कैना योजना बा ।

गैल वर्ष भौतिक संरचना ओ खेत बनाइल १३ तालके अतिक्रमण हटाइल हो’, उहाँ कहलै, ‘ताल खाली कैना अभियानसे यी वर्षफे निरन्तरता पैना बा कलेसे खोलानाला ओ सार्वजनिक क्षेत्रके अतिक्रमण हटैना गुरूयोजना बनाइल बा ।’ उपमहानगरपालिकासे गुरूयोजना बनाके खोलानाला, ताल–तलैया, सडक ओ सार्वजनिक क्षेत्रके अतिक्रमण हटैना हुइल बा ।

अतिक्रमण हटैना कागजी प्रक्रिया सेक्के अइना हप्तासे रेखांकन कैना ओ लगत्ते अतिक्रमण हटैना उपमहानगरसे अतिक्रमित खोलानाला ओ ताल तलैया खाली कैना इन्जिनियर भट्ट बटैलै । उपमहानगरपालिकासे विगतमे नगर विकास समितिसे नदी ओ खोलानालाके जग्गा समेत बिक्री करल रहे । मने, पानीके बहाउ क्षेत्र व्यक्तिके नाममे दर्ता हुइलेसे सेटव्यागभिटरे कौनो संरचना बनाई नैपैना नियम बा ।