परिवार नियोजन शिविरमे २६ जाने सेवा लेलैं

पहुरा समाचारदाता
हसुलिया, ११ अगहन । कैलारी गाउँपालिकाके बसौटी स्वास्थ्य चौकीमे मंगरके रोज संचालन हुइल परिवार नियोजन शिविरमे २६ जाने सेवा लेले बटै ।

स्वास्थ्य कार्यालय कैलालीके आयोजना तथा सुनौलो परिवार नेपाल (मेरी स्टोप्स नेपाल)के सहकार्य ओ कैलारी गाउँपालिकाके समन्वयमे परिवार नियोजन सम्बन्धी स्थायी बन्ध्याकरण (पुरुषहुकनके लाग भ्यासेक्टोमी तथा महिलाहुकनके लाग मिनिल्याप) सम्बन्धी निःशुल्क शिविर संचालन हुइल रहे ।

उ शिविरमे २६ जाने महिला केल स्थायी बन्ध्याकरण मिनिल्याप सेवा लेहल कैलारी गाउँपालिका स्वास्थ्य शाखाके सिअनमी अनिता चौधरी जानकारी डेली ।

उहे अवसरमे कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल एक कार्यक्रमके विच स्थायी बन्ध्याकरण मिनिल्याप सेवा लेहल महिलाहुकनहे जार महिनामे ओरहक लाग ब्याङकेट वितरण कैगिल बा । कार्यक्रममे सम्बोधन करटी उहाँ सन्तानके रहर पुगल महिलाहुकनके लाग निःशुल्क शिविर सुनौनो अवसर रहल बटैली ।

परिवार नियोजन सम्बन्धी स्थायी बन्ध्याकरण (पुरुषहुकनके लाग भ्यासेक्टोमी तथा महिलाहुकनके लाग मिनिल्याप) सम्बन्धी निःशुल्क शिविर कैलालीके ११ स्थानीय तहमे रहल स्वास्थ्य संस्थामे यिहे अगहन ५ गतेसे सुरु हुके अगहन २५ गतेसम संचालन हुइटी रहल बा ।