कैलारीसे स्वास्थ्य स्वयं सेविकनहे सम्मान

पहुरा समाचारदाता
हसुलिया, २० अगहन । २१ औं महिला सामुदायिक स्वास्थ्य स्वयं सेविका दिवसके अवसरमे कैलारी गाउँपालिकासे प्रोत्साहन स्वरुप स्वास्थ्य स्वयं सेविकाहुकनहे सम्मान करले बा ।

विफेक रोज कैलारी गाउँपालिकाके आयोजनामे मनागिल २१ औं महिला सामुदायिक स्वास्थ्य स्वयं सेविका दिवसके अवसरमे नौ वडाके १ सय २५ जाने महिला स्वास्थ्य स्वयं सेविकाहुकनहे सम्मान कैगिल हो ।
दिवसके अवसरमे पालिकाके आयोजनामे हसुलिया बजारमे ¥यालीपाछे औपचारिक कार्यक्रम कैके प्रोत्साहनसहिट सम्मान करल रहे ।

निस्वार्थ सेवा प्रदान करटी आइल महिला स्वास्थ्य स्वयं सेविकाहुकनहे व्याग, छाता, इलेक्ट्रिक टर्च ओ डिजिटल थर्मामिटर प्रदान करके सम्मान करल कैलारी गाउँपालिका स्वास्थ्य शाखा प्रमुख नरेशकुमार चौधरी बटैलै । पालिकासे महिला स्वास्थ्य स्वयं सेविकाहुकनहे विगतके बर्षसे सम्मान करल ओ वडा स्तरसेफे आ आपन तरिकसे सम्मान करटी आइल उहाँ जनैलै ।
ओस्टेक करके महिला स्वास्थ्य स्वयंहुक्रे सेवा निवृत हुइलपाछे सम्मान स्वरुप एकलाख रुप्या नगदसहिट विदाई करटी रहल उहाँ जनैलै ।

कमैना बेला समाजसेवामे समय चलजैना ओ सेवा निवृत हु्इलपाछे खाली हात लौटे पर्ना अवस्था रहे,’ स्वास्थ्य शाखा प्रमुख कहलै, ‘पहिले यी सुविधा नैरहे । महिला स्वास्थ्य स्वयं सेविकाहुकनहे प्रदान करल सेवाके सम्मानके लाग गैल बरससे यी सुविधा थप कैगिल हो ।’

पालिकासे गैल आर्थिक बरसके बजेटसे सेवा निवृत हुइल ६ जाने महिला स्वास्थ्य स्वयंहुक्रनहे एक÷एक लाख रुप्यासहित स–सम्मान विदाई प्रदान करल जनैलै । ओस्टेक करके महिला स्वास्थ्य स्वयं सेविकाहुक्रनके तलब नैरहल ओरसे बैठक भत्ता, पोशाक भत्ता प्रदान करटी रहल उहाँ जनैलै ।

कार्यक्रममे कैलारी गाउँपालिकाके प्रमुख प्रशासकीय अधिकृत खगेन्द्र राज जोशी महिला स्वास्थ्य स्वयं सेविकाहुक्रे स्वास्थ्य ओ सामाजिक क्षेत्रमे भारी योगदान करल बटैलै । उहाँ कहलै, ‘महिला स्वास्थ्य स्वयं सेविका गाउँघरके डाक्टरके रुपमे काम करठै । कोई महिला गर्भवती हुई बेला होए वा मेरमेराइक खोप संचालनके बेला होए, महिला स्वास्थ्य स्वयं सेविकाहुकनके भारी डेना बा । उहाँहुक्रे अपने दुःख पाकेफे और जानेक सेवा डेहक लाग रातदिन नैकहिके खाटल बटै ।’

कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी दिवसके अवसरमे शुभकामना डेटी महिला स्वास्थ्य स्वयं सेविकाहुुकनके काम सह्रनिय रहल बटैलै । पहिले–पहिले घरमे बच्चा जल्मैना चलन रहे, जिहीसे डाई ओ लर्काके ज्यान जैना करे,’ उहाँ कहलै, ‘महिला स्वास्थ्य स्वयं सेविकाहु्क्रे सरसल्लाह डेहल ओ जनचेतना फैलाइलपाछे अब्बे स्वास्थ्य संस्थामे जाके बच्चा जल्मैना करठै । जिहीसे मृत्युदर घटल बा ।’

वडा नम्बर ५ के वडा अध्यक्ष विष्णु प्रसाद चौधरी महिला स्वास्थ्य स्वयं सेविकाहुक्रे निस्वार्थ भावनासे सेवा प्रदान करटी आइल ओरसे बनोबल बह्रैना जरुरी रहल बटैलै । उहाँ कहलै, ‘महिला स्वास्थ्य स्वयं सेविका कोइ घरमे आपात विपत परल बेला सेवा प्रदान करठै । ओइनहे सम्मानके लाग उहाँहुकनके लर्का बच्चनहे निशुल्क शिक्षाके साथे छात्रवृतिमे समेटना जरुरी बा ।’
वडा कार्यालयसे प्रत्येक बरस प्रोत्साहन स्वरुप सम्मान करल कहटी यी बरस जाड महिनामे ओह्रर्ना ब्ल्याङकेट वितरण कैना उहाँ जनैलै ।

कैलारी गाउँपालिका वडा नम्बर ३ वडा अध्यक्ष सन्तराम चौधरी महिला स्वास्थ्य स्वयं सेविका निस्वार्थ भावनासे दिन रात नइकहिके रातदिन विना तलब खटटी रहल ओरसे ओइनके काम कैना मनोबल बह्राइक लाग सम्मान करल बटैलै ।
कार्यक्रममे वडा नम्बर ५ के महिला स्वास्थ्य स्वय सेविका कृष्णा चौधरी ओ वडा वडा नम्बर ४ के महिला स्वास्थ्य स्वय सेविका अमिता चौधरी मन्तव्य व्यक्त करल रहिट ।

कार्यक्रममे वडा अध्यक्षहुक्रे, कार्यपालिका सदस्य, नौ वडाके महिला स्वास्थ्य स्वयं सेविका, टमान शाखाके प्रमुखहुकनके सहभागिता रहे । यिहे विच दिवसके अवसरमे महिला स्वास्थ्य स्वयं सेविकाहुकन विच हाजिरी जवाफ प्रतियोगिताफे संचालन कैगिल रहे ।