थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

मजगाउँमे माघ महोत्सव सुरु

पहुरा | १२ माघ २०८१, शनिबार
मजगाउँमे माघ महोत्सव सुरु

पहुरा समाचारदाता
धनगढी, १२ माघ ।
कैलालीके गोदावरी नगरपालिका वडा नम्बर ८ स्थित मजगाउँमे माघ महोत्सव २०८१ सुरु हुइल बा ।

महोत्सव एक समारोहके विच सुदूरपश्चिम प्रदेशके मुख्यमन्त्री कमल बहादुर शाह उदघाटन करल रहिट । कार्यक्रममे सम्बोधन कैटी मुख्यमन्त्री शाह थारु समुदायके बरघर प्रथाहे संरक्षणके लाग सेकटसम हाली कानूनी मन्यता डेहुवइना बटैलै ।

सुदूरपश्चिम प्रदेश बरघर ओ भल्मन्सा प्रथा संरक्षण तथा विकास सम्बन्धी व्यवस्था कैना बनल विद्येयकके अवधारणपत्र आन्तरिक मामिला तथा कानून मन्त्रालय ओ आर्थिक मामिला मन्त्रालयमे सैद्धान्तिक सहमतिके पठाइल जनैटी वहाँसे पास हुके अइटीकी पास कैना प्रक्रिया आघे बह्रैना उहाँ बटैलै ।

संस्कृति संरक्षण, स्थानीय पर्यटन व आधुनिक कृषि पर्यटनके लाग एकजुट हुई कना मुल नाराके साथ थारू कल्याणकारिणी सभा व वरघर भलमन्सा गोदावरी नगर समितिसे महोत्सवके आयोजना करलक हो ।

महोत्सव उदघाटन कार्यक्रम थारू कल्याणकारिणी सभाके नगर अध्यक्ष जनकलाल चौधरीके अध्यक्षतामे हुइल हो । अइना सोम्मारसम चल्न महोत्सवमे मजगाउँ थारु सामुदायिक होमस्टे व खुटिया चारपाते युवा क्लबसे सहकार्य करले बा । महोत्सवमे स्थानीय झाँकी प्रदर्शनके साथे थारु राष्ट्रिय कलाकारके बेजोड प्रस्तुति रना आयोजक जनैले बा ।

महोत्सवमे थारु खानपानके व्यवस्था, थारु कला संस्कृतिके जगेर्ना सम्बन्धी विविध कार्यक्रम, थारु कला, सीप झल्कन थारु संग्रहालयके अवलोकनके साथ अन्य रमाइलो मेला प्रदर्शन रहल बा ।

जनाअवजको टिप्पणीहरू