सूचना केन्द्र स्थापनाके लाग महासंघहे सामग्री

पहुरा समाचारदाता
धनगढी, २१ माघ । धनगढीमे रहल चैतन्य पाठशालासे सूचना केन्द्र स्थापनाके लाग नेपाल पत्रकार महासंघहे सामग्री सहयोग करले बा ।
चैतन्यसे सरस्वती पूजाके अवसर पारके महासङ्घहे डुई थान कम्प्युटर, एक थान प्रोजेक्टर ओ एक थान प्रिन्टर सहयोग करल हो । सुदूरपश्चिम प्रदेशके सामाजिक विकासमन्त्री मेघराज खड्का महासङ्घके अध्यक्ष श्रवण देउवाहे उ सामग्री हस्तान्तरण करल हुइट ।
उ अवसरमे मन्त्री खड्का शिक्षा ओ संस्कारके क्षेत्रमे महत्वपूर्ण भूमिका खेलल् चैतन्य पाठशालासे सामाजिक क्षेत्रमे फेन उल्लेखनीय काम कैटी आइल कहटी प्रशंसा करल रहिट ।
चैतन्यसे सामग्री सहयोग करलमे धन्यवाद डेटी महासङ्घके अध्यक्ष देउवा कुछ दिनभित्रे महासंघसे सूचना केन्द्र स्थापना कैना बटैलै । कार्यक्रममे चैतन्य पाठशालाके कार्यकारी प्रमुख गणेशप्रसाद जोशी, प्रिन्सिपल कटकबहादुर सिंहलगायतके उपस्थिति रहल रहे ।
