नेपाली खेलाडी खेलकु्दमे आघे बटैः मन्त्री खडका

पहुरा समाचारदाता
धनगढी, २१ माघ । सुदूरपश्चिम प्रदेश सरकारके सामाजिक विकास मन्त्री मेघराज खडका नेपालीहुक्रे शिक्षा ओ चेतनामे पाछे रहलेसेफे खेलकुदके क्षेत्रमे आघे रहल बटैले बटै ।

वसन्त पञ्चमीके अवसरमे सोम्मारके रोज धनगढी उपमहानगरपालिका–५ शिवनगरमे रहल चैतन्य पाठशालासे सुदूरुपश्चिम प्रदेशसे खोखो खेलके विश्व प्रतिस्पर्धासे उपविजेता बनल १२ जाने खेलाडीहुकनहे सम्मान ओ नेपाल पत्रकार महासंघ कैलाली शाखाहे सूचनाकेन्द्र स्थापनार्थ प्राविधिक सामाग्री हस्तान्तरण कार्यक्रममे सम्बोधन करटी उहाँ उ बाट बत्वाइल रहिट ।

चैतन्य पाठशालासे हम्रे सक्कु जाने सामाजिक क्षेत्रमे खेलल भुमिकाहे सबजाने सम्मान करे पर्ना उहाँ बटैलै । मन्त्री खड्का चैतन्य पाठशाला सुदूरपश्चिमके एक उदाहरणीय काम करटी रहल ओ अभिन सुदूरपश्चिम प्रदेशके अग्रणी धरोहर बन्न शुभकामना व्यक्त करलै । आजके बिश्व समाजहे सुहैना शिक्षा चैतन्य पाठशालासे डेटी रहल उहाँ बटैलै ।

पाठशालासे भारतमे भर्खर सम्पन्न खोखो विश्वकप प्रतियोगितामे उपविजेता बनल सुदूरपश्चिम प्रदेशसे सहभागी हुइल १२ जाने खेलाडीनहे नगदसहित सम्मान करल हो । एक समारोहके विच सामाजिक विकासमन्त्री मेघराज खड्का ओइनहे नगदसहित सम्मानपत्र हस्तान्तरण करल रहिट ।

खोखो विश्वकपमे नेपालके महिला ओ पुरुष दुनु टोली उपविजेता बनल रहे । चैतन्यसे महिला टिमके कप्तान सरस्वती कडायत, मनमती धामी, पूजा ओड, खुश्बु राना, वर्षा पण्डितहे सम्मान करले बा । ओस्टेक करके पुरुषओर टिम कप्तान हेमराज पनेरु, विवश चौधरी, जोगेन्द्र राना, सुरज पुजारा, समिर चन्द, गणेश विक ओ जनक चन्दहे सम्मान करले बा । ओस्टक करके, टिम व्यवस्थापक कृष्ण पनेरु ओ अन्तर्राष्ट्रिय खोखो निर्णायक राजकुमार चौधरीहेफे नगदसहित सम्मान करल बा । उप विजेता १२ जाने खेलाडीनहे जनही रु. पाँच हजार सहित सम्मान पत्र प्रदान करके वधाई तथा सम्मान करल बा ।

यिहे विच नेपाल पत्रकार महासंघ कैलालीहे सूचना केन्द्र स्थापनार्थ प्राविधिक सामाग्री २ थान डेस्क टप, २ थान मनिटर ओ १ एक थान प्रोजेक्टर कार्यक्रमके प्रमुख अतिथि सामाजिक विकास मन्त्री माननीय मेघराज खड्कामार्फत चैतन्य पाठशालासे हस्तान्तरण करले बा ।

विशिष्ट अतिथि मानव सेवा आश्रमके संस्थापक रामजी अधिकारी रहल रहिट । नेपाल पत्रकार महासंघ कैलालीके अध्यक्ष श्रवण देउवा सूचना केन्द्र स्थापनाके लाग चैतन्यसे करल सहयोगके लाग धन्यवाद व्यक्त करलै ।
कार्यक्रम पिटिए अध्यक्ष ईश्वर गिरीके अध्यक्षतामे हुइल रहे । पाठशालाके प्रिन्सिपल कटक बहादुर सिंह स्वागत मन्तव्य ओ सह प्रिन्सिपल हेमा जोशी संचालन करल रहिट । कार्यक्रममे पाठशालाके सिईयो गणेशप्रसाद जोशी, शिक्षक, अभिभावक, सञ्चारकर्मीनहे सहभागिता रहे ।