कैलारीसे काठमाण्डौसम बस सेवा सञ्चालन

पहुरा समाचारदाता
हसुलिया, २२ माघ । कैलाली जिल्लाके कैलारी गाउँपालिकास्थित हसुलियासे काठमाण्डौंसम बस सेवा सञ्चालनमे आइल बा ।
कर्णाली रिभर साइड यातायात प्रालिसे सञ्चालनमे ल्यानल उ बस सेवाके उदघाटन कैलारी गाउँपालिका अध्यक्ष राजसमझ चौधरी एक कार्यक्रमके विच करल रहिट । यातायातके सक्कुहुन आवश्यकता परठ, उहाँ कहलै, ‘कैलारीसे आउर ठाउँमे जाइक लाग यातायात सेवाके एकदम अभाव बा । कैलाली सुगम जिल्ला रहल मने कैलारी गाउँपालिका दुर्गमके महशुुस हुइल बा । काठमाण्डौसम बस सेवा सञ्चालन हुइलपाछे सुविधा महशुस हुइल बा ।’
कैलारीसे अब्बे डिलक्स बस जैना करल बा । कलेसे पाछे एसि जाई कना विश्वास करल उहाँ बटैलै । स्थानीय तह लग्गेक सरकार रहल कहटी पालिकासे हुइना सहयोग कैना उहाँ प्रतिवद्धता जनैलै ।

कैलारीसे काठमाण्डौसम बस सेवा उदघाटन कार्यक्रममे वडा अध्यक्षहुक्रे, वडा सदस्यहुक्रे, नेपाली काँग्रेस कैलारी गाउँपालिका सभापति कृष्णप्रसाद चौधरी, इलाका प्रहरी कार्यालय हसुलियाके इन्चार्ज, कर्णाली रिभरसाइड यातायात प्रालिके प्रतिनिधिहुकनके सहभागिता रहे ।
