कैलारी गाउँपालिकामे एचपीभी खोप शुरु

पहुरा समाचारदाता
हसुलिया, २२ माघ । कैलाली जिल्लाके कैलारी गाउँपालिका वडा नम्बर १ मनाउँस्थित जनता आधारभूत विद्यालयसे एचपीभी खोप सुरु हुइल बा ।
कैलारी गाउँपालिकाके उपाध्यक्ष भगवतीकुमारी चौधरी एक कार्यक्रमके विच महिलाके पाठेघरके मुहके क्यान्सर विरुद्धके एचपीभी खोप अभियानके सुरुवाट करल रहिट । खोप शुभारम्भ कार्यक्रममे सम्बोधन करटी उहाँ महिलाके पाठेघरके मुहके क्यान्सर विरुद्ध एचपीभी खोप क्यान्सर रोगसे बचैना उत्तम उपाय रहल बटैली । यी खोप अभियानमे लक्षित वर्गहे अनिवार्य उपस्थिति हुइना उहाँ आग्रह करली ।
कार्यक्रममे एचपीभी खोप अभियानके उद्देश्यबारे कैलारी गाउँपालिका स्वास्थ्य शाखाके प्रमुख नरेशकुमार चौधरी जानकारी डेहल रहिट । विद्यालयमे अध्ययन कैना कक्षा ६ से १० समके छात्रा ओ विद्यालय नैजैना १० से १४ वर्ष उमेरके किशोरीनहे पाठेघरके मुखके क्यान्सर विरुद्धके एचपीभी खोप डेहे लागल स्वास्थ्य शाखाके प्रमुख जनैलै ।
कैलारीमे २५ ठो विद्यालयमे कक्षा ६ से १० समके छात्रा ओ विद्यालय नैजैना १० से १४ वर्ष उमेरके किशोरीनहे पाठेघरके मुखके क्यान्सर विरुद्धके एचपीभी खोप लगैना ओ विद्यालय बाहेर रहल उहे उमेरके किशोरीहुकनके लाग सक्कु वडामे रहल हेल्थपोष्टमे उ खोप लगैना व्यवस्था कैना उहाँ जनैलै । कैलारी गाउँपालिकामे १ हजार नौ सय ७५ जाने किशोरीहुकनके खोप लगैना उहाँ जनैलै ।

शाखा प्रमुख चौधरी महिलामे पाठेघरके मुखके क्यान्सर चौठा मुख्य क्यान्सर रहल बटैलै । ८८ प्रतिशत पाठेघरके मुखके क्यान्सरके बिरामी ओ मृत्यु हुइना सख्या न्यून आय रहल ओ मध्यम आय रहल देशमे डेखल उहाँक कहाई बा ।
माघ २२ गतेसे फागुन ६ गतेसम १५ दिन देशव्यापी अभियानके रूपमे आघे बह्रे लागल बा । खोप अभियानके शुभारम्भ कार्यक्रम कैलारी गाउँपालिका वडा नम्बर १ के वडा अध्यक्ष धोजहरिपाल बोहराके अध्यक्षतामे हुइल रहे ।

कार्यक्रममे प्रमुख प्रशासकीय अधिकृत खगेन्द्रराज जोशी, उ विद्यालयके प्रअ सुरेश महतो, भल्मन्साहुक्रे, पालिकास्तरीय भल्मन्सा समितिके सचिव, विद्यालय शिक्षक, महिला स्वास्थ्य स्वयं सेविका ओ अन्य सरोकारवालाहुकनके सहभागिता रहे । कार्यक्रमके संचालन प्रमुख मनाउँ आधारभूत स्वास्थ्य केन्द्रके प्रमुख कुशुम चौधरी करल रहिट ।
