नेपाली काँग्रेसके दुसरा जिल्ला सम्मेलन सम्पन्न

विकास हुइल नैडेख्ना हेर्ना नजरिया फरक बाः परराष्ट्र मन्त्री देउवा

पहुरा समाचारदाता
धनगढी, २५ माघ । नेपाली काँग्रेसके १४औं महाधिवेशन पाछेक कैलालीके दुसरा जिल्ला सम्मेलन तथा १० दिने अभियान कार्यक्रमके समापन कार्यक्रम शुकके रोज धनगढीमे सम्पन्न हुइल बा ।

नेपाल सरकारके परराष्ट्र मन्त्री डा. आरजु राणा देउवाके प्रमुख आतिथ्यतामे हुइल कार्यक्रममे उहाँ सम्बोधन करटी नेपालमे विकासके गति फडको मरटी गैल मने हेर्ना नजरिया फरक रहल बटैले बा ।

‘सामाजिक सञ्जालमे दिनदिने नकरात्मक चित्रण कैना कैजैटी बा,’ उहाँ कहली, ‘यहाँके यूवा विदेश जैटी रहल बटै । का यहाँ लडाई हुइटी बा । विकास नैहुइल कना नैहो । काम करलेसे अपने ठाउँमे रोजगार बने सेक्ना अवस्था बा । पहिलेक देशके अवस्था कैसिन रहे कल्पना करी । अब्बे कैसिन बा । एक चो अपन आँखीक सामने हेरी ।’

उहाँ कहली, ‘मै सुदूरपश्चिम प्रदेशमे पहिल चो पौला टेकेबेर धनगढीमे एक किलो मिटरफे पिच सडक नैरहे । गडडाचौकीसे चिसापानीसम सडक नैरहे । पुल नैरहे । अब्बे कौन अवस्थामे बा । धनगढीमे ६ लेन सडक बनसेकल, ढेर जैसिन ग्रामीण सडकफे कालोपत्रे हुसेकल ।’

औरक कहलेक भरमे नेंग्ना की अपन आँखी आघे डेख्ना मनन करी । बाहिया देशसेफे नेपाल ओ नेपालीहुकन हेर्न दृष्टि मजा रहल उहाँ बटैली ।

नेपालमे एक बर्षमे ६ हजारसे ढेर जाने आत्माहत्या करल तथ्यांकसे डेखाइठ । उ दर लग्टीक बा । फेसबुकमे रहल नकारात्मक पोष्टहे लाइक नकरी । गलत चिजहे ढेर महत्व काहे डेना, मने ओकर खोजी अनुसन्धान कैना जरुरी बा, उहाँ कहली ।
कार्यक्रमके विशिष्ट पहुना रहल नेपाली काँग्रेसके केन्द्रीय सदस्य तथा थारु विभाग संयोजक, केन्द्रसे खटागिल १०० दिने अभियानके कैलाली प्रतिनिधि योगेन्द्र चौैधरी पार्टीसे चलाइल १०० दिने अभियान सफल हुइल महशुस करल बटैलै । उहाँ कहलै, ‘अभियानसे टुटल मनहे मिलाइल ओ जनगुनासोके सुनुवाई हुइल बटैलै ।

कार्यक्रममे नेपाली काँग्रेसके केन्द्रीय सदस्यहुक्रे डा. रणबहादुर रावल, सुशिला मिश्रभट्ट, नृप बहादुर ओड, रामजनम चौधरी, डा. जीवन राना, पार्टीके प्रदेश महामन्त्री नर नारायण शाह, नेपाली काँग्रेस क्षेत्र नम्बर १ के सभापति प्रकाश शाह, क्षेत्र नम्बर २ के सभापति कृष्ण ढकाल, क्षेत्र नम्बर ३ के सभापति रिता चौधरी, क्षेत्र नम्बर ४ सभापति वसन्त रोकाय, क्षेत्र नम्बर ५ के सभापति भीम पडाल, गोदावरी नगरपालिकाके नगर प्रमुख विरेन्द्र भट्ट, कैलारी गाउँपालिकाके अध्यक्ष राजसमझ चौधरी, नेपाल विद्यार्थी संघके जिल्ला अध्यक्ष मनिष कुवँरलगायत मन्तव्य व्यक्त करल रहिट ।

नेपाली काँग्रेसके जिल्ला सभापति तथा राष्ट्रिय सभा सदस्य नारायण दत्त भट्टके अध्यक्षतामे हुइल कार्यक्रममे स्वागत मन्तव्य उपसभापति खेमराज डगौरा ओ संचालन सचिव नृप सुनार करल रहिट ।

यिहे विच नेपाली कांग्रेससे स्थानीय निकायमे जित हासिल करके पार्टीहे सबसे ढेर लेवी तिरल निकायहे सम्मान करले बा । यिहे क्रममे कैलाली जिल्लाके कैलारी गाउँपालिका, गोदावरी नगरपालिका ओ जानकी गाउँपालिकाहे विशेष सम्मान प्रदान करल बा ।

ओस्टेक करके नेपाली कांग्रेस गोदावरी नगरपालिका नगर सभापति वीरबहादुर चोखालहे, स्वास्थ्य क्षेत्रमे योगदान पुगाइल निसर्ग हस्पिटलके अध्यक्ष तिर्थराज पन्त, कैलाली उघोग वाणिज्य संघके वरिष्ठ उपाध्यक्ष पुष्कर ओझाहे सम्मान करल बा ।
सम्मेलनमे पार्टीके केन्द्रीय सदस्य, पूर्व केन्द्रीय सदस्य, सुदूरपश्चिम प्रदेश कार्यसमिति, महासमिति सदस्य, महाधिवेशन प्रतिनिधि, क्षेत्रीय सभापति, पदाधिकारी, पालिका सभापति, पदाधिकारी तथा सदस्यहुकनके सहभागिता रहे ।

ओस्टेक करके पार्टीके वडा सभापति, क्षेत्रीय प्रतिनिधि तथा भातृ एवं शुभेच्छुक संस्थाके प्रमुख एवं प्रतिनिधिफे सहभागी रहिट । सम्मेलन मानबहादुर राना ओ रेवती राना नेपाली काँग्रेसमे प्रवेश करले बटै । उहाँहुकनहे पार्टीके केन्द्रीय सदस्य तथा परराष्ट्र मन्त्री डा. आरजु राणा देउवा सदस्यता प्रदान करल रहिट । यिहे भादा गाउँक सखिया ओ लाठी नाँच डेखागैल रहे ।