कैलारी गाउँपालिका अध्यक्ष राजसमझ चौधरी सम्मानित
पहुरा समाचारदाता
धनगढी, २५ माघ । कैलारी गाउँपालिका अध्यक्ष राजसमझ चौधरी सम्मानित हुइल बटै ।
शुकके रोज धनगढीमे हुइल नेपाली काँग्रेस कैलाली जिल्ला सम्मेलनमे उहाँ सम्मानित हुइल हुइट । नेपाली काँग्रेसके आर्थिक नियमावली २०७६ के नियम २३ के उपदफा ५ अनुसार पालिका तहमे उहाँ नेतृत्वके जनप्रतिनिधिहुकनसे पार्टीहे बुझाई पर्ना मासिक लेवि वाफतके रकम नियमित रुपमे बुझाके सहयोग पुगैलकमे सम्मान कैगिलक हो ।
उहाँहे नेपाली काँग्रेसके केन्द्रीय सदस्य तथा नेपाल सरकारके परराष्ट्र मन्त्री डा. आरजु राणा देउवा सम्मान करल रहिट ।
कार्यक्रममे गाउँपालिका अध्यक्ष राजसमझ चौधरी पालिकाके नौ वडामे वडा सदस्यसे लेहे पालिका अध्यक्षसम एकलौटी नेपाली काँग्रेससे जित हासिल कैके इतिहास कायम करल बटैलै । उहाँ कहलै, ‘गाउँपालिकामे आर्थिक स्रोत कम बा, जनआपेक्ष अनुसार ढेर काम करेपर्ना बा । लडिया, खोलाके बाढसे कटान, पटान, डुबान ओ छाडा चौपायाके कारण समस्या झेले परल बा । यकर लाग प्रदेश ओ संघ सरकारसे सहयोग आवश्यक बा ।’
कैलारीमे विकास हुइलेसे पार्टीके नाउँ रना ओरसे यकरबारे प्रदेश ओ संघ सरकारसे सोचे पर्ना अवस्था रहलफे गाउँपालिका अध्यक्ष बटैलै ।
यिहे विच नेपाली कांग्रेससे स्थानीय निकायमे जित हासिल करके पार्टीहे सबसे ढेर लेवी तिरल निकायहे सम्मान करले बा । यिहे क्रममे कैलाली जिल्लाके गोदावरी नगरपालिका ओ जानकी गाउँपालिकाहे विशेष सम्मान प्रदान करल बा ।
ओस्टेक करके नेपाली कांग्रेस गोदावरी नगरपालिका नगर सभापति वीरबहादुर चोखालहे, स्वास्थ्य क्षेत्रमे योगदान पुगाइल निसर्ग हस्पिटलके अध्यक्ष तिर्थराज पन्त, कैलाली उद्योग वाणिज्य संघके वरिष्ठ उपाध्यक्ष पुष्कर ओझाहे सम्मान करल बा ।
