लागुऔषध दुव्र्यसनीमे नाफँसीः परराष्ट्र मन्त्री डा. राणा

धनगढी, २७ माघ । परराष्ट्रमन्त्री डा. आरजु राणा देउवा लागुऔषध दुव्र्यसनीमे नैफस्ना सक्कु जनहनहे आग्रह करले बाटी ।

नेपाल विद्यार्थी सङ्घ धनगढी उपमहानगर समितिसे अँट्वारके धनगढीमे आयोजना करल लागूऔषध दुव्र्यसनीविरुद्धके बृहत् पैदलयात्राके शुभारम्भ कैटी उहाँ लागूऔषधके प्रयोग नैकैना सक्कु जनहनहे आग्रह करल हुइटी ।

‘लागूऔषध एकचो फेन प्रयोग नाकरी । एकचोसे फेन दिमागमे असर करठ् । संघरियनके लहलहैमे फेन नलागी,’ मन्त्री देउवा कहली, ‘सकारात्मक सोँची । आपन घरपरिवारहे सम्झि, लागुऔषध प्रयोगमे नलागी । इहीसे कुहीहे मजा नैकरठ् ।’
लागूऔषध दुव्र्यसनमे फँसलहे छोर्ना आग्रह कैटी उहाँ आघे कहली, ‘लागुऔषधमे फँससेकलमे उहीसे निक्रे नैसेकम कहिके नसोँची । निक्रे सेकजाइठ्, मनै चाहलेसे ज्या फेन हुइठ् । आजके दिनसे छोरडी ।’

मन्त्री देउवा लागुऔषध दुव्र्यसनी नेपालमे किल नैहोके भारतमे समेत बरवार समस्याके रूपमे रहल बटैली । उहाँ कहली, ‘लागुऔषधके समस्या पहिलेसे नै हो । इहीसे विशाल रूप लेहल डेखेबर चिन्ता ओ दुःख लागल बा । यहाँ फेन ढेर घरपरिवारमे इ समस्या बा । लागूऔषध दुव्र्यसनी नैलग्ना मै आग्रह करे चाहटु ।’