ग्यालेक्सी माविके ३१ वार्षिकोत्सव
पहुरा समाचारदाता
धनगढी, २७ माघ । कैलालीके धनगढी उपमहानगरपालिका–५ हसनपुरमे रहल ग्यालेक्सी माध्यमिक विद्यालयके ३१ वार्षिकोत्सव तथा अभिभावक दिवस समापन समारोह कार्यक्रम अँटवारके रोज भव्यताके साथ सम्पन्न हुइल बा ।
उ विद्यालय व्यवस्थापन समितिके अध्यक्ष मोहनराज भट्टके अध्यक्षतामे हुइल कार्यक्रममे राष्ट्रिय परीक्षा बोर्ड धनगढीके प्रमुख महेन्द्रराज पाण्डेय प्रमुख अतिथि रहल रहिट । कार्यक्रममे सम्बोधन करटी उहाँ ग्याक्सी मावि गुणस्तरीय शिक्षा डेना संस्था मध्ये एक रहल बटैलै । उहाँ कहलै, ‘यहाँ अध्ययनरत रहल विद्यार्थी अब्बल बन्टी गैल बटै । नेपालमे यूवाहुक्रे रोजगारीके लाग विदेश जैना क्रम बह्रल बा । कलेसे मजा विद्यार्थीफे अध्ययनके लाग विदेश जैना करल बटै ।’
मुलुक अब्बे आधुनिक युगके प्रवेश हुसेकल ओरसे विद्यार्थीनसे शिक्षक एक÷दुई कदम आघे हुई पर्ना उहाँ बटैलै ।
कार्यक्रममे विद्यालय व्यवस्थापन समितिके अध्यक्ष मोहनराज भट्ट, विद्यालय व्यवस्थापन समिति सदस्य महेश्वर पाठक, सिदार्थ माविके प्रिन्सिपल सिवि चन्दलगायत शुभकामना मन्तव्य राखल रहिट । विद्यालयके प्राचार्य छत्रराज पण्डित विद्यालय गतिविधिके साथे स्वागत मन्तव्य व्यक्त करल रहिट ।
विद्यालयके वार्षिकोत्सव तथा अभिभावक दिवसके अवसरमे आयोजना करल टमान अतिरिक्त क्रियाकलापमे सफलता हासिल करुइया विद्यार्थी पुरस्कार वितरण कैगिल बा । ओस्टेक अन्तरविद्यालय हाजिरी जवाफ प्रतियोगितामे पहिल स्थान प्राप्त कैना एरिष्टो ई.बो स्कुल, दुसरा स्थान प्राप्त करुइया ऐश्वर्य विद्या निकेतन तथा टिसरा स्थान प्राप्त कैना पञ्चोदय माविके सहभागी विद्यार्थीहुकनहे नगद, प्रमाणपत्र, ट्रफि तथा मेडलसे पुरस्कृत करल रहे ।
ओस्टे करके विद्यालयसे २०८० सालके एसईई परीक्षामे धनगढी उप महानगरपालिकाभिटर सर्वोत्कृष्ट अंक(३.९५) प्राप्त कैना आकाश ठगुन्ना, कक्षा १२ के वार्षिक परीक्षामे विद्यालयमे सर्वोत्कृष्ट अंक(३.८०) प्राप्त करुइया आदर्श जोशीलगायत २०८१ सालके एम.बि.बि.एस ओ इन्जिनियरिङ परीक्षामे पूर्ण छात्रवृत्तिमे नाम निकर्ना सफल मेघावी विद्यार्थी क्रमशः मुकेश वि.क. ओ गणेश पाठक तथा ओइनके अभिभावकहुकनहे दोसल्लासहित नगद तथा प्रमाणपत्रसे सम्मान करल रहे । साथैे विद्यालयमे कार्यरत टमान उत्कृष्ट शिक्षक तथा कर्मचरीहुकनहे समेत उ समारोहमे दोसल्लासहित नगद ओ सम्मानपत्रसे सम्मान करल रहे । जेम्ने शिक्षकओर गणेश भण्डारी, रत्न बहादुर कडाल ओ शंकर चौधरी तथा कर्मचारीओर वरिष्ट लेखापाल तपराज जोशी रहल बटै ।
कार्यक्रममे अभिभावक, विद्यार्थी तथा टमान विद्यालयके प्राचार्य, विद्यालय व्यवस्थापन समितिके पदाधिकारी, पत्रकार तथा टमान क्षेत्रके बौद्घिक व्यक्तित्वहुकनके उपस्थिति रहल रहे । कार्यक्रममे विद्यार्थीहुकनसे मेरमेराइक नाँच प्रस्तुत कैगिल रहे ।
कार्यक्रमके संचालन विद्यार्थीहुक्रे रिया जोशी, आलोक जोशी, आकृति बोहरा, अनुपमा अवस्थी करल रहिट । कलेसे स्वागत मन्तव्य शिक्षिक ज्योति भण्डारी करल रहिट ।
